ជំនួបពិភាក្សានោះគឺបានធ្វើឡើងនាព្រឹកថ្ងៃទី០៧ ខែធ្នូ ឆ្នាំ២០២១​ ដោយ​មេបញ្ជាការកង​ទ័ពជើងគោក ឧត្តមសេ​នីយ៍ឯក ហ៊ុន ម៉ាណែត ជាមួយនិង អនុរដ្ឋ​លេខាធិការ នៃក្រសួងការពារជាតិសិង្ហបុរី លោក Teo Eng Dih នៅទី​បញ្ជា​ការ​កងទ័ពជើងគោក នៃកងយោធពលខេមរភូមិន្ទ។

ក្នុងជំនួបនោះ លោក Teo Eng Dih បានលើកឡើងអំពីទំនាក់ទំនងកិច្ចសហប្រតិបត្តិការ​ល្អរវាងកងទ័ពជើងគោក​នៃប្រទេសទាំងពីរកម្ពុជា-សិង្ហបុរី ដែលបានអនុវត្តកន្លងមក ហើយបានធ្វើការ​កោត​សសើរ​នូវវប្បធម៌ អរិយធម៌ និងសមិទ្ធផលនានាដែលបានកើតទ្បើងដោយកត្តាសន្តិភាព និងការបង្រួបបង្រួមជាតិ ស្តែងចេញ​តាមរយៈ​ដំណើរ​ទស្សនកិច្ចរបស់គណៈប្រតិភូទៅកាន់ទីតាំងប្រវតិសាស្រ្តនានា​ដូចជា សារមន្ទីរជាតិ សារមន្ទីរទួលស្លែង និងវិមានឈ្នះ ឈ្នះ ជាដើម ។

ជាការឆ្លើយតប អគ្គមេបញ្ជាការរង នៃកងយោធពលខេមរភូមិន្ទ ឧត្តមសេនីយ៍ឯក ហ៊ុន ម៉ាណែត បានសម្តែង​ការស្វាគមន៍ដល់​គណៈ​ប្រតិភូ សម្រាប់ការអញ្ជើញមកទស្សនកិច្ចនៅព្រះរាជាណាចក្រកម្ពុជា ហើយក៏បានធ្វើ​ការ​​ជម្រាបជូន​អំពីកិច្ចខិតខំរបស់រាជរដ្ឋាភិបាល ក៏ដូចប្រជាពលរដ្ឋទូទាំងប្រទេស ក្នុងការរួមគ្នាថែរក្សាសន្តិ​ភាព​ដែល​មាន​នេះ​​ឲ្យបាន​គង់វង្ស ដើម្បីបន្ត​នូវ​វឌ្ឍនភាព និងភាពសម្បូរណ៍សប្បាយ។ ជាមួយគ្នា ឧត្តមសេនីយ៍ឯក ហ៊ុន ម៉ាណែត បានធ្វើការវាយតម្លៃខ្ពស់ចំពោះកិច្ចសហប្រតិបត្តិការរវាងកងទ័ពនៃប្រទេសទាំងពីរ ជាពិសេស​សកម្មភាពកិច្ចសហប្រតិបត្តិការជាច្រើនក្នុងកម្រិតកងទ័ពជើងគោក ដូចជាការផ្លាស់ប្តូរទស្សនកិច្ចសិក្សា លំហាត់ ហ្វឹកហ្វឺន និងការជួយឧត្ថម្ភគាំទ្រនានាជាដើម។

មេបញ្ជាការកងទ័ពជើងគោក លោកឧត្តមសេនីយ៍ឯក ហ៊ុន ម៉ាណែត ក៏បានថ្លែងអំណរគុណចំពោះ រាជរដ្ឋាភិ​បាល​សិង្ហ​បុរីសម្រាប់ចំណងមិត្តភាព និងកិច្ចសហប្រតិបត្តិការដ៏ល្អ និងសូមគាំទ្រចំពោះទិសដៅ​ទៅមុខរបស់​រដ្ឋាភិបាល និងក្រសួងការពារជាតិនៃប្រទេសទាំងពីរក្នុងការជំរុញបន្ថែមទៀតនូវទំនាក់​ទំនងកិច្ចសហប្រតិ​បត្តិការលើវិស័យសន្តិសុខ និងការពារជាតិ ដែលជាកិច្ចសហប្រតិបត្តិការបែបយុទ្ធសាស្ត្រដ៏សំខាន់៕