(ខេត្តព្រះវិហារ)៖ ឧត្តមសេនីយ៍ឯក ស្រី ឌឹក មេបញ្ជាការរង កងទ័ពជើងគោក មេបញ្ជាការកងពលធំអន្តរាគមន៍លេខ៣ បានធ្វើការ ក្រើនរំលឹក ទៅកាន់នាយទាហាន នាយទាហាន​រង និងថ្នាក់ដឹកនាំ គ្រប់បណ្ដាអង្គភាពចំណុះ កងពលតូច​អន្តរា​គមន៍​លេខ៨ ត្រូវយកចិត្តទុកដាក់អំពីតួនាទីភារកិច្ច​ចំពោះមុខ អនុវត្តឱ្យបានខ្ជាប់ខ្ជួន នូវបទវិន័យ លក្ខន្តិកៈ​ទូទៅ របស់កងយោធពលខេមរភូមិន្ទ និងក្តាប់ឲ្យបាន​រាល់​សភាពការណ៍ដែលកើតមានឡើង ក្នុងភូមិសាស្រ្តទទួល​ខុស​ត្រូវ របស់អង្គភាពខ្លួន ពិសេសចាត់តាំងកម្លាំងបណ្តា​កង​ល្បាត​ទាំងអស់ ត្រូវបង្កើនការដើរល្បាត ឲ្យបានជាប់ជាប្រចាំ​ក្ដាប់សភាពការណ៍ ស្រាវជ្រាវព័ត៌មាន តាមខ្សែបន្ទាត់ព្រំដែន អនុវត្តតាមបទបញ្ជាថ្នាក់លើ ក៏ដូចជាយុទ្ធសាស្ត្រ របស់រាជ​រដ្ឋាភិបាល ក្នុងការកសាងព្រំដែន ជាព្រំដែនសន្តិភាព មិត្ត​ភាព កិច្ចសហប្រតិបត្តិការល្អ និងការអភិវឌ្ឍន៍។

ប្រសាសន៍ក្រើនរំលឹក របស់ឧត្តមសេនីយ៍ឯក សី្រ ឌឹក នៅ​ក្នុង​កិច្ចប្រជុំបូកសរុបលទ្ធផលការងារយោធា ប្រចាំខែមីនា និងដាក់ចេញទិសដៅបន្តការងារយោធា ខែមេសា ឆ្នាំ២០២៥ និងប្រកាសតែងតាំងផ្លាស់ប្ដូរមុខតំណែង ជូននាយទាហាន អង្គភាពកងពលតូចអន្តរាគមន៍លេខ៨ នារសៀលថ្ងៃទី១ ខែមេសា ឆ្នាំ២០២៥ នៅសាលប្រជុំទី​បញ្ជាការ​កងពលតូចអន្តរាគមន៍លេខ៨។

ឧត្តមសេនីយ៍ឯក ស្រី ឌឹក មេបញ្ជាការរង កងទ័ពជើងគោក មេបញ្ជាការកងពលធំអន្តរាគមន៍លេខ៣ បានបញ្ជាក់ថា ក្នុងនាមជាកងកម្លាំង ត្រូវតែមានភក្ដីភាពស្មោះត្រង់ចំពោះ ជាតិ សាសនា ព្រះមហាក្សត្រ ការពារឱ្យបានរដ្ឋធម្មនុញ្ញ រាជរដ្ឋាភិបាលស្របច្បាប់ ជាកម្លាំងដ៏រឹងមាំរបស់រាជ​រដ្ឋាភិបាល ត្រូវហ៊ានលះបង់គ្រប់បែបយ៉ាង ដើម្បីការពារ បូរណភាពទឹកដី មានឆន្ទៈស្មារតីទទួលខុសត្រូវខ្ពស់ ទប់ស្កាត់រាល់សកម្មភាពនៃការញុះញង់ របស់ក្រុម​ប្រឆាំងជ្រុលនិយម ដែលមានបំណងធ្វើឱ្យកម្ពុជា​មានភាពអសកម្ម លើការអភិវឌ្ឍន៍ប្រទេសជាតិ។

ជាមួយគ្នានោះ ឯកឧត្តម ក៏បានសំដែង នូវការកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងយកចិត្តទុកដាក់​អំពី​តួនាទី​ភារកិច្ចចំពោះមុខ របស់ថ្នាក់ដឹកនាំគ្រប់ជាន់ថ្នាក់ នាយ និងពលទាហានទាំងអស់ នៃអង្គភាពកងពលតូច​អន្តរាគម​ន៍​លេខ៨ និងវរសេនាតូចចំណុះ បាននិងកំពុង​អនុវត្តបានយ៉ាងខ្ជាប់ខ្ជួនក្នុងភូមិសាស្រ្តទទួលខុសត្រូវរបស់់អង្គភាពខ្លួន។ ពង្រឹងកាងារកសាងលើគ្រប់វិស័យ ពិសេសជំរុំ​ជម្រកស្នាក់នៅរបស់យោធិន និងរក្សាបានសាមគ្គីភាពផ្ទៃ​ក្នុងល្អ មានវិន័យថ្លៃថ្នូរ ហានលះបង់គ្រប់បែបយ៉ាង ដើម្បី​ការពារថែរក្សា នូវ សន្តិភាព អធិបតេយ្យភាព និងបូរណភា​ពទឹកដី៕

សួន លីណា