ឯកឧត្តមអភិសន្តិបណ្ឌិត ស សុខា កោតសរសើរឆន្ទៈ និងការលះបង់កម្លាំងកាយចិត្តរបស់ថ្នាក់ដឹកនាំ និង គ្រូបង្វឹក ក្នុងការរៀបចំផែនការយុទ្ធសាស្ត្រ ដើម្បីអភិវឌ្ឍកីឡាករ កីឡាការិនី
(ភ្នំពេញ)៖ក្នុងពិធីសំណេះសំណាលជាមួយថ្នាក់ដឹកនាំ នាយនគរបាល មន្រ្តីនគរបាល ប្រតិភូ ប្រតិភូរង គ្រូបង្វឹក គ្រូជំនួយ និងកីឡាករ កីឡាការិនីទាំងអស់ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ នៅថ្ងៃទី២៤ ខែធ្នូ ឆ្នាំ២០២៤ នៅទីស្តីការក្រសួងមហាផ្ទៃ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានក្រុមប្រឹក្សាកីឡាក្រសួងមហាផ្ទៃ បានលើកឡើងថា ក្នុងនាមថ្នាក់ដឹកនាំក្រសួងមហាផ្ទៃ និងជាក្រុមគ្រួសារនៃកីឡាក្រសួងមហាផ្ទៃទាំងមូល ពិតជាមានក្តីសោមនស្សរីករាយក្រៃលែង ដែលបានជួបជុំគ្នាជាថ្មីម្តងទៀត ទាំងពេលប្រកួតកន្លងទៅ ទាំងថ្នាក់ជាតិ និងអន្តរជាតិ ដែលនាំមកនូវភាពវិជ្ជមាន ក៏ដូចជាមោទនភាពជាតិសម្រាប់កម្ពុជា។
ឯកឧត្តមអភិសន្តិបណ្ឌិត ស សុខា ប្រធានក្រុមប្រឹក្សាកីឡាក្រសួងមហាផ្ទៃ បានកោយសសើរនិងវាយតម្លៃខ្ពស់ ចំពោះការលះបង់កម្លាំកាយចិត្ត និងឆន្ទៈ ក្នុងការប្រឹងប្រែងអភិវឌ្ឍន៍កីឡារបស់ថ្នាក់ដឹកនាំ នាយនគរបាល មន្រ្តីនគរបាល ប្រតិភូ ប្រតិភូរង គ្រូបង្វឹក គ្រូជំនួយ និងកីឡាករ កីឡាការិនីទាំងអស់ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ ជុំវិញការប្រកួតកីឡា ជាពិសេស ការប្រកួតកីឡាជាតិ ឆ្នាំ២០២៤ ដែលបញ្ចប់កាលពីពេលថ្មីៗកន្លងទៅនេះ។
ឯកឧត្តម ពិតជាមានមោទនភាពចំពោះបងប្អូនកីឡាករ កីឡាការិនី ដែលបាននាំមកនូវកិត្តិយសដល់ក្រុមគ្រួសារយើងទាំងមូលតាំងពីពេលមុន រហូតដល់ពេលបច្ចុប្បន្ន។ ការចូលរួមជួយជ្រោមជ្រែងរបស់ថ្នាក់ដឹកនាំ ជាពិសេសការកសាងកិត្តិយសជាតិ តាមរយៈការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣។
ឯកឧត្តមអភិសន្តិបណ្ឌិត ស សុខា បានគូសបញ្ជាក់ថា ឈរលើមូលដ្ឋាន ផឹកទឹកត្រូវនឹកដល់ប្រភពដើម ក្នុងនាមថ្នាក់ដឹកនាំក្រសួងមហាផ្ទៃ ឯកឧត្តមបានថ្លែងអំណរគុណយ៉ាងជ្រាលជ្រៅជូនចំពោះសម្តេចក្រឡាហោម ស ខេង ឧត្តមក្រុមប្រឹក្សាព្រះមហាក្សត្រ អតីតឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាអតីតប្រធានក្រុមប្រឹក្សាកីឡាក្រសួងមហាផ្ទៃ ព្រមទាំងថ្នាក់ដឹកនាំជាច្រើនរូបទៀត ដែលបានលះបង់កម្លាំងកាយចិត្ត ក្នុងការបង្កើត ទ្រទ្រង់ និងការចំណាយនានា ដែលរាជរដ្ឋាភិបាលប្រគល់ជូន ក្នុងគោលដៅដើម្បីអភិវឌ្ឍធនធានដ៏មានសារៈសំខាន់ ទាំងថ្នាក់ជាតិ និងថ្នាក់ក្រោមជាតិ រហូតដល់ឈានដល់ការចូលរួមប្រកួតលក្ខណៈអន្តរជាតិ ដែលមានឈ្មោះបោះសំឡេងទូទាំងពិភពលោក។
ទន្ទឹមជាមួយគ្នានោះ ឯកឧត្តមអភិសន្តិបណ្ឌិត ស សុខា ក៏បានវាយតម្លៃខ្ពស់ចំពោះឆន្ទៈ និងការលះបង់កម្លាំងកាយចិត្តរបស់ថ្នាក់ដឹកនាំ នាយនគរបាល មន្រ្តីនគរបាល ប្រតិភូ ប្រតិភូរង គ្រូបង្វឹក គ្រូជំនួយ និងកីឡាករ កីឡាការិនីទាំងអស់ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ ក្នុងការរៀបចំផែនការយុទ្ធសាស្ត្រ ដើម្បីអភិវឌ្ឍកីឡាករ កីឡាការិនី។
ឯកឧត្តម សរ សិទ្ធិ រដ្ឋលេខាធិការទទួលការងារអគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ បានថ្លែងបញ្ជាក់ថា សមទ្ធផលជោគជ័យទាំងអស់នេះ គឺ មានការជួយឧបត្ថម្ភគាំទ្រ និងការជួយជ្រោមជ្រែងយកចិត្តទុកដាក់ដ៏ខ្ពង់ខ្ពស់ពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានក្រុមប្រឹក្សាកីឡាក្រសួងមហាផ្ទៃ និងកិច្ចសហការល្អពីភាគីពាក់ព័ន្ធនានា ព្រមទាំងការប្តេជ្ញាចិត្តខ្ពស់របស់ថ្នាក់ដឹកនាំ និងមន្រ្តីគ្រប់លំដាប់ថ្នាក់ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ រួមទាំងការដឹកនាំឆ្នៃប្រឌិតក្នុងស្មារតីទទួលខុសត្រូវរបស់ថ្នាក់ដឹកនាំគ្រប់លំដាប់ថ្នាក់ ដែលធានាបានប្រសិទ្ធភាពការងារ ក៏ដូចជាគុណភាពនៃការបណ្តុះបណ្តាលដល់ធនធានកីឡាករ កីឡាការិនី ក្នុងកម្រិតមួយដែលអាចទទួលយកបាន៕
រូបភាព ៖ ងីមឆៃហួត អត្ថបទ៖ជាវ ចន្ធូ
