មនុស្សជំនិតលោក កឹម សុខា វ៉ៃបក៖ សម រង្ស៊ី ភ័យរហូតលែងឱ្យឆ្កែកាចបកខាំលោក កឹម សុខា
ភ្នំពេញៈ លោក មុត ចន្ថា មនុស្សជំនិតលោក កឹម សុខា បានឆ្លើយតបទៅមេឧទ្ទាមក្រៅច្បាប់ថា ស្របពេលជាមួយគ្នាលោក សម រង្ស៊ី បង្ហាញពីការភ័យខ្លាចខ្លាំង បន្ទាប់ពីលោក កឹម សុខា បានប្រកាសឱ្យឈប់យកឈ្មោះ និងរូបថតគាត់ទៅប្រើប្រាស់ដើម្បីមហិច្ឆតានយោបាយរបស់គាត់ និងក្រុមគាត់ ព្រោះអស់មានអ្វីត្រូវយកទៅកុហកអ្នកគាំទ្រទៀត។ ភ័យរហូតដោះលែងឱ្យឆ្កែកាច រួមទាំងអតីតតំណាងរាស្ត្រម្នាក់ដែលធ្លាប់លួចឆី និងយកប្រពន្ធមិត្តភក្តិ បកខាំលោក កឹម សុខា វិញ។ អ្វីដែលគួរឱ្យអស់សំណើចបំផុតនោះ គ្រាន់តែលោក កឹម សុខា ប្រកាសមិនឱ្យលោក សម រង្ស៊ី យកឈ្មោះ និងរូបថតគាត់ទៅភ្ជាប់ជាមួយសកម្មភាពខ្លួន លោក សម រង្ស៊ី ខំស្រែកស្លន់ស្លោយកលេសថា លោក កឹម សុខា កំពុងស្ថិតក្រោមសម្ពាធ និងជាចំណាប់ខ្មាំង។
លោក មុត ចន្ថា បានសរសេរនៅលើហ្វេសប៊ុកនៅថ្ងៃទី២៩ ខែវិច្ឆិកានេះថា អ្នកដឹកនាំត្រូវគិតឱ្យបានហ្មត់ចត់ និងច្បាស់លាស់មុននឹងនិយាយចេញ និងធ្វើសកម្មភាពអ្វីមួយ មិនមែននិយាយ ឬធ្វើអ្វីតាមអារម្មណ៍នឹកឃើញ និងតាមទំនើងចិត្តនោះទេ។ លោក សម រង្ស៊ី ខ្លួនឯងជាអ្នកដែលបានរុះរើផ្ទះសង់រួមគ្នា និងវេចបង្វេចចុះចេញពីផ្ទះដោយបើកចំហ។
លោក មុត ចន្ថា និងលោក កឹម សុខា
មូលហេតុ ៖ ទី១. ការចុះសំបុត្រអាពាហ៍ពិពាហ៍ ឬ អេតាស៊ីវិលៈ ភាគីណាមួយ ប្តី ឬប្រពន្ធចុះចេញពីផ្ទះរួមរស់ជាមួយគ្នាទៅបង្កើតគ្រួសារថ្មី ឬអតីតគ្រួសារឡើងវិញ គឺភាគីនោះបានប្រកាសផ្តាច់សង្វាសក្នុងនាមជាគ្រួសារតែមួយទៀតហើយ។ ក្នុងករណីនេះ លោក សម រង្ស៊ី បានចុះចេញពីផ្ទះ រួចទៅកសាងផ្ទះថ្មីជាមួយអតីតគ្រួសារវិញ គឺ «គណបក្សភ្លើងទៀន» ។
ទី២. ការចុះកិច្ចសន្យាពាណិជ្ជកម្មៈ កាលណាភាគីណាមួយដកខ្លួនជាឯកតោភាគីទៅចុះកិច្ចសន្យាជាមួយដៃគូពាណិជ្ជកម្មថ្មី សម្រាប់សកម្មភាពពាណិជ្ជកម្មដូចគ្នា មានន័យថាភាគីនោះបានប្រកាសលុបចោលកិច្ចសន្យា ព្រោះក្នុងបញ្ញត្តិកិច្ចសន្យាចាស់ហាមដាច់ខាតមិនឱ្យភាគីណាមួយលួចទៅបង្កើតសកម្មភាពពាណិជ្ជកម្មដូចគ្នាជាមួយអ្នកផ្សេងឡើយ។ ការលួចទៅបង្កើតសកម្មភាពពាណិជ្ជកម្មថ្មីនេះ គឺជាការរំលោភលើកិច្ចសន្យាដែលភាគីម្ខាងទៀតមានសិទ្ធិប្តឹងទាមទារសំណងខូចខាតបាន។ កិច្ចព្រមព្រៀង ស្តីពីការរួបរួមរវាងគណបក្សសមរង្ស៉ី (បច្ចុប្បន្នគណបក្សភ្លើងទៀន) និងគណបក្សសិទ្ធិមនុស្ស គឺបានចែងកំណត់យ៉ាងច្បាស់ថា គណបក្សទាំងពីរត្រូវធ្វើសកម្មភាពរួមគ្នាតែមួយ ដើម្បីគណបក្សថ្មី គឺគណបក្សសង្គ្រោះជាតិដែលត្រូវបានរំលាយ និងមិនត្រូវចូលរួមការបោះឆ្នោតឡើយ។ ដូច្នេះនៅពេលដែលលោក សម រង្ស៊ី បានអនុញ្ញាត ឬបើកដៃឱ្យគណបក្សភ្លើងទៀនដំណើរការឡើងវិញ ធ្វើសកម្មភាពនយោបាយជាថ្មី និងត្រៀមចូលរួមបោះឆ្នោត គឺគាត់បានរំលោភលើកិច្ចព្រមព្រៀងនេះ ហើយគាត់ជាអ្នកចុះចោលផ្ទះ ឬក្បត់លោក កឹម សុខា និងក្បត់អ្នកគាំទ្រ។
ទី៣. ការប្តឹងទាមទារសំណងចំពោះការរំលោភកិច្ចសន្យាៈ លោក កឹម សុខា បានស្នើឱ្យលោក សម រង្ស៊ី និងក្រុមរបស់គាត់បញ្ឈប់យក «ឈ្មោះ និងរូបថតរបស់គាត់» ទៅប្រើប្រាស់តទៅត់ទៀត ដើម្បីមហិច្ឆតានយោបាយរបស់ពួកគេ។ នេះជាការទាមទារយ៉ាងត្រឹមត្រូវបំផុតពីសំណាក់ជនរងគ្រោះ គឺលោក កឹម សុខា ដែលមិនអនុញ្ញាតឱ្យភាគីល្មើសបន្តកេងចំណេញ ឬកេងប្រវ័ញ្ចផលប្រយោជន៍របស់គាត់ តទៅទៀត។ ខ្លួនឯងក្បត់ ខំរកលេសបង្វែរការពិត!។
ទី៤. ការចងសម្ព័ន្ធភាពនយោបាយៈ កិច្ចព្រមព្រៀងបង្កើតសម្ព័ន្ធភាពក៏នឹងត្រូវបញ្ចប់ទៅវិញ នៅពេលណាភាគីណាមួយងាកចេញទៅចងសម្ព័ន្ធភាពជាមួយគណបក្សនយោបាយផ្សេងទៀត ឬធ្វើសកម្មភាពនយោបាយផ្ទុយពីស្មារតីដើម។ លោក សម រង្ស៊ី បានបើកដៃ និងគាំទ្រឱ្យគណបក្សភ្លើងទៀនដែលជាគណបក្សរបស់គាត់នៅក្នុងសម្ព័ន្ធភាពនៃគណបក្សសង្គ្រោះជាតិដែលត្រូវបានរំលាយឱ្យដំណើរការឡើងវិញ ធ្វើសកម្មភាពនយោបាយជាថ្មី និងត្រៀមលក្ខណៈចូលរួមការបោះឆ្នោត ដូច្នេះលោក សម រង្ស៊ី បានបែកចេញជាមុនរួចហើយ។ គណបក្សភ្លើងទៀនដំណើរការឡើងវិញ ស្មើនឹងលោក សម រង្ស៊ី ដកខ្លួនចេញពីអតីតគណបក្សសង្គ្រោះជាតិ ព្រោះបើសិនគ្មានគណបក្សភ្លើងទៀនស្ថិតក្នុងអតីតគណបក្សសង្គ្រោះជាតិ គឺលោក សម រង្ស៊ី គ្មានគណបក្សតំណាងទៀតទេ ផ្ទុយទៅវិញមានតែគណបក្សសិទ្ធិមនុស្សតែមួយគត់ស្ថិតក្នុងអតីតគណបក្សសង្គ្រោះជាតិ។
ទី៥. ការច្របាច់ចូលគ្នាៈ ទាំងគណបក្សសម រង្ស៊ី (បក្សភ្លើងទៀន) និងគណបក្សសិទ្ធិមនុស្ស ត្រូវបានច្របាច់បញ្ចូលគ្នាបង្កើតបានជាគណបក្សសង្គ្រោះជាតិ នៅខែកក្កដា ឆ្នាំ២០១២ រួចហើយ។ ជាក់ស្តែងគណបក្សទាំងពីរ គឺគ្រាន់តែជាគណបក្សចាំផ្ទះ ដើម្បីថែរក្សាមុខតំណែងមន្ត្រីជាប់ឆ្នោតមូលដ្ឋាន គឺមេឃុំ-ចៅសង្កាត់ និងសមាជិកក្រុមប្រឹក្សាឃុំ-សង្កាត់ កុំឱ្យបាត់បង់ប៉ុណ្ណោះ ដោយសារច្បាប់បោះឆ្នោតចែងបញ្ញត្តិថាមន្ត្រីជាប់ឆ្នោតនឹងត្រូវបាត់បង់តំណែង ក្នុងករណីបាត់បង់សមាជិកភាពក្នុងគណបក្សនយោបាយសាម៉ី ឬគណបក្សសាមីត្រូវបានរំលាយ។ ដូច្នេះ នៅពេលលោក សម រង្ស៊ី បើកដៃ និងគាំទ្រឱ្យគណបក្សភ្លើងទៀន ដែលគ្រាន់តែជាគណបក្សចាំផ្ទះ ឱ្យដំណើរការឡើងវិញ ធ្វើសកម្មនយោបាយជាថ្មី និងត្រៀមលក្ខណៈចូលរួមការបោះឆ្នោត គឺគាត់បានរំលោភបំពានលើស្មារតីនៃកិច្ចព្រមព្រៀង ស្តីពីការបង្កើតអតីតគណបក្សសង្គ្រោះជាតិរួចហើយ។ លោក សម រង្ស៊ី បានរត់ចោលផ្ទះ។
លោក មុត ចន្ថា បានបន្តថា អ្វីដែលគួរឱ្យអស់សំណើចបំផុតនោះ គ្រាន់តែលោក កឹម សុខា ប្រកាសមិនឱ្យលោក សម រង្ស៊ី យកឈ្មោះនិងរូបថតគាត់ទៅភ្ជាប់ជាមួយសកម្មភាពខ្លួន លោក សម រង្ស៊ី ខំស្រែកស្លន់ស្លោយកលេសថា លោក កឹម សុខា កំពុងស្ថិតក្រោមសម្ពាធ និងជាចំណាប់ខ្មាំង។ ប្រហែលជាគាត់បាត់ការចងចាំ ឬអង្គចងចាំគាត់ធ្លាក់ខ្សោយ ព្រោះកន្លងមកក្រុមមេធាវីរបស់លោក កឹម សុខា ធ្លាប់ស្នើជាច្រើនលើកឱ្យលោក សម រង្ស៊ី បញ្ឈប់យកឈ្មោះនិងរូបថតរបស់លោក កឹម សុខា ទៅប្រើប្រាស់ បែរជាគាត់ប្រកែកញ៉ាញថាមិនមែនជាសំដីរបស់លោក កឹម សុខា នោះទេ ហើយថែមទាំងទាមទារឱ្យលោក កឹម សុខា ចេញមកនិយាយផ្ទាល់ទើបជឿ។ ឥឡូវដល់ពេលលោក កឹម សុខា បានថ្លែងសារដោយផ្ទាល់ បែរជាគាត់យកលេសថាដោយសារសម្ពាធ គំរាមកំហែង ចំណាប់ខ្មាំង។ អស្ចារ្យមែន នេះបានជាមហាក្រឡិចក្រឡុច!។
មនុស្សជំនិតលោក កឹម សុខា បានចំអកថា ស្របពេលជាមួយគ្នា លោក សម រង្ស៊ី បង្ហាញពីការភ័យខ្លាចខ្លាំង បន្ទាប់ពីលោក កឹម សុខា បានប្រកាសឱ្យឈប់យកឈ្មោះនិងរូបថតគាត់ទៅប្រើប្រាស់ ដើម្បីមហិច្ឆតានយោបាយរបស់គាត់ និងក្រុមគាត់ ព្រោះអស់មានអ្វីត្រូវយកទៅកុហកអ្នកគាំទ្រទៀត។ ភ័យរហូតដោះលែងឱ្យឆ្កែកាច រួមទាំងអតីតតំណាងរាស្ត្រម្នាក់ដែលធ្លាប់លួចឆីនិងយកប្រពន្ធមិត្តភក្តិ បកខាំលោក កឹម សុខា វិញ។ បើកភ្នែកឱ្យធំ សម្លឹងឱ្យឆ្ងាយឱ្យបានច្បាស់ គឺលោក កឹម សុខា មិនមែនជាអ្នកបំបែកនោះទេ ផ្ទុយទៅវិញលោក សម រង្ស៊ី និងគូកនរបស់គាត់ទៅវិញទេ ដែលបានបង្កើតចលនាខុសច្បប់ និងវិលទៅបក្សភ្លើងទៀនវិញ។ អ្នកបំបែកក៏លោក សម រង្ស៊ី ហើយអ្នករត់ចោលអ្នកគាំទ្រក៏ជាលោក សម រង្ស៊ី បែរជាមកព្រួសឈាមដាក់លោក កឹម សុខា វិញ។ មិនចេះខ្មាស់គេទេអី!។
ចំណែកលោក ម៉ៅ មុនីវណ្ណ អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ បានសរសេរលើហ្វេសប៊ុកដែរថា គ្រាន់តែលោកកឹម សុខា ប្រកាសមិនឱ្យសម រង្ស៊ី យកឈ្មោះ និងរូបថតគាត់ទៅភ្ជាប់ជាមួយសកម្មភាពខ្លួន ហេតុអីភ័យម៉្លេះ? ឱ្យឆ្កែខ្លួនបកខាំលោកកឹម សុខា វិញ។ ខ្លាចជីវិតនយោបាយខ្លួនចប់ ឬមួយខ្លាចដើរបោកលុយគេលែងបាន។ លោក កឹម សុខា មិនមែនជាអ្នកបំបែកឯណា គឺសម រង្ស៊ី និងបរិវាទៅបង្កើតចលនា និងវិលទៅបក្សភ្លើងទៀនវិញនោះហើយ ជាអ្នកបំបែកអ្នកប្រជាធិបតេយ្យ៕
ដោយៈពលជ័យ
