ប្រតិបត្តិការបង្រ្កាបនេះបានធ្វើឡើងកាលពីវេលាយប់ថ្ងៃទី២៤ ខែវិច្ឆិកា ឆ្នាំ២០២១ នៅចំណុចកោះល្ង ឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង។

យោងតាមមន្ត្រីសមត្ថកិច្ចការពារព្រំដែនបានឱ្យដឹងថា ក្នុងពេលកម្លាំងនគរបាលការពារព្រំដែន​កំពុងចុះល្បាត​តាមដងទន្លេ ក៏ប្រទះឃើញទូកកាណូតមួយគ្រឿងបើកពីកោះស្តាំ ស្រុកមឿងខូង ប្រទេសឡាវ ឆ្លងកាត់ចូកទឹកដីឃុំព្រះរំកិល ស្រុកបុរីអូរស្វាយសែនជ័យ។ នៅលើទូកនោះ ដឹកសុទ្ធតែការ៉ុងជាច្រើន។

ដោយសង្ស័យជារបស់គេចពន្ធ កម្លាំងនគរបាលក៏បានដេញតាមឱ្យឈប់ដើម្បីត្រួតពិនិត្យ។ រហូតដល់ចំណុច​កោះល្ង ភូមិសាស្ត្រឃុំព្រះរំកិល ស្រុកបុរីអូរស្វាយសែនជ័យ ជនល្មើសបានបើកកាណូតរត់ឡើងគោក ហើយនាំ​គ្នារត់គេចខ្លួនបាត់ស្រមោល។ កម្លាំងនគរបាលបាលក៏បានឆែកក្នុងការ៉ុងនោះ ក៏ស្រាប់តែ​ប្រទះឃើញសុទ្ធ​តែជា​ថ្នាំញៀនទាំងអស់។

ប្រភពដដែលបានបន្តថា សមត្ថកិច្ចបានពិនិត្យឃើញមានគ្រឿងញៀនចំនួន១៧០ដុំ ស្មើនឹងប្រហែល១៧០​គីឡូក្រាម។មិនមានសេចក្តីរាយការណ៍ថាតើគ្រឿងញៀនទាំងនោះជាប្រភេទគ្រឿងញៀនអ្វីនោះទេ។

បច្ចុប្បន្នសមត្ថកិច្ច បានបញ្ជូនគ្រឿងញៀនទាំងនោះទៅកាន់ស្នងការដ្ឋាននគរបាលខេត្តស្ទឹងត្រែងដើម្បីចាត់​ការបន្ត​តាមនីតិវិធីច្បាប់៕