បរទេស៖ លោក Jeffrey Goldberg និពន្ធនាយក របស់ទស្សវដ្តី The Atlantic ដែលត្រូវបានគេ add ចូលក្រុបឆាត របស់មន្ត្រីជាន់ខ្ពស់អាមេរិក បានសារភាព ប្រាប់ទីភ្នាក់ងារព័ត៌មាន BBC ថា លោកត្រូវបានមន្ត្រី ក្រោមរដ្ឋបាលលោក Trump អញ្ជើញឲ្យចូលទៅស្តាប់ក្នុងក្រុប ប៉ុន្តែ ចុងក្រោយ បែរជាត្រូវបានវាយប្រហារ ទៅវិញ។

បើតាមបទសម្ភាសន៍ ដែលត្រូវបានចេញផ្សាយ កាលពីថ្ងៃពុធ លោក Goldberg បានរៀបរាប់ថា ដំបូងឡើយ លោកទទួលបានសារ នៅលើទូរស័ព្ទ តាមរយៈកម្មវិធី Signal messaging app ខណៈដែលបណ្តាញទំនាក់ទំនងនេះ ពេញនិយម ក្នុងចំណោមអ្នកសារព័ត៌មាន និងមន្ត្រីរដ្ឋាភិបាល។

លោកបន្តថា មានគណនីមួយ ឈ្មោះ Waltz ដែលគេស្គាល់ថា ជាមន្ត្រីសន្តិសុខកំពូលរបស់លោក Trump បានផ្ញើសារទៅលោក ដែលក្រោយមក លោកសន្មត់ថា «ជាការបោកបញ្ឆោត» ព្រោះចូលក្រុបរួច ទើបដឹងថា លោកកំពុងស្ថិតក្នុងក្រុមជជែក ជាមួយថ្នាក់ដឹកនាំសន្តិសុខជាតិ របស់សហរដ្ឋអាមេរិក។

ស្រដៀងនឹងការលើកឡើងនេះដែរ លោក Mike Waltz ទីប្រឹក្សាសន្តិសុខជាតិអាមេរិក បានទទួលខុសត្រូវចំពោះការបញ្ចូល លោក Goldberg ទៅក្នុងក្រុបឆាតអចេតនា ដោយលើកឡើងថា តាមពិត លោកចង់អញ្ជើញនរណាម្នាក់ផ្សេងទៀតទេ តែបែរជា ច្រលំបញ្ជូលអ្នកសារព័ត៌មានរូបនេះ ទៅវិញ។

ស្របពេលដែល លោក Jeffrey Goldberg បន្តរៀបរាប់ អំពីរបៀបដែលមន្ត្រីជាន់ខ្ពស់អាមេរិកមួយចំនួនបានចែករំលែកព័ត៌មានរសើប ជុំវិញការផែនការសង្គ្រាមរបស់អាមេរិកជាមួយពួកឧទ្ទាមហ៊ូធី សេតវិមានចេញមុខប្រតិកម្ម យ៉ាងខឹងសម្បារ ពោលគឺ បន្ទាប់ពីទស្សនាវដ្ដី The Atlantic បានចុះផ្សាយសាររបស់ក្រុមមន្ត្រីសន្តិសុខជាតិ នៅក្នុងការជជែកជាក្រុម Signal ទាំងស្រុង។ រដ្ឋបាលលោក Trump បានចោទប្រកាន់ លោក Goldberg ថា និយាយកុហក និងលួចចែករំលែកព័ត៌មានខុសឆ្គង។ ប្រធានាធិបតី Donald Trump បានចាត់ទុកថា ការប្រមាញ់ព័ត៌មានដ៏អាក្រក់បំផុត ហើយបានប្រកាសការបោះពុម្ពផ្សាយ ថ្មីៗនេះ ថា ជាបរាជ័យរបស់ទស្សនាវដ្តី The Atlantic។

ប៉ុន្តែ លោក អះអាងប្រាប់ BBC ថា រដ្ឋបាលលោក Trump ចង់គេសវេស ពីការមានកំហុស ធ្វើឲ្យបែកធ្លាយព័ត៌មានរស៊ើប តាមរយៈប្រើយុទ្ធសាស្ត្រ ចោទប្រកាន់ ទាំងបំពាន មកលើរូបលោក៕

ប្រភពពី BBC ប្រែសម្រួល៖ សារ៉ាត