(ភ្នំពេញ)៖ លោកជំទាវរដ្ឋមន្រ្តី ចម និម្មល លើកឡើងថា ទំហំពាណិជ្ជកម្មអន្តរជាតិរបស់កម្ពុជា សំរាប់ឆ្នាំ២០២៤នេះ សម្រេចបានជាង៥០ពាន់លានដុល្លារអាមេរិក នៅក្នុងកំណើន១៥,៩៥ ភាគរយ ក្នុងនោះការនាំចេញសម្រេច ២៤ពាន់លានដុល្លារ អាមេរិក ដែលកើនឡើង១៤,៣៦ភាគរយ។ ទំនិញនាំចេញសំខាន់ៗ របស់កម្ពុជាទៅកាន់ទីផ្សារអន្តរជាតិ រួមមានសំលៀកបំពាក់ ផលិតផលធ្វើដំណើរ និងកាបូប ស្បែកជើង គ្រឿងអេឡិចត្រូនិច គ្រឿងបង្គុំ សំបកកង់រថយន្ត ទោចក្រយាន្ត ដំឡូងមី ស្វាយន្ទីរ អង្ករ និងជ័រកៅស៊ូជាដើម ។

លោកជំទាវ រដ្ឋមន្រ្តី បញ្ជាក់បន្ថែមថា ទីផ្សារសំខាន់ៗដែលកម្ពុជាបាននាំចេញផលិតផលរបស់ខ្លួនរួមមាន សហរដ្ឋអាមេរិក អាស៊ាន សហភាពអ៊ឺរ៉ុប ចិន ជប៉ុន កានណាដា ចក្រភពអង្គគ្លេស និងសារធារណៈកូរ៉េជាដើម។

ប្រសាសន៍ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានលើកឡើងនៅព្រឹកថ្ងៃ ទី១៩ ខែធ្នូ ឆ្នាំ២០២៤ នៅទីស្តីការក្រសួងពាណិជ្ជកម្ម ក្នុងឱកាស អញ្ជើញជាអធិបតីក្នុងពិធីបើកសន្និបាតបូកសរុបការងារពាណិជ្ជកម្មឆ្នាំ២០២៤ និងទិសដៅអនុវត្តន៍ការងារពាណិជ្ជកម្មឆ្នាំ២០២៥ ដែលពិធីនេះ បានរៀបចំឡើងរយៈពេលពីរថ្ងៃ គឺចាប់ពីថ្ងៃទី១៩-ទី២០ ខែធ្នូ ឆ្នាំ២០២៤។ អង្គសន្និបាតនេះ ត្រូវបានរៀបចំឡើងដោយផ្ទាល់ និងតាមប្រព័ន្ធអនឡាញ ដោយមានវត្តមានចូលរួមពី ដឹកនាំក្រសួងពាណិជ្ជកម្ម អគ្គរាជទូត និងជាតំណាងអចិន្ត្រៃយ៍នៃកម្ពុជាប្រចាំអង្គការពាណិជ្ជកម្មពិភពលោកនិងអង្គការអន្តរជាតិនានា តំណាងពាណិជ្ជកម្មប្រចាំតំបន់រដ្ឋបាលសេដ្ឋកិច្ចពិសេស តំណាងពាណិជ្ជកម្មប្រចាំនៅបរទេស និងមន្ត្រីពាក់ព័ន្ធទាំងអស់ចំណុះឱ្យក្រសួងពាណិជ្ជកម្មផងដែរ។

សន្និបាតប្រចាំឆ្នាំរបស់ក្រសួងពាណិជ្ជកម្ម រៀបចំឡើងដើម្បីពិនិត្យ និងវាយតម្លៃលើសមិទ្ធផលការងារដែលក្រសួងសម្រេចបានក្នុងរយៈពេលមួយឆ្នាំកន្លងទៅ ក៏ដូចជាពិភាក្សាស៊ីជម្រៅ និងដោះស្រាយបញ្ហាប្រឈមនានា និងលើកទិសដៅអនុវត្តន៍សម្រាប់ឆ្នាំបន្ទាប់ ស្របតាមកម្មវិធីនយោបាយ និងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ៕

អត្ថបទ ៖ ង៉ាន់ ទិត្យ
រូបភាព ៖ រិន រចនា