រតនគិរី៖នាយឧត្តមសេនីយ៍ ខ្វាន់ ស៊ាម អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការបញ្ជាការដ្ឋានវិស្វកម្ម នៃអគ្គបញ្ជាការនិងក្រុមជំនាញ បានអញ្ជើញពិនិត្យការកសាងផ្លូវក្រវាត់ព្រំដែនកម្ពុជា-វៀតណាម អមដំណើរដោយលោក វ៉ាន់ សោភា អភិបាលរងខេត្តរតនគិរី ។

នៅក្នុងដំណើរត្រួតពិនិត្យនេះ គណៈប្រតិភូបានត្រួតពិនិត្យយ៉ាងម៉ត់ចត់លើគុណភាពផ្លូវ វឌ្ឍនភាពនៃការសាងសង់ និង​បញ្ហាដែលកំពុងប្រឈម។ ឯកឧត្តម ខ្វាន់ ស៊ាម បានពិភាក្សាបន្ថែមជាមួយក្រុមជំនាញកងឯកភាពទទួលខុសត្រូវ និង​អាជ្ញាធរមូលដ្ឋាន ពាក់ព័ន្ធនឹងការកំណត់ពេលវេលាសម្រេចរបស់គម្រោង និងការដោះស្រាយបញ្ហាប្រឈមនានា ធានា​បានថាការងារអនុវត្តត្រឹមត្រូវតាមពេលវេលាកំណត់។

ឯកឧត្តម ខ្វាន់ ស៊ាម បានណែនាំដល់អ្នកអនុវត្តថា សំណង់ផ្លូវ និងសំណង់សិល្បៈការសំណង់មុខទឹកផ្សេងៗទាំងអស់​គោរព​តាម​បទដ្ឋាន​លក្ខណៈបច្ចេកទេស សំដៅធានាឱ្យរាល់សំណង់ ត្រូវមានសោភណភាព មានគុណភាពរឹងមាំ និងសម្រេច​បានជោគជ័យនូវភារកិច្ចជាប្រវត្តិសាស្ត្រ ដែលប្រគល់ឱ្យសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​នៃព្រះរាជាណាចក្រកម្ពុជា ។ឯកឧត្តមថា សមិទ្ធផលផ្លូវនេះ មិនត្រឹមតែជាហេដ្ឋារចនាសម្ព័ន្ធព្រំដែនទេ តែ​ជាសរសៃ​ឈាម​សំខាន់​មួយក្នុងការការពារព្រំដែនសន្តិភាព មិត្តភាព សហប្រតិបត្តិការ និងអភិវឌ្ឍន៍ ប្រកបដោយចីរភាព ៕
ដោយ៖គតិ យុត្ត