វ៉ាស៊ីនតោន ៖ អង្គការសុខភាពពិភពលោក (WHO) ប្រកាសថា ក្នុងពេលឆាប់ៗនេះ ប្រទេសចំនួន ៨ លើពិភពលោក អាចនឹងប្រឈមមុខនូវកង្វះការផ្គត់ផ្គង់ថ្នាំព្យាបាលជំងឺអេដស៍ (HIV) បន្ទាប់ពីរដ្ឋបាលលោកប្រធានាធិបតី Donald Trump បានសម្រេចចិត្តផ្អាកជំនួយបរទេសរបស់សហរដ្ឋអាមេរិក។

ទីភ្នាក់ងារសុខភាពពិភពលោកមួយនេះនិយាយថា ប្រទេសហៃទី កេនយ៉ា ឡេសូថូ ស៊ូដង់ខាងត្បូង ប៊ួគីណាហ្វាសូ ម៉ាលី នីហ្សេរីយ៉ា និងអ៊ុយក្រែន អាចនឹងអស់ថ្នាំប្រឆាំងមេរោគអេដស៍ ហៅកាត់ (ARV) ដើម្បីព្យាបាលអ្នកផ្ទុកជំងឺអេដស៍ក្នុងរយៈពេលប៉ុន្មានខែខាងមុខទៀតនេះ។

អគ្គនាយកអង្គការសុខភាពពិភពលោក លោក Tedros Adhanom Ghebreyesus បាននិយាយនៅក្នុងសន្និសីទកាសែតមួយថា ការបង្អាក់ដល់កម្មវិធីបង្ការជំងឺអេដស៍ មិនអាចធ្វើឲ្យមានវឌ្ឍនភាពក្នុងរយៈពេល ២០ឆ្នាំនោះទេ។

មេធំ WHO រូបនេះបានសង្កត់ធ្ងន់ថា បញ្ហានេះអាចនាំឱ្យមានករណីផ្ទុកមេរោគអេដស៍កើនឡើងបន្ថែមជាង ១០លាននាក់ ហើយអ្នកស្លាប់ទាក់ទងនឹងមេរោគអេដស៍ ៣លាននាក់ ខណៈតួលេខនេះកើនឡើងជាងបីដងបើធៀបចំនួនអ្នកស្លាប់កាលពីឆ្នាំមុន។

កិច្ចខិតខំប្រឹងប្រែងដោះស្រាយមេរោគអេដស៍ ជំងឺអេដស៍ ជំងឺគ្រុនស្វិតដៃជើង ជំងឺគ្រុនចាញ់ និងជំងឺរបេងបានរងផលប៉ះពាល់ខ្លាំង ចាប់តាំងពីលោក Donald Trump បង្កកជំនួយបរទេសរបស់សហរដ្ឋអាមេរិក នៅថ្ងៃដំបូងបន្ទាប់ពីលោកចូលកាន់តំណែងក្នុងខែមករា។

បទបញ្ជាប្រតិបត្តិរបស់លោក Trump បានផ្អាកជំនួយបរទេសសម្រាប់រយៈពេល ៩០ថ្ងៃដំបូង ស្របតាមគោលនយោបាយការបរទេស “America First” របស់គាត់។

វិធានការនេះបានជះឥទ្ធិពលយ៉ាងខ្លាំងដល់កម្មវិធីសុខភាពជុំវិញពិភពលោក ក្នុងនោះរួមទាំងការនាំចេញសម្ភារៈពេទ្យសំខាន់ៗ និងថ្នាំព្យាបាលមេរោគអេដស៍។ ភាគច្រើននៃកម្មវិធីរបស់ទីភ្នាក់ងារអាមេរិក សម្រាប់ការអភិវឌ្ឍន៍អន្តរជាតិ ហៅកាត់ (USAID) ត្រូវបានបញ្ចប់ចាប់តាំងពីពេលនោះមក៕

ប្រភព ៖ BBC ប្រែសម្រួល ៖ ឈឹម ទីណា