ជប៉ុនបង្កើតរ៉ូបូតថ្មី Gitai ធ្វើកិច្ចការជំនួសកម្លាំងមនុស្សនៅទីអវកាស
បច្ចេកវិទ្យា៖ ថ្មីៗនេះក្រុមហ៊ុនបច្ចេកវិទ្យាមួយរបស់ប្រទេសជប៉ុនប្រកាសថា ខ្លួនទទួលបានជោគជ័យក្នុងការបង្កើតបានរ៉ូបូតថ្មីមួយដែលមានសមត្ថភាពធ្វើកិច្ចការមួយចំនួនជំនួសឱ្យមនុស្សនៅក្នុងលំហអាកាសបាន។ រ៉ូបូតនេះមានឈ្មោះថា Gitai អាចជួសជុលផ្កាយរណបដែលកំពុងធ្វើដំណើរលើគន្លងវិថី ផ្លាស់ប្តូរថ្ម និងដោះដូរឧបករណ៍បែកបាក់មួយចំនួនបានដោយងាយស្រួល។
បច្ចុប្បន្នផ្កាយរណបដែលកំពុងមានដំណើរការជាប្រចាំនៅលើលំហអាវកាស មានចំនួនប្រមាណជា 1,500 គ្រឿង ហើយភាគច្រើនកំពុងប្រឈមមុខទៅនឹងគ្រោះថ្នាក់ដែលបណ្តាលមកពីកំទេចកំទីក្នុងលំហអាកាស ដែលកើតចេញពីផ្កាយរណបចាស់ៗ។ គេជឿជាក់ថាផ្កាយរណបនេះនឹងអាចបន្តជីវិតរបស់ខ្លួនយ៉ាងហោចណាស់ច្រើនទសវត្សទៀត ព្រមទាំងកាត់បន្ថយវត្តមានអវកាសយានិកទៅធ្វើការងារលើអាវកាសទាំងប្រថុយប្រថានខ្លាំង។
![](https://asset.ams.com.kh/central/media/2021/03/photo_2021-03-30_09-48-59-1024x682.jpg)
ឆ្នាំនេះក្រុមហ៊ុន Gitai ក៏មានផែនការដាក់ពង្រាយរ៉ូបូតរបស់ខ្លួនទៅកាន់ស្ថានីយអវកាសអន្តរជាតិ។ លើសពីនេះក៏មានផែនការអភិវឌ្ឍន៍រ៉ូបូតដោយបំពាក់បច្ចេកវិទ្យាអាចទទួលខុសត្រូវលើកិច្ចការពិសោធនិងជួសជុលឧបករណ៍ផ្សេងទៀត សម្រួលការងាររបស់មនុស្សឱ្យកាន់តែល្អប្រសើរឡើង។
កាលពីដើមខែកន្លងមកនេះ Gitai ទើបតែប្រកាសទទួលបានប្រាក់វិនិយោគបន្ថែមប្រមាណជា 17.1 លានដុល្លារដើម្បីអាចធ្វើយ៉ាងណាចាប់ផ្តើមបេសកកម្មដ៏ធំមួយរបស់ខ្លួននៅក្នុងឆ្នាំ 2023 ខាងមុខ។ តាមការបញ្ជាក់របស់លោក Sho Nakanose ប្រធានប្រតិបត្តិរបស់ក្រុមហ៊ុនបានឱ្យដឹងថា Gitai កំពុងដំណើរការល្អនៅក្នុងទីផ្សារប្រទេសជប៉ុន និងមានផែនការពង្រីកខ្លួនទៅកាន់ទីផ្សារសហរដ្ឋអាមេរិកផងដែរ៕