បរទេស៖ ប្រធានាធិបតី នៃ ប្រទេសប៉ាណាម៉ា លោក Mulino បាននិយាយថា ប៉ាណាម៉ានឹងលែងឲ្យមានមូលដ្ឋានទ័ពអាមេរិក ទៀតហើយ។

ប្រធានាធិបតីប៉ាណាម៉ា លោក Jose Raul Mulino និយាយថា ប្រទេសរបស់លោក នឹងមិនវិលត្រឡប់ទៅរកការមានមូលដ្ឋានទ័ពអាមេរិកឡើងវិញឡើយ ជាការឆ្លើយតប ទៅនឹងរបាយការណ៍ ដែលជំរុញដោយការគំរាមកំហែង របស់លោក Donald Trump ក្នុងការដណ្តើមការគ្រប់គ្រងព្រែកជីក អន្តរមហាសមុទ្រ មួយនេះ ឡើងវិញ។

លោក Mulino បាននិយាយ ក្នុងសន្និសីទសារព័ត៌មាន កាលពីថ្ងៃព្រហស្បតិ៍ ថា «ជឿឬមិនជឿ វានឹងមិនមានមូលដ្ឋានយោធា នៃមហាអំណាចណាមួយឡើយ មិនថា សហរដ្ឋអាមេរិក ឬ ប្រទេសណាមួយ នៅក្នុងពិភពលោក» ។

លោក Mulino បានទទូចថា អធិបតេយ្យភាព របស់ប៉ាណាម៉ានៅតែមិនអាចចរចារបាន ដែលចាក់ឫសក្នុងប្រវត្តិសាស្ត្រ នៃការទប់ទល់នឹងការគ្រប់គ្រងរបស់បរទេស។ ព្រែកជីក ប៉ាណាម៉ា ដែលសាងសង់ដោយសហរដ្ឋអាមេរិក ពីឆ្នាំ១៩០៤ ដល់ ឆ្នាំ១៩១៤ ក្នុងតម្លៃ ៣៧៥លានដុល្លារ ឬស្មើនឹង៨.៦ពាន់លានដុល្លារអាមេរិកបច្ចុប្បន្ន កំពុងគ្រប់គ្រង ៥% នៃពាណិជ្ជកម្មពិភពលោក។

ប៉ាណាម៉ាបានគ្រប់គ្រងព្រែកជីកនេះ ទាំងស្រុង នៅឆ្នាំ១៩៩៩ បន្ទាប់ពីការគ្រប់គ្រង របស់សហរដ្ឋអាមេរិក ជាច្រើនទសវត្សរ៍ រួមទាំង មូលដ្ឋានចំនួន១៤ ដែលមានកងទ័ពច្រើនខ្លាំងបំផុត ពោលគឺរហូតដល់ ៦៥,០០០នាក់៕

ប្រភពពី AFP ប្រែសម្រួល៖ សារ៉ាត