ភ្នំពេញ៖នៅទីបញ្ជាការដ្ឋានមជ្ឈមណ្ឌលសកម្មភាពកំចាត់មីនកម្ពុជា(ស៊ីម៉ាក់)រាជធានីភ្នំពេញកាលពីព្រឹកឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជានិងលោក អាយូមូ តាកាហាស៊ី (Ayumu TAKAHASHI) ប្រធានក្រុមប្រឹក្សាអង្គការ On The Road បានចូលរួមពិធីចុះហត្ថលេខាលើអនុស្ស​រណៈ​យោគយល់គ្នា​លើគម្រោង​ផ្ទេរបច្ចេកវិទ្យាក្នុងការកែច្នៃសំណល់ជ័រ/លោហធាតុនៃយុទ្ធភណ្ឌសង្រ្គាមដើម្បីផលិតអនុស្សាវរីយ៍​ ។តាមរយៈអនុស្សរណៈនេះអង្គភាពស៊ីម៉ាក់​ នឹង​បង្កើតរោងជាងមួយសម្រាប់ធ្វើការកែច្នៃសំណល់ជ័រ លោហធាតុនៃ​យុទ្ធភណ្ឌ ។

លើបណ្ដាញសង្គមហ្វេសប៊ុកផ្លូវការ ឯកឧត្តម ហេង រតនា បានបញ្ជាក់ថា តាមរយៈកិច្ចព្រមព្រៀងនេះអង្គភាពស៊ីម៉ាក់​នឹង​បង្កើតរោងជាងសម្រាប់ធ្វើការកែច្នៃសំណល់ជ័រ លោហធាតុនៃយុទ្ធភណ្ឌសង្រ្គាម ដោយមានការបណ្តុះបណ្តាល​ដោយ​អ្នកជំនាញវិចិត្រករជប៉ុននៅប្រទេសជប៉ុនព្រមទាំងជួយរៀបចំសម្ភារបច្ចេកទេសសម្រាប់ផលិតនៅកម្ពុជាដោយអង្គភាពស៊ីម៉ាក់ម្ចាស់ការផលិតដោយខ្លួនឯង។ គម្រោងនេះនឹងផ្តល់ការងារដល់ជនពិការ និងចូលរួមផលិតនិងលក់​បម្រើឱ្យ​ទីផ្សារ​អនុស្សាវរីយ៍នៅសារមន្ទីរតេជោសន្តិភាព ស្ថិតនៅក្នុងខេត្តសៀមរាប​និងទីផ្សារនៅប្រទេសជប៉ុនផងដែរ។

ឯកឧត្តម ហេង រតនា បានរំលឹកទៅរកប្រវត្តិមុននឹងមានអនុស្សរណៈនេះថា កាលពីកំឡុងខែសីហា ឆ្នាំ២០២៤ លោក​ធ្លាប់បានជួបពិភាក្សា​ការងារនេះ​ជាមួយ​វិចិត្រករជប៉ុនដែលមានគំនិតកែច្នៃសារធាតុជ័រសំរាមនៅតាមសមុទ្រ រើសមក​កែច្នៃជាវត្ថុអនុស្សាវរីយ៍មានតម្លៃ នៅខេត្ត​អូគីណាវ៉ា។ អង្គភាពស៊ីម៉ាក់ក៏មានគោលបំណងកែច្នៃសំណល់ជ័រ​សំបកឬ​លោហធាតុគ្រាប់មីន/យុទ្ធភណ្ឌ​សង្គ្រាម​ឱ្យក្លាយជាវត្ថុអនុស្សាវរីយ៍ បម្រើឱ្យទីផ្សារអនុស្សាវរីយ៍នៅសារមន្ទីរតេជោសន្តិភាព។ ជាពិសេសមាន​មហិច្ឆតា​ក្នុងការ​ប្រែក្លាយពីឧបករណ៍សម្លាប់មនុស្សសំណល់សង្គ្រាម ទៅជាវត្ថុដែលអាចបម្រើមនុស្ស​ដោយសន្តិភាព។

អគ្គនាយកស៊ីម៉ាក់បានបញ្ជាក់ថា តាមរយៈគម្រោងផែនការនេះ អង្គភាពស៊ីម៉ាក់អាចផ្តល់ការងារដល់ជនពិការ​ដោយសារមីន មានលទ្ធភាពបម្រើការក្នុង​សិប្បកម្ម​ផលិតវត្ថុអនុស្សាវរីយ៍នេះ​ផងនិងផ្តល់សេវាលក់ដូរនៅសារមន្ទីរតេជោសន្តិភាពផងដែរ៕
ដោយ៖មុនី