(ភ្នំពេញ)៖ ឯកឧត្តម វ៉ាន់ឡុលវ៉ាណា បាវីតលុង (H.E Vanlalvawna Bawitlung) ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋឥណ្ឌា ប្រចាំ កម្ពុជាបានស្នើសុំឲ្យអាជ្ញាធររាជធានីភ្នំពេញ អនុញ្ញាតក្នុងការរៀបចំទិវាស្តង់ម្ហូបអាហារមួយកន្លែងនៅរាជធានីភ្នំពេញ។ ទិវានេះនឹងមានការសហការចូលរួម ពីបណ្ដាប្រទេសជាច្រើន មានទាំងប្រទេសថៃ ឡាវ កម្ពុជា វៀតណាម និង មីយ៉ាម៉ា ដោយគ្រោងនឹងធ្វើឡើងនៅថ្ងៃទី២២ មិនាឆ្នាំ២០២៥ ខាងមុខនេះ ។

ការស្នើបែបនេះរបស់ ឯកឧត្តម វ៉ាន់ឡុលវ៉ាណា បាវីតលុង បានធ្វើឡើងនារសៀលថ្ងៃទី០៤ ខែមិនានេះ ខណៈឯកឧត្តម ចូលជួបសម្តែងការគួរសមជាមួយ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ នៅសាលារាជធានីភ្នំពេញ។

ឯកឧត្តម វ៉ាន់ឡុលវ៉ាណា បាវីតលុង លើកឡើងថា ប្រជាពលរដ្ឋ​ជនជាតិឥណ្ឌា បានមករស់នៅធ្វើការ រកស៊ី នៅក្នុងប្រទេសក​ម្ពុជា មានប្រមាណជាង ៥០០០នាក់ ហើយពួកគាត់ភាគច្រើន​រស់​នៅនិងរកស៊ីនៅរាជធានីភ្នំពេញ។

ឯកឧត្ដម ពិតជាថ្លែង នូវការអរគុណចំពោះអាជ្ញាធររាជធានី​ភ្នំពេញ​ដែលបានរក្សាសន្តិសុខសុវត្ថិភាពជូនបងប្អូន​ប្រជា​ពលរដ្ឋឥណ្ឌាដែលរស់នៅរាជធានីភ្នំពេញ ក៏ដូចជាការថែរក្សា​សន្តិសុខសុវត្ថិភាពជូនស្ថានទូតឥណ្ឌាប្រចាំនៅកម្ពុជាបានល្អប្រសើរ។

ជុំវិញការស្នើសុំរបស់ ឯកឧត្តម វ៉ាន់ឡុលវ៉ាណា បាវីតលុង លើការ​ធ្វើទិវាម្ហូបអាហារនៅរាជធានីភ្នំពេញ ឯកឧត្ដម ឃួង ស្រេង បានឯកភាព ជាមួយនិងការអនុញ្ញាតឲ្យមាន​ការរៀប​ចំពិធីនេះ នៅមុខវត្តឧណ្ណាលោម ស្របពេលដែលអាជ្ញាធរ​រាជធានីភ្នំពេញបាននិងកំពុងបង្កើតឱ្យមានផ្លូវថ្មើរជើង Walk Street នៅទីតាំងខាងលើនេះដែរ ដែលបង្កលក្ខណៈងាយ​ស្រួលទៅដល់ការរៀបចំពិធីម្ហូបអាហារខាងលើដំណើរការទៅបានស្រួល។

ឯកឧត្ដមបញ្ជាក់ផងដែរថា ៖ រដ្ឋបាលរាជធានីភ្នំពេញក្រោយ​ពីបង្កើត​ឲ្យមានផ្លូវថ្មើរជើង Walk Streetបានធ្វើឲ្យកំណើនប្រ​ជា​ពលរដ្ឋ​ក៏ដូចភ្ញៀវទេសចរណ៍កើនឡើងពីមួយសប្តាហ៍​ទៅមួយសប្តាហ៍ ដោយអាចទទួលបានភ្ញៀវជាតិ អន្តរជាតិ ប្រមាណ ៤ទៅ៥ម៉ឺននាក់ក្នុងមួយថ្ងៃ។ ឯកឧត្ដមសង្ឃឹមថា នៅពេលស្ថានទូតរៀបចំឲ្យមានការទិវាម្ហូបអាហារនៅទីតាំងនេះ វានឹងធ្វើឲ្យកំណើនភ្ញៀវទេសចរណ៍កើនឡើងថែមទៀត ៕

ដោយ ៖ ហេង សម្បត្តិ+ថេត វិចិត្រ