ប៊ែរឡាំង ៖ អាមេរិក ជប៉ុន និងកូរ៉េខាងត្បូងសន្យាបន្តការតាំងចិត្តលុបបំបាត់អាវុធនុយក្លេអ៊ែររបស់កូរ៉េខាងជើងទាំងស្រុង នេះបើយោងតាមសេចក្តីថ្លែងការណ៍រួមនៃប្រទេសសម្ព័ន្ធមិត្តទាំងបី ដែលបានចេញផ្សាយកាលពីថ្ងៃសៅរ៍សប្តាហ៍មុន។

ផ្អែកតាមសេចក្តីថ្លែងការណ៍នេះ ប្រមុខការទូតប្រទេសទាំងបីបានបញ្ជាក់ឡើងវិញនូវការប្តេជ្ញាចិត្តយ៉ាងមុតមាំចំពោះការលុបបំបាត់អាវុធនុយក្លេអ៊ែរកូរ៉េខាងជើងស្របតាមដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ហៅកាត់ (UNSC) ។

បន្ថែមលើនេះ ប្រទេសសម្ព័ន្ធមិត្តទាំងបីក៏បានសម្តែងការព្រួយបារម្ភយ៉ាងខ្លាំង និងតម្រូវការដោះស្រាយរួមគ្នា ជជុំវិញកម្មវិធីនុយក្លេអ៊ែរ និងមីស៊ីលកូរ៉េខាងជើង សកម្មភាពវាយប្រហារតាមប្រព័ន្ធអ៊ីនធឺណិត រួមទាំងការលួចលុយឌីជីថល និងការបង្កើនកិច្ចសហប្រតិបត្តិការយោធាជាមួយរុស្ស៊ី។

ជើងខ្លាំងផ្នែកការទូតទាំងបី ក៏បានព្រមានខ្លាំងៗដែរថា ពួកគេនឹងមិនអត់ឱនឱ្យចំពោះការញុះញង់ ឬការគំរាមកំហែងណាមួយចំពោះមាតុភូមិរបស់ពួកគេ ហើយបានប្តេជ្ញាថា បន្តរក្សា និងពង្រឹងទណ្ឌកម្មអន្តរជាតិប្រឆាំងនឹងកូរ៉េខាងជើង៕

ប្រភព ៖ AFP ប្រែសម្រួល ៖ ឈឹម ទីណា