កែច្នៃកសិផលនៅមូលដ្ឋានជួយជំរុញទីផ្សារកសិកម្ម និងលើកកម្ពស់ជីវភាពប្រជាពលរដ្ឋ
កំពត៖អ្នកប្រកប របរកែច្នៃកសិផល និងមន្ត្រីបច្ចេកទេសកសិកម្មក្នុងស្រុកទឺកឈូ ខេត្តកំពត បានបញ្ជាក់ថា របរកែច្នៃកសិផលនៅមូលដ្ឋានជារបរមួយសំខាន់ជួយគាំទ្រ និងជំរុញដល់ទីផ្សារកសិផលក្នុងស្រុកឱ្យមាននិរន្តរភាព និងផ្តល់នូវទំនិញដែលមានគុណភាពសុវត្ថិភាព ផ្តល់ផលល្អចំពោះសុខភាព និងជួយបង្កើនប្រាក់ចំណូលនៅក្នុងមូលដ្ឋាន។
អ្នកស្រី នូ សោភា កសិកររស់នៅភូមិទឹកក្រហម ឃុំកណ្តោល ស្រុកទឹកឈូ បានប្រាប់ឱ្យដឹងថា នៅឆ្នាំ២០២៣ គាត់និងសមាជិកក្រុម៥នាក់ផ្សេងទៀត បានចូលរួមវគ្គបណ្តុះបណ្តាល គម្រោងពហុវិស័យសន្តិសុខស្បៀង និងអាហារូបត្ថម្ភ របស់អង្គការ រ៉ាចា (RACHA)។ឆ្លងកាត់វគ្គបណ្ដុះបណ្ដាលនេះអ្នកស្រី ក៏ចេះកែច្នៃចំណីអាហារ និងភេសជ្ជៈជាង១០មុខ រួមមាន ទឹកសណ្តែកសៀង ទឹកសណ្តែកខៀវ ទឹកពោត ទឹកត្នោត ទឹកត្រាវ ទឹកស្ពៅ យ៉ាអួ ម្សៅចង្រិត ជ្រក់ស្ពៃ ជ្រក់ត្រសក់ ជ្រក់ស្វាយ ជ្រក់ត្រប់ ដំណាប់ស្វាយ ចេកឆាប ស្រាស្វាយជាដើម។អ្នកស្រីក៏យកជំនាញនេះធ្វើជាមុខរបរ រហូតមកដល់បច្ចុប្បន្ន ។ចំណែកអ្នករួមក្រុម៥នាក់ផ្សេងទៀត បានបោះបង់ជំនាញនេះ ដោយងាកទៅធ្វើការងារផ្សេងៗ ដោយសារប្រាក់កម្រៃពីរបរកែច្នៃចំណីអាហារនេះ មិនទាន់មានទីផ្សារល្អ។ ប៉ុន្តែសម្រាប់អ្នកស្រីនៅតែពេញចិត្ត ក្នុងការបន្តមុខរបរកែច្នៃកសិផលនេះ ដោយសារលោកស្រីគិតពីសុខភាពអ្នកទទួលទាន ច្រើនជាងប្រាក់ចំណេញ។
កសិករកែច្នៃកសិផលដដែលបានបញ្ជាក់ថា ជាធម្មតាមួយថ្ងៃអ្នកស្រីធ្វើទឹកសណ្តែក ទឹកពោត ទឹកស្ពៅ ចន្លោះពី៦០ ទៅ៧០ដប លក់ឱ្យអ្នកភូមិ និងអ្នកទិញយកទៅលក់បន្ត។បន្ទាប់ពីពលរដ្ឋមានការយល់ដឹងច្រើនពីបញ្ហាសុខភាព តម្រូវការក៏ចាប់ផ្តើមកើនឡើងជាបណ្តើរៗ ធ្វើឱ្យប្រាក់កម្រៃក៏មានការកើនឡើងផងដែរ។
លោក ម៉ី ភារ៉ា មន្ត្រីបច្ចេកទេសកសិកម្មឃុំកូនសត្វ បានលើកឡើងថា ការកែច្នៃកសិផល ជាការងារមួយសំខាន់ដែលរូបលោកកំពុងតែខិតខំលើកទឹកចិត្តនិងជំរុញដល់កសិករ ដល់ពលរដ្ឋទូទៅឱ្យចេះកែច្នៃកសិផល និងគាំទ្រ ផលិតផលកែច្នៃនៅមូលដ្ឋានរបស់ខ្លួន ព្រោះមានគុណភាពល្អដល់សុខភាព ក៏ដូចជាជំរុញដល់ទីផ្សារកសិផល។
ជុំវិញរឿងនេះ លោក អ៊ឹម ច័ន្ទសោធន អភិបាលស្រុកទឹកឈូបានពណ៌នាថា រដ្ឋបាលស្រុកកំពុងតែយកចិត្តទុកដាក់និងគិតគូរដើម្បីលើកកម្ពស់វិស័យកសិកម្ម និងជីវភាពរបស់កសិករឱ្យកាន់តែប្រសើរ។រដ្ឋបាលស្រុកនឹងបន្តជំរុញ និងគាំទ្រដល់កសិករលើផ្នែកបច្ចេកទេសដាំដុះ ដើម្បីបង្កើនទិន្នផល និងបច្ចេកទេសកែច្នៃនៅមូលដ្ឋាន ដើម្បីអភិវឌ្ឍ និងប្រែក្លាយកសិកម្មនៅមូលដ្ឋានឱ្យក្លាយទៅជាសហគមន៍ទំនើប។ លោកអភិបាលក៏បានអំពាវនាវដល់ប្រជាពលរដ្ឋទូទៅ សូមជួយគាំទ្រផលិតផលកែច្នៃរបស់ស្រុកទឹកឈូ ៕
ដោយ៖ សិលា សារិន
