អភិបាលខេត្តកំពង់ស្ពឺរំលឹកអាជ្ញាធរមូលដ្ឋានឱ្យយកចិត្តទុកដាក់ចំពោះអតីតយុទ្ធជន
កំពង់ស្ពឺ៖ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានប្រាប់ដល់អាជ្ញាធរនៅមូលដ្ឋានឱ្យពង្រឹងការយកចិត្តទុកដាក់ចំពោះជីវភាពរស់នៅប្រចាំថ្ងៃរបស់បងប្អូនអតីតយុទ្ធជន។ឯកឧត្តមបានគូសរំលេចថា ពួកគាត់បូជាសាច់ឈាមស្រស់លើសមភូមិដើម្បីការពារជាតិមាតុភូមិ។ឯកឧត្តមលើកឡើងដូច្នេះក្នុងឱកាសអញ្ជើញសាកសួរសុខទុក្ខ និងចែកអំណោយជូនអតីតយុទ្ធជន ១០០នាក់ស្ថិតនៅភូមិជ្រៃសែនជ័យ ឃុំតាំងសំរោង ស្រុកភ្នំស្រួច ខេត្តកំពង់ស្ពឺកាលពីព្រឹកថ្ងៃទី២៧ ខែវិច្ឆិកា ឆ្នាំ២០២៤ ។
បណ្ឌិត ជាម ច័ន្ទសោភ័ណ ថ្លែងក្នុងនាមជាប្រធានកិត្តិយសសមាគមអតីតយុទ្ធជនខេត្តកំពង់ស្ពឺថា បងប្អូនអតីតយុទ្ធជនទាំងអស់ក្នុងក្របខ័ណ្ឌខេត្តនឹងត្រូវជួបសំណេះសំណាលពីរដងក្នុងមួយឆ្នាំ។គឺក្នុងរដូវចូលឆ្នាំ និងបុណ្យភ្ជុំបិណ្ឌ ស្របតាមប្រសាសន៍ការណែនាំដ៏ខ្ពង់ខ្ពស់របស់អតីតប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន ដែលជាអ្នកបញ្ចប់សង្គ្រាមស៊ីវិលនៅកម្ពុជា ក្រោមនយោបាយឈ្នះឈ្នះ ។
សូមរំលឹកថា សមាគមអតីតយុទ្ធជន ត្រូវបានបង្កើតឡើងដោយសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា ដែលបច្ចុប្បន្ន សម្តេចប្រធានឧត្តមក្រុមប្រឹក្សាផ្ទាល់ព្រះមហាក្សត្រ និងជាប្រធានព្រឹទ្ធសភានៃព្រះរាជាណាចក្រកម្ពុជា ៕
ដោយ៖ម៉ុន សំអាន
