កម្លាំងរុស្ស៊ីដកថយ ខណៈអ៊ុយក្រែនទំនងជាឈ្នះសមរភូមិនៅក្រុងខាកៀវ
វិទ្យាស្ថានសិក្សាសង្គ្រាម (ISW) របស់អាមេរិកនិយាយថា អ៊ុយក្រែនទំនងជាឈ្នះសមរភូមិនៅក្រុងខាកៀវ ខណៈយោធារុស្ស៊ីដកខ្លួនចេញពីទីតាំងជុំវិញទីក្រុងធំទី២របស់អ៊ុយក្រែនមួយនេះ ដោយសារការវាយលុករបស់អ៊ុយក្រែន និងលទ្ធភាពនៃការពង្រឹងកម្លាំងដែលមានកម្រិត។
តាមការចុះផ្សាយរបស់កាសែតញូវយ៉កផុស្តិ៍ វិទ្យាស្ថាន ISW និយាយថា អង្គភាពរុស្ស៊ីមិនអាចទប់ទល់នឹងក្រុមយុទ្ធជនអ៊ុយក្រែនបានទេក្នុងរយៈពេលប៉ុន្មានថ្ងៃកន្លងមកនេះ ហើយត្រូវបានរារាំងដោយការឡោមព័ទ្ធទីក្រុង។
យោធាអ៊ុយក្រែននិយាយកាលពីថ្ងៃសៅរ៍ថា នៅពេលដែលពួករុស្ស៊ី ពួកគេបានបន្តទម្លាក់គ្រាប់បែកនៅតំបន់ដុនណេតស្ក៍ ដើម្បី «បំផ្លាញកងកម្លាំង និងបំផ្លាញបន្ទាយអ៊ុយក្រែន»។ រដ្ឋមន្ត្រីក្រសួងការពារជាតិអ៊ុយក្រែន លោក Oleksii Reznikov និយាយថា ប្រទេសនេះកំពុងចូលដល់ដំណាក់កាលថ្មីនៃសង្គ្រាមរយៈពេលវែង។
ការលើកឡើងនេះធ្វើឡើង២ថ្ងៃ បន្ទាប់ពីអ៊ុយក្រែនយកឈ្នះរុស្ស៊ីដែលព្យាយាមឆ្លងទន្លេ Siverskiy Donets ប្រហែល ២៥ ម៉ាយភាគខាងកើតនៃទីក្រុងខាកៀវ។ ការប្រយុទ្ធបានបញ្ចប់ដោយរថក្រោះរុស្ស៊ី និងឧបករណ៍យោធាផ្សេងទៀត ត្រូវបានបំផ្លិចបំផ្លាញ ទុកចោលពាសពេញទន្លេ។ ទូរទស្សន៍ CNN រាយការណ៍ថា កងកម្លាំងអ៊ុយក្រែនបានចល័តចូលទៅក្នុងភូមិមួយចំនួនជុំវិញទីក្រុងខាកៀវ ដែលរុស្ស៊ីគ្រប់គ្រងតាំងពីចាប់ផ្ដើមឈ្លានពានដំបូងៗ។
អភិបាលក្រុងខាកៀវ លោក Ihor Terekhov និយាយប្រាប់សារព័ត៌មានថា ទ័ពរុស្ស៊ីបានដកខ្លួនចេញពីទីក្រុង ហើយកំពុងធ្វើដំណើរឆ្ពោះទៅកាន់ព្រំដែនរុស្ស៊ី។ លោកនិយាយថា៖ «រុស្ស៊ីផ្លោងគ្រាប់ឥតឈប់ឈរនៅខាកៀវ ពីព្រោះពួកគេនៅជិតទីក្រុង។ ឥឡូវនេះវាស្ងប់ស្ងាត់ហើយ ហើយមនុស្សកំពុងត្រឡប់មកនៅទីក្រុងវិញជាបណ្តើរៗ។ យើងផ្តល់ការផ្គត់ផ្គង់ទឹក ហ្គាស និងអគ្គិសនីដល់ប្រជាពលរដ្ឋទាំងអស់។ តែជាអកុសល អគារលំនៅដ្ឋានជាច្រើនត្រូវបានបំផ្លាញ ឬខូចខាត»។
ដោយឡែកប្រធានផ្នែកស៊ើបការណ៍យោធាអ៊ុយក្រែន ឧត្តមសេនីយ៍ Kyrylo Budanov និយាយថា សង្គ្រាមកំពុងដំណើរការទៅយ៉ាងល្អដែលលោករំពឹងថាវានឹងឈានដល់ចំណុចរបត់មួយនៅពាក់កណ្តាលខែសីហា ហើយនឹងបញ្ចប់នៅចុងឆ្នាំនេះ។ មន្ត្រីដដែលធ្លាប់បានទាយយ៉ាងត្រឹមត្រូវថាពេលណាការលុកលុយនឹងកើតឡើង ខណៈដែលអ្នកផ្សេងទៀតនៅក្នុងរដ្ឋាភិបាលរបស់លោកចោទសួរគំនិតដែលថារុស្ស៊ីនឹងចាប់ផ្តើមសង្រ្គាម។
ឥឡូវនេះ លោកព្យាករណ៍ថា អ៊ុយក្រែននឹងមិនត្រឹមតែបណ្តេញរុស្ស៊ីចេញប៉ុណ្ណោះទេ ប៉ុន្តែថែមទាំងទាមទារមកវិញនូវតំបន់ដុនបាស និងគ្រីមៀដែលរុស្ស៊ីកាត់ចូលថាជាទឹកដីរបស់ខ្លួននៅឆ្នាំ ២០១៤ ទៀតផង។ លោកនិយាយថា៖ «យើងដឹងគ្រប់យ៉ាងអំពីសត្រូវរបស់យើង។ យើងដឹងអំពីផែនការរបស់ពួកគេស្ទើរតែដូចដែលពួកគេកំពុងធ្វើ។ អឺរ៉ុបមើលឃើញរុស្ស៊ីជាការគំរាមកំហែងធំ។ ពួកគេខ្លាចការឈ្លានពានរបស់ប្រទេសនេះណាស់»។
យ៉ាងណាមិញ ការព្យាករណ៍របស់លោកត្រូវបានលោកប្រធានាធិបតី វ៉ូឡូឌីមៀរ ហ្សេឡេនស្គី ច្រានចោលដោយប្រយោលថា៖ «គ្មាននរណាម្នាក់អាចទស្សន៍ទាយថាតើសង្រ្គាមនេះនឹងមានរយៈពេលប៉ុន្មាននោះទេ»។
ប្រភព៖ New York Post