បរទេស ៖ រដ្ឋមន្ត្រីប្រទេសកូឡុំប៊ី បាននិយាយថា ការដឹកជញ្ជូនជនចំណាកស្រុក ឆ្លងកាត់ព្រៃ Darien ចូលទៅសហរដ្ឋអាមេរិក បានធ្លាក់ចុះយ៉ាងគំហុក ខណៈដែលប្រទេសខ្លួន កំពុងសម្របសម្រួលបន្ថែម ជាមួយប្រទេសក្បែរខាង។

រដ្ឋមន្ត្រីការបរទេសកូឡុំប៊ី លោកស្រី Laura Sarabia បាននិយាយថា ការធ្វើចំណាកស្រុក ទៅកាន់សហរដ្ឋអាមេរិក តាមរយៈតំបន់ព្រៃ Darien ដ៏គ្រោះថ្នាក់ នៅតាមព្រំដែនកូឡុំប៊ី-ប៉ាណាម៉ា បានធ្លាក់ចុះ ៦០%។

លោកស្រីបន្តថា រដ្ឋាភិបាលកូឡុំប៊ី ក៏បានគូសបញ្ជាក់ ពីតម្រូវការសម្រាប់ «ផែនការសម្របសម្រួល» ជាមួយប្រទេសជិតខាង ដូចជា ប៉ាណាម៉ា និងវ៉េណេស៊ុយអេឡា ដើម្បីគ្រប់គ្រងលំហូរជនចំណាកស្រុក។

គោលនយោបាយអន្តោប្រវេសន៍ថ្មី របស់ប្រធានាធិបតីអាមេរិក Donald Trump កំពុងជះឥទ្ធិពល លើចរន្ដជនចំណាកស្រុក ដែលបង្កឱ្យមានបាតុភូត ចំណាកស្រុក ដ៏បញ្ច្រាស ខណៈមនុស្សរាប់ពាន់នាក់ ព្យាយាមត្រឡប់ ទៅប្រទេសកំណើត របស់ពួកគេវិញ៕

ប្រភពពី AFP ប្រែសម្រួល៖ សារ៉ាត