បរទេស ៖ អស់រយៈពេល 8 ខែមកហើយដែលក្រុមហ៊ុនបច្ចេកវិទ្យាផលិតស្មាតហ្វូនដ៏ល្បី Huawei ទទួលរងនូវទណ្ឌកម្មយ៉ាងចាស់ដៃពីសំណាក់រដ្ឋាភិបាល​អាមេរិក ដែលជាឧបសគ្គចម្បងក្នុងការអភិវឌ្ឍខ្លួនក្លាយជាកំពូលក្រុមហ៊ុនផលិតស្មាតហ្វូនលើពិភពលោក ហើយ​ជាលទ្ធផលរហូតមកដល់ពេលនេះសូម្បី​ចំណាត់​ថ្នាក់ទី៣ក៏គ្មានឈ្មោះផងនោះ។

បច្ចុប្បន្នភាព ៖ តើ Huawei បច្ចុប្បន្នធ្លាក់ទៅដល់កម្រិតណា?

កាលពីថ្ងៃពុធម្សិលមិញនេះក្រុមហ៊ុន Huawei បានប្រកាសថាអាជីវកម្មរបស់ខ្លួនពិតជាបានទទួលរងឥទ្ធិពលអាក្រក់ខ្លាំងមែនទែនទណ្ឌកម្មរបស់អាមេរិក ហើយ​វា​នឹង​បន្ត​ប៉ះពាល់ដល់កំណើនលក់របស់ខ្លួនបន្ថែមទៀត ពីព្រោះក្រុមហ៊ុននៅពេលនេះគឺមិនមានសិទ្ធិក្នុងការផលិតឧបករណ៍ និងផ្នែកសំខាន់ៗផ្សេងទៀតនៃស្មាត​ហ្វូនទៀតនោះឡើយ។

លោក Ken Hu ប្រធានគ្រប់គ្រងរបស់ Huawei បានថ្លែងនៅក្នុងសន្និសីទកាសែតមួយនៅក្នុងទីក្រុង Shenzhen ថា ដោយសារតែទណ្ឌកម្មដែលមានភាព​អយុត្តិធម៌របស់អាមេរិក អាជីវកម្មលក់ស្មាតហ្វូនរបស់ក្រុមហ៊ុនបានទទួលរងភាពបរាជ័យជាបន្តបន្ទាប់។ ទោះបីជាយ៉ាងណាក្តីក្រុមហ៊ុននេះមិនបានធ្វើការបញ្ជាក់​លម្អិតអំពីទំហំនៃការខាតបង់ប្រាក់ចំណូលរបស់ខ្លួនដោយសារបញ្ហានេះនោះទេកាលពីឆ្នាំកន្លតទៅ ប៉ុន្តែអ្វីដែលគ្រប់គ្នាអាចមើលឃើញនោះគឺថា Huawei បាន​ធ្លាក់​ចេញពីតំណែងក្នុងនាមជាក្រុមហ៊ុននាំមុខគេ នៅក្នុងទីផ្សារប្រទេសចិន។ ប៉ុន្តែអ្វីដែលកំពុងជួយដល់ប្រតិបត្តិការអាជីវកម្មរបស់ក្រុមហ៊ុននៅពេលនេះគឺកា​រ​ផលិត​អេឡិចត្រូនិកប្រើប្រាស់នៅក្នុងផ្ទះដូចជាកំព្យូទ័រយួរដៃ ថេប្លេត និងឧបករណ៍បច្ចេកវិទ្យាផ្សេងទៀតជាដើម ដែលក្នុងនោះតួលេខរបស់វាកាលពីឆ្នាំ​ទៅគឺបាន​លោត​ឡើងរហូតទៅដល់ 65 ភាគរយធៀបទៅនឹងឆ្នាំ2019 ។

ជាលទ្ធផល វាបានធ្វើឲ្យតួលេខរបស់ប្រចាំឆ្នាំរបស់ខ្លួនទទួលបានផលប្រមាណជា 136 ពាន់លានដុល្លារកាលពីឆ្នាំ2020 ហើយប្រាក់ចំណេញសុទ្ធគឺមាន 9.9 ពាន់លានដុល្លារ ប៉ុន្តែបើគិតជាអត្រាកើនឡើងវិញ ប្រាក់ចំណេញរបស់ Huawei បានត្រឹមតែ 3.2 ភាគរយ ដែលជាតួលេខខ្សោយបំផុតមិនធ្លាប់មាន​ឡើយ​ក្នុង​រយៈពេលប៉ុន្មានឆ្នាំចុងក្រោយនេះ ទោះបីជាអត្រាប្រាក់ចំណេញសុទ្ធមានការកើនឡើង3.8 ភាគរយក៏ដោយ។ លោក Hu បានបន្តដែរថា ក្នុងពេលដែលស្ថានភាពមិនមានភាពច្បាស់លាស់បែបនេះ លោក និងក្រុមហ៊ុនគឺមិនអាចធ្វើការព្យាករណ៍ទុកជា​មុនទៅលើ​អាជីវកម្ម​ស្មាតហ្វូនរបស់ខ្លួនបានឡើយខណៈដែលបច្ចុប្បន្ន Oppo និង Xiaomi បានប្រមូលយកចំណែកទីផ្សាររបស់ខ្លួនទាំងនៅក្នុងប្រទេសចិន និងឆក់យកអតិថិជន​ដែល​ជាជនជាតិចិននៅក្រៅប្រទេសរួចទៅហើយនោះ៕