កូវីដ១៩៖ វៀតណាមផ្តើមចាក់វ៉ាក់សាំងផលិតខ្លួនឯង ដំណាក់កាលទី២
ប្រទេសវៀតណាមបានចាប់ផ្តើមការចាក់វ៉ាក់សាំងបង្ការជំងឺកូវីដ១៩ ផលិតដោយខ្លួនឯង ដំណាក់កាលទី២ ដោយមានអ្នកស្ម័គ្រចិត្តចាក់៧៣នាក់ កាលពីថ្ងៃសុក្រ ទី២៦ កុម្ភៈ ២០២១ម្សិលមិញ។
ទីភ្នាក់ងារសារព័ត៌មាន VNexpress បានបញ្ជាក់ថា ក្នុងចំណោមនេះ មាន៣៥នាក់មកពីក្រុងហាណូយ ៣៨នាក់មកពីខេត្ត ឡុងអាន ដោយបែងចែកជា៤ក្រុម សម្រាប់ការចាក់វ៉ាក់សាំង Nanocovax ដំណាក់កាលទី២នេះ ជាវ៉ាក់សាំងផលិតដោយវិទ្យាស្ថាន Nanogen Pharmaceutical Biotechnology JSC ។ ក្រោយការចាក់៦០នាទី បន្ទាប់ពីតាមដានរួចរាល់ អ្នកចាក់រួចត្រូវបានអនុញ្ញាតឲ្យទៅផ្ទះវិញ ក្រោមការត្រួតពិនិត្យបន្ថែមទៀតពីអាជ្ញាធរ។
ឧបនាយករដ្ឋមន្ត្រីវៀតណាម Vu Duc Dam ដែលបានចុះទៅពិនិត្យទីតាំងចាក់វ៉ាក់សាំង បាននិយាយថា វៀតណាមកំពុងប្រឹងប្រែងខ្លាំងបំផុត ក្នុងការជំរុញដំណើរការចាក់វ៉ាក់សាំងបង្ការជំងឺកូវីដ១៩។
មនុស្សសរុប៥៦០នាក់ នៅក្រុងនិងខេត្តទាំងពីរនេះនឹងត្រូវចាក់ជាលើកទី២នេះ ហើយកាលពីចាក់លើកដំបូង នាខែធ្នូ ២០២០ មានអ្នកស្ម័គ្រចិត្តចាក់ប្រមាណ៦០នាក់ បង្ហាញថា វ៉ាក់សាំងនេះមានសុវត្ថិភាព មិនប៉ះពាល់ធ្ងន់ធ្ងរទេ នេះបើតាមមន្ត្រីជំនាញរបស់វៀតណាម។ ការចាក់វ៉ាក់សាំងផលិតក្នុងប្រទេស ដំណាក់កាលទី២នេះ ធ្វើឡើងក៏ស្របពេលដែលវ៉ាក់សាំង AstraZeneca ដែលវៀតណាមបញ្ជាទិញពីអង់គ្លេស ឈុតដំបូង ទើបត្រូវបានបញ្ជូនមកដល់វៀតណាម ប៉ុន្មានថ្ងៃមុនេះដែរ៕