អភិបាលខេត្តស្ទឹងត្រែង បញ្ជាក់ពីការយកចិត្តទុកដាក់លើកកម្ពស់ក្មេងស្រី
ស្ទឹងត្រែង៖ក្នុងពិធីអបអរសាទរទិវាអន្តរជាតិក្មេងស្រីឆ្នាំ២០២៤ ក្រោមប្រធានបទ «ការបង្កើនភាពអង់អាចរបស់ក្មេងស្រី ដើម្បីការអភិវឌ្ឍប្រកបដោយចីរភាព»កាលពីព្រឹកថ្ងៃទី៥ ខែវិច្ឆិកា ឆ្នាំ២០២៤ ឯកឧត្តម សរ សុពុត្រា អភិបាលខេត្តស្ទឹងត្រែងមានប្រសាសន៍ថា ក្មេងស្រីត្រូវបានលើកកម្ពស់ពីសំណាក់គ្រួសារ សហគមន៍ អ្នកពាក់ព័ន្ធដើម្បីឈានទៅបង្កើនភាពអង់ អាចក្នុងការអនុវត្តសិទ្ធិអភិវឌ្ឍសមត្ថភាព អភិវឌ្ឍជីវភាពក្នុងគ្រួសារព្រមទាំងអភិវឌ្ឍសេដ្ឋកិច្ច និងសង្គមជាតិ ។
ក្នុងកម្មវិធីដែលរៀបចំឡើងដោយរដ្ឋបាលខេត្តរួមជាមួយក្រសួងកិច្ចការនារី និងអង្គការភ្លែនអន្តរជាតិកម្ពុជានេះដែរ ឯកឧត្តម អភិបាលខេត្តបានចាត់ទុកការរៀបចំយុទ្ធនាការនៅក្នុងចំណោមអ្នកចូលរួមប្រមាណ៥០០នាក់នាពេលនេះនឹងក្លាយទៅជា ចលនារួមគ្នាមួយ ក្នុងការរួមចំណែកអប់រំអភិវឌ្ឍសមត្ថភាព សីលធម៌ គុណធម៌ សុជីវធម៌ និងថាមពល កុមារី យុវតី ឱ្យមានភាពអង់អាច និងមានអនាគតល្អ ។
ទាក់ទងនឹងព្រឹត្តិការណ៍កំពុងរៀបចំនេះ លោកស្រី សន សុខា ប្រធានមន្ទីរកិច្ចការនារីនិយាយថាយុទ្ធនាការដ៏មានសារៈសំខាន់ ក្នុងគោលបំណងផ្សព្វផ្សាយដល់សាធារណៈជន អំពីគុណតម្លៃនៃការទទួលបាននូវសមភាពរវាងក្មេងស្រី និងក្មេងប្រុស ក៏ដូចជាសម្រាប់ការចូលរួមគ្រប់វិស័យនឹងផ្តល់ឱកាសដល់យុវជនក្នុងការដឹកនាំផ្តួចផ្តើមគំនិតថ្មីៗក្នុងការលើកកម្ពស់ភាពអង់អាចដល់ក្មេងស្រីក្នុងភាពជាអ្នកដឹកនាំ៕
ដោយ៖ ដេង ម៉ាវិន
