(ភ្នំពេញ)៖ព្រឹត្តិការណ៍ការប្រកួតកីឡាវាយសីមិត្តភាពពាន​រង្វាន់​ខ្លាឃ្មុំទឹកកកលើកទី១ ដែលប្រព្រឹត្តិទៅរយៈពេល១ថ្ងៃ ក្រោមវត្តមាន ឯកឧត្តម គី តិច ទេសរដ្ឋមន្រ្តីទទួលបន្ទុក​បេសកម្ម​ពិសេស និង ឯកឧត្តម ឧត្តម រ័ត្ន ស្រ៊ាង មេបញ្ជា​ការរងកងរាជអាវុធហត្ថលើផ្ទៃប្រទេស និងជាមេបញ្ជាការ​កងរាជអាវុធហត្ថរាជធានីភ្នំពេញបានបញ្ចប់ទៅដោយជោគជ័យជាមួយនិងមិត្តភាពសាមគ្គីភាព។

លោក ឧកញ៉ា អ៊ឹម ភាន់ សុផល ប្រធានក្រុមកីឡាវាយសី​ខ្លាឃ្មុំ​ទឹកកក មានប្រសាសន៍ថា នេះជាការប្រកួតលើកទី១ របស់ក្រុមខ្លាឃ្មុំទឹកកកបន្ទាប់ពីដំណើរការបង្កើតក្រុមនេះឡើង ។ លោកថា ក្រុមខ្លាឃ្មុំទឹកកកនេះ បានបង្កើតឡើងដោយមាន​សមាសភាពកីឡាករចំរុះ គឺមានមន្រ្តីរាជការរបស់​រាជរដ្ឋា​ភិបាល និងវិស័យឯកជនរួមច្របាច់បញ្ចូលគ្នា ក្នុងគោល​បំណងបង្កើតជាសាមគ្គីភាព និងមិត្តភាព។

លោកឧកញ៉ា បានគូសបញ្ជាក់ទៀតថា ការប្រកួតនេះបាន​បង្កើតឡើងដោយមានកិច្ចសហការគ្នារវាងក្រុមខ្លាឃ្មុំទឹកកក និងក្លឹបវាយសីរ៉ាក់សា ដោយមានសមាភាពកីឡាករ​ទាំងពីរ​ខាងលើប្រកួតប្រជែងគ្នាដណ្តើមយកពានរង្វាន់មិត្តភាព។

លោក ឧកញ៉ា បានរំលិចទៀតថា សម្រាប់ការប្រកួត​កីឡាវាយ​សីខ្លាឃ្មុំទឹកកកលើកទី១នេះ ទិសដៅចម្បងរបស់ក្រុមទាំង​មូលគឺផ្តោតសំខាន់លើការទំនាក់ទំនងបង្កើតបានជាមិត្តភាព សាមគ្គីភាព និងរក្សានូវសុខភាព ព្រោះកីឡាជួយឱ្យសុខភាព​រឹងមាំជៀសផុតពីជំងឺផ្សេងៗ ហើយ ក៏ជាការចូលរួមបំផុសឱ្យ​យុវជន​គ្រប់វ័យមើលឃើញពីសារៈសំខាន់​នៃកីឡាវាយសី​ដែល​បានផ្តល់អត្ថប្រយោជន៍ខ្លាំងសម្រាប់សុខភាព។ជាមួយគ្នានេះផងដែរ ការប្រកួតនេះក៏ជាការចូលរួមផ្សព្វផ្សាយ​បំផុតសកម្មភាពកីឡាវាយសីឱ្យកាន់តែផុសផុលនៅទូទាំងប្រទេស ដើម្បីឱ្យយុវជនងាកមកលេងកីឡាវាយ​សីក្លាយ​ជាធនធានសក្កានុពលសម្រាប់ជាតិជាជម្រើសរបស់រាជរដ្ឋាភិបាលជ្រើសរើសយកមកហ្វឹកហាត់បំប៉នត្រៀមតំណាងជាតិចូលរួមប្រកួតលើឆាកអន្តរជាតិ។

ឯកឧត្តម ទេសរដ្ឋមន្រ្តី គី តិច បានកោតសសើរ​និងវាយ​តម្លៃខ្ពស់ ចំពោះសមាជិកក្រុមខ្លាឃ្មុំទឹកកកទាំងមូល ដែល​បាន​បង្កើតជាពានរង្វាន់នេះឡើង ព្រោះកីឡាបានចូល​រួមកសាងនូវទំនាក់ទំនងបង្កើតបានជាមិត្តភាពសាមគ្គីភាពដែលជាមូលដ្ឋានឈានទៅសាងនូវភាពសុខដំរមនាការរស់នៅដោយមានអាធ្យាស្រាយនិងយោគយល់គ្នា។

ទន្ទឹមជាមួយគ្នានោះ ឯកឧត្តម ទេសរដ្ឋមន្រ្តី បានសុំណូមពរ​ឱ្យ​ក្រុមវាយសីខ្លាឃុំទឹកកកកៀគរពង្រីក​សមាជិកចូលរួម​នៅក្នុង​ក្រុមបានចំនួនច្រើនបន្ថែមទៀត ដើម្បីក្លាយជាគំរូ​សម្រាប់​ក្មេងៗ​សិស្សនិស្សិតជំនាន់ក្រោយចាប់យកកីឡា​វាយសី​មកលេងដើម្បីសុខភាព និងអភិវឌ្ឍខ្លួនក្លាយជាកីឡាករ​មាន​​សក្កានុពលសម្រាប់ជាជម្រើសរបស់ជាតិ​នាពេលអនាគត។

ឯកឧត្តម បានសម្តែងនូវការចូលរួមអបអរសាទរចំពោះ​កីឡាករ​ឈ្នះបានជ័យលាភី ហើយចូលរួមអបអរសាទរ​កីឡាករមិនទទួលបានជ័យលាភី បន្តែឈ្នះបានសុខភាព ៕

អត្ថបទ ជីម ភារ៉ា អត្ថបទ៖ ជាវ ចន្ធូ