កាមេរ៉ាឆ្លាតវៃតាមផ្លូវជាតិលេខ៣ថតច្បាស់ដូចថ្ងៃ សូមប្រុងប្រយ័ត្ន! គោរពច្បាប់ទាំងអស់គ្នា
ដើម្បីធានាសុវត្ថិភាពលើកំណាត់ផ្លូវជាតិ កាមេរ៉ាចាប់ល្បឿនឆ្លាតវៃ ចំនួន ១០ទីតាំង ត្រូវបានដំឡើងនៅលើកំណាត់ផ្លូវជាតិលេខ៣ ពីចោមចៅ ទៅដល់ទីរួមខេត្តកំពត ដែលកាមេរ៉ាទាំងអស់នេះ កំពុងប្រើប្រាស់សាកល្បង ។ ទន្ទឹមនេះ អ្នកបើកបរយានយន្តទាំងអស់ ពិសេសរថយន្តធ្វើដំណើរតាមផ្លូវជាតិលេខ៣នេះ ប្រុងប្រយ័ត្ន! ត្រូវគោរពច្បាប់ទាំងអស់គ្នា បើមិនដូច្នេះទេ ច្បាស់ជាកាមេរ៉ាឆ្លាតវ័យ ថតជាប់សកម្មភាពគ្រប់យ៉ាងហើយ ចាប់បានទាំងល្បឿនរថយន្ត ពណ៌រថយន្ត ប្រភេទរថយន្ត ស្លាកលេខ ទាំងមុខអ្នកបើកបរ មិនពាក់ខ្សែក្រវ៉ាត់ការពារ និងប្រើទូរសព្ទពេលបើកបរ ជាដើម ។
នៅថ្ងៃទី០៥ មករា ២០២២នេះ តាមរយៈរូបភាពជាច្រើនសន្លឹក ចែករំលែកនៅលើហ្វេសប៊ុក ដែលបង្ហាញច្បាស់ដូចថ្ងៃ គ្រប់សកម្មភាពរបស់បើកបរលើផ្លូវជាតិមួយខ្សែនេះ ធ្វើឲ្យអ្នកលេងបណ្តាញសង្គម មានការភ្ញាក់ផ្អើលជាខ្លាំង ក្រោយពីបានឃើញរូបភាព ទាំងនេះ ។
ក្រោយពីបានឃើញរូបភាបច្បាស់ៗបែបនេះ មានអ្នកនិយមលេងនៅលើបណ្តាញសង្គមខ្លះ បានលាន់មាត់ថា «ចប់ហើយ អ្នកក្បត់ប្រពន្ធ ឫប្តី បើសិនហ៊ានដឹកអ្នកទី៣ដើរលេង ប្រយ័ត្នខ្លួនទៅ ! នៅប្រទេសថៃ លែងលះគ្នាមិនតិចទេ ដោយសារកាមេរ៉ាចាប់ល្បឿនហ្នឹង» ។ ទោះជាយ៉ាងណា កាមេរ៉ាវ័យឆ្លាតនេះ មាននៅប្រទេសដទៃទៀត ក្រៅពីកម្ពុជាផងដែរ ដែលគេកំពុងប្រើប្រាស់ ដើម្បីចាប់បទល្មើសនៅលើដងផ្លូវ ។
សូមជម្រាបថា កាមេរ៉ាចាប់ល្បឿនឆ្លាតវៃ ១០ទីតាំង ត្រូវបានដំឡើង នៅលើកំណាត់ផ្លូវជាតិចាប់ពីចោមចៅ ដល់ទីរួមខេត្តកំពត ដែលមានប្រវែងសរុប ១៣៥ គីឡូម៉ែត្រ ។ ក្រៅពីនេះ ភ្លើងសញ្ញាចរាចរណ៍បច្ចេកវិទ្យាទំនើប ចំនួនពីរ ទីតាំង ក៏បានដំឡើងផងដែរ នៅត្រង់ចំណុចវត្តស្លែង និងផ្សារអង្គតាសោម ។ ភ្លើងសញ្ញាចរាចរណ៍ទាំងពីរទីតាំង បំពាក់នូវប្រព័ន្ធ Wireless សម្រាប់ភ្ជាប់ពីបង្គោលមួយទៅបង្គោលមួយ និងធ្វើការបញ្ជាដំណើរការតាមទូរសព្ទដៃ ព្រមទាំងបំពាក់នូវប្រព័ន្ធសូឡាប្រើប្រាស់ពន្លឺព្រះអាទិត្យសម្រាប់ផ្គត់ផ្គង់អគ្គីសនី ។
ការដាក់កាមេរ៉ាចាប់ល្បឿនឆ្លាតវៃ និងភ្លើងសញ្ញាចរាចរណ៍បច្ចេកវិទ្យាទំនើបទាំងនេះ ក្នុងគោលបំណងតាមដាន ការពារសុវត្ថិភាព និងសម្រួលការធ្វើដំណើររបស់បងប្អូនប្រជាពលរដ្ឋលើផ្លូវជាតិលេខ ៣ ដែលក្នុងនោះ អគ្គស្នងការនគរបាលជាតិនឹងគ្រប់គ្រងរាល់សកម្មភាព និងប្រតិបត្តិការរបស់កាមេរ៉ាចាប់ល្បឿនទាំង ១០ ទីតាំង ទាំងការគ្រប់គ្រងទិន្នន័យ និងការពិន័យបទល្មើសផងដែរ ។
ក្រសួងជំនាញ បានបញ្ជាក់ប្រាប់កោះសន្តិភាពថា កាមេរ៉ាចាប់ល្បឿនទាំងនេះ អាចឲ្យមន្ត្រីជំនាញ ដឹងនូវល្បឿនរបស់រថយន្ត ពណ៌ ប្រភេទ និងស្លាកលេខរថយន្ត អ្នកបើកបរមិនពាក់ខ្សែក្រវ៉ាត់ការពារ និងប្រើទូរសព្ទពេលបើកបរ ។ មុននឹងដាក់ប្រើប្រាស់ផ្លូវការ អាជ្ញាធរពាក់ព័ន្ធ នឹងខិតខំអប់រំផ្សព្វផ្សាយ ជូនដំណឹងដល់បងប្អូនប្រជាពលរដ្ឋ ឱ្យបានដឹងអំពីច្បាប់ចរាចរណ៍ និងការដាក់កាមេរ៉ាចាប់ល្បឿន ហើយអាជ្ញាធរនឹងបំពាក់ផ្លាកសញ្ញាជូនដំណឹងដល់អ្នកបើកបរយ៉ាងតិច ១គីឡូម៉ែត្រ មុនដល់ទីតាំងកាមេរ៉ាចាប់ល្បឿន ។
កាមេរ៉ាចាប់ល្បឿនឆ្លាតវៃទាំង ១០ ទីតាំង បានដាក់ឲ្យប្រើប្រាស់បណ្តោះអាសន្ន ក្នុងអំឡុងខែវិច្ឆិកា ឆ្នាំ២០២១ កន្លងមក បន្ទាប់ពីទទួលបានការឯកភាពពីសម្តេចក្រឡាហោម ស ខេង ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរារណ៍ផ្លូវគោក និងឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍គណៈកម្មាធិការជាតិសុវត្ថិភាពចរាចរណ៍ផ្លូវគោក ៕