នគរបាលស្រុកកំពង់សៀម កំពុងស្រាវជ្រាវរកជនដៃដល់កាប់បំផ្លាញដំណាំថ្នាំជក់ជាងមួយហិកតា
កំពង់ចាម៖ កសិករជាម្ចាស់ចម្ការដំណាំថ្នាំជក់បានរាយការណ៍ជូនសមត្ថកិច្ចនគរបាលស្រុកកំពង់សៀម ដើម្បីស្វែងរកជនដៃដល់មិនស្គាល់មុខកាប់បំផ្លាញដំណាំថ្នាំជក់របស់គាត់អស់ប្រមាណ២៥ ០០០ដើម លើផ្ទៃដីជាងមួយហិកតា។ ។សកម្មភាពបំផ្លិចបំផ្លាញទ្រព្យនេះបានកើតឡើងកាលពីចន្លោះម៉ោង១១យប់ថ្ងៃទី២១ ខែមករារហូតដល់វេលាម៉ោង២រំលងអធ្រាត្រឈានចូលថ្ងៃទី២២ ខែមករា ឆ្នាំ២០២៥ ។
នៅថ្ងៃទី២៤ ខែមករា កម្លាំងនគរបាលស្រុកកំពង់សៀមបានចុះទៅដល់ទីតាំងកើតហេតុ។មន្ត្រីនគរបាលបានឱ្យដឹងថា សមត្ថកិច្ចបានទទួលព័ត៌មាន និងបណ្ដឹងពីឈ្មោះ ឡេង ប៊ុនធឿន ភេទប្រុស អាយុ៤៥ឆ្នាំ រស់នៅភូមិទី៦ ឃុំកោះសំរោង ស្រុកកំពង់សៀម ខេត្តកំពង់ចាម បានប្ដឹងរាយការណ៍ថា មានករណីកាប់បំផ្លិចបំផ្លាញដំណាំថ្នាំ ជក់របស់គាត់នៅចំណុចដីចម្ការថ្នាំជក់ ស្ថិតក្នុងភូមិទី៧ ឃុំកោះសំរោង ស្រុកកំពង់សៀម ខេត្តកំពង់ចាមនៅចន្លោះម៉ោង១១យប់ថ្ងៃទី២១ ខែមករា រហូតដល់វេលាម៉ោង២រំលងអធ្រាត្រឈានចូលថ្ងៃទី២២ ខែមករា ។ជនសង្ស័យមិនស្គាល់អត្ត សញ្ញាណបានធ្វើសកម្មភាពកាប់បំផ្លាញ់ដំណាំថ្នាំជក់អស់ប្រមាណ ២៥ ០០០ដើម នៅលើផ្ទៃដីទំហំជាងមួយហិកតា(១៦ម៉ែត្រគុណនឹង៧០០ម៉ែត្រ)។
ក្រោមការដឹកបញ្ជាផ្ទាល់ពីលោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម លោកវរសេនីយ៍ឯក ឯក ប៉ាន់ដន អធិការនគរបាលស្រុកកំពង់សៀមបានចាត់កម្លាំងជំនាញនៃការដ្ឋាននគរបាលស្រុកកំពង់សៀមដឹកនាំកម្លាំងនគរបាលប៉ុស្តិ៍រដ្ឋបាលកោះសំរោង សហការជាមួយកម្លាំងជំនាញផែនការងារនគរបាលព្រហ្មទណ្ឌខេត្តដឹកនាំដោយលោកឧត្តមសេនីយ៍ត្រី ថាញ់ សុខវ៉ុន ស្នងការរងទទួលជំនួយការិយាល័យព្រហ្មទណ្ឌស្រាល ចុះដល់ទីកន្លែងកើតហេតុធ្វើការដើម្បីពិនិត្យ និង ស្រាវជ្រាវ ។ករណីនេះសមត្ថកិច្ចជំនាញកំពុងបន្តធ្វើការស្រាវជ្រាវរៀបចំ កសាង ឯកសារសំណុំរឿងតាមនីតិវិធី ៕
ដោយ៖លី ពៅ
