បាងកក ៖ ក្រុមប្រឹក្សាទេសចរណ៍ប្រទេសថៃ (TCT) បានប្តេជ្ញាថា នឹងទាក់ទាញភ្ញៀវទេសចរបរទេស យ៉ាងហោចណាស់ ១០លាននាក់មកប្រទេសថៃ នៅក្នុងឆមាសទីពីរ នៃឆ្នាំ២០២២នេះ ហើយកំពុងអង្វរដល់ទីភ្នាក់ងាររដ្ឋាភិបាលទាំងអស់ ក្នុងការផ្តល់ប្រាក់ឧបត្ថម្ភបន្ថែម កម្ចីទន់ និងវិធានការបន្ធូរបន្ថយដល់សហគ្រិនទាំងអស់ ជាពិសេស សហគ្រាសធុនតូច និងមធ្យមក្នុងស្រុក ។

ថ្លែងនៅក្នុងសន្និសីទសារព័ត៌មានសម្រាប់សន្ទស្សន៍ទំនុកចិត្តទេសចរណ៍ថៃឆ្នាំ២០២២ លោក Chamnan Srisawat ប្រធាន TCT បាននិយាយថា ក្រុមប្រឹក្សាបានកំណត់គោលដៅទេសចរណ៍ ពី ១២ ទៅ ១៦លាននាក់សម្រាប់ឆ្នាំ២០២២ ហើយភ្ញៀវទេសចរចំនួន ២លាននាក់បានមកដល់រួចហើយ នៅក្នុងឆមាសទីមួយនៃឆ្នាំនេះ ។

គោលដៅនៃតួលេខនេះតំណាងឱ្យ ៣០ទៅ៤០ភាគរយនៃភ្ញៀវទេសចរអន្តរជាតិទាំងអស់ដែលបានទៅលេងប្រទេសថៃ ធៀបនឹងចំនួនមុនការរាតត្បាត Covid-19 ហើយវាមានសារៈសំខាន់សម្រាប់អាជីវកម្មទេសចរណ៍ថៃទាំងអស់ក្នុងការងើបឡើងវិញ និងរស់រានមានជីវិត ។

យោងតាមរបាយការណ៍ សន្ទស្សន៍ទំនុកចិត្តទេសចរណ៍បានកើនឡើងក្នុងរយៈពេលប្រាំមួយខែដំបូងនៃឆ្នាំ២០២២ ដោយសារតែអារម្មណ៍វិជ្ជមានអំពីការងើបឡើងវិញនៃវិស័យនេះ ដែលជាលទ្ធផលនៃវិធានការរបស់រដ្ឋាភិបាល ដូចជាការបើកព្រំដែនរបស់ប្រទេស ការបន្ធូរបន្ថយបទប្បញ្ញត្តិមួយចំនួន និងការលើកតម្រូវការលិខិតឆ្លងដែនរបស់ប្រទេសថៃ ដើម្បីបង្កភាពងាយស្រួលដល់ភ្ញៀវទេសចរក្នុងការមកទស្សនាប្រទេសនេះ ៕ ប្រភព៖ The Nation ប្រែសម្រួល៖ សារ៉ាត