ការផ្ទុះដ៏កក្រើកកើតឡើងក្នុងមូលដ្ឋានទ័ពអាកាសរុស្ស៊ីនៅគ្រីមៀ ខណៈអ៊ុយក្រែនបដិសេធការទទួលខុសត្រូវ
ក្រសួងការពារជាតិរុស្ស៊ីនិយាយក្រោយឧបទ្ទវហេតុកាលពីថ្ងៃអង្គារថា «ការផ្ទុះឃ្លាំងផ្ទុកគ្រាប់រំសេវទ័ពអាកាសជាច្រើន» បានបង្កឱ្យមានការផ្ទុះនៅមូលដ្ឋានទ័ពអាកាស Sakiនៅឆ្នេរសមុទ្រភាគខាងលិចនៃឧបទ្វីប ដែលរុស្ស៊ីកាន់យកពីអ៊ុយក្រែនក្នុងឆ្នាំ ២០១៤។
ក្រសួងនិយាយថា វាមិនមែនកើតឡើងដោយសារតែការវាយប្រហាររបស់នរណាមួយនោះទេ ខណៈឧបករណ៍នៃទ័ពអាកាសក៏មិនរងខូចខាត ហើយ «គ្មាននរណាម្នាក់រងគ្រោះ»។
យ៉ាងណាមិញ នាយកដ្ឋានសុខាភិបាលនៅគ្រីមៀនិយាយថា ជនស៊ីវិលម្នាក់ត្រូវបានសម្លាប់ និងមនុស្ស ៨ នាក់ផ្សេងទៀតបានរងរបួស។យោងតាមសាក្សីដែលទីភ្នាក់ងារសារព័ត៌មានរ៉យទ័រស្រង់សម្ដី ការផ្ទុះកើតឡើងសរុបចំនួន ១៣ ដងខ្លាំងៗ។
ទីប្រឹក្សាប្រធានាធិបតីអ៊ុយក្រែនលោកMykhailo Podolyak លើកឡើងថា ការផ្ទុះដ៏កក្រើកជាបន្តបន្ទាប់នៅនេះអាចជាស្នាដៃរបស់អ្នកបំផ្លិចបំផ្លាញបក្សពួកខណៈក្រុងកៀវបដិសេធរាល់ការទទួលខុសត្រូវចំពោះការវាយប្រហារលើទឹកដីដែលរុស្ស៊ីកាន់កាប់មួយនេះ។
លោក Podolyak និយាយថា អ៊ុយក្រែនមិនមានទំនួលខុសត្រូវលើករណីនេះទេ ប៉ុន្តែលោកស្នើថា អសមត្ថភាពរបស់រុស្ស៊ី អាចជាមូលហេតុដែលធ្វើឱ្យមានការផ្ទុះ។ទីប្រឹក្សាលោកប្រធានាធិបតី វ៉ូឡូឌីមៀរ ហ្សេលេនស្គី ដដែលបន្ថែមថា៖«អ្នកដែលរស់នៅក្រោមការកាន់កាប់[របស់រុស្ស៊ី]យល់ថាការកាន់កាប់នេះនឹងត្រូវបញ្ចប់»។
ចំណែកលោក ហ្សេលេនស្គី វិញ មិនបាននិយាយដោយផ្ទាល់ អំពីការបំផ្ទុះនៅមូលដ្ឋានទ័ពអាកាស Saki នោះទេ ប៉ុន្តែនិយាយថា វាជាការត្រឹមត្រូវ ដែលមនុស្សកំពុងផ្តោតលើតំបន់គ្រីមៀ ហើយ «យើងនឹងមិនបោះបង់ចោលវាទេ។ តំបន់សមុទ្រខ្មៅមិនអាចមានសុវត្ថិភាពទេ ខណៈដែលគ្រីមៀត្រូវបាន[រុស្ស៊ី]កាន់កាប់»។
នៅលើបណ្តាញសង្គមផ្សេងៗ មានការភ្ញាក់ផ្អើលជាមួយនឹងការសន្និដ្ឋាន វាជាការវាយប្រហាររបស់អ៊ុយក្រែនដោយប្រើមីស៊ីលរយៈចម្ងាយឆ្ងាយ ខណៈកាសែតញូវយ៉កថែមស៍ស្រង់សម្ដីប្រភពមន្រ្តីអ៊ុយក្រែនដែលមិនបញ្ចេញឈ្មោះថា យោធារបស់ខ្លួនជាអ្នកធ្វើការវាយប្រហារនេះ។
បើសិនវាជាការវាយប្រហារដោយអ៊ុយក្រែនពិតមែន នោះវានឹងក្លាយជាការបង្ហាញ ការវាយប្រហាររបស់អ៊ុយក្រែនលើកដំបូងលើឧបទ្វីប និងភាពតានតឹងនៃជម្លោះ។
កាលពីខែមុន ទីស្នាក់ការកណ្តាលនៃកងនាវាចរសមុទ្រខ្មៅរបស់រុស្ស៊ីនៅកំពង់ផែគ្រីមៀនៃទីក្រុងSevastopol រងការវាយប្រហារដោយការផ្ទុះតូចមួយពីដ្រូន ដែលរុស្ស៊ីស្តីបន្ទោសទៅលើអ៊ុយក្រែន។យ៉ាងណាក៏ដោយ កន្លងមក ក្រុមមន្ត្រីនៅទីក្រុងម៉ូស្គូបានព្រមានអ៊ុយក្រែនថា ការវាយប្រហារណាមួយលើគ្រីមៀ នឹងបង្កឱ្យមានការសងសឹកដ៏ធំ រួមទាំងការវាយប្រហារអាគាររដ្ឋបាលសំខាន់ៗនៅក្រុងកៀវ។
មូលដ្ឋាន Saki ដែលរងការបំផ្ទុះនេះ ជាកន្លែងមួយសម្រាប់ដាក់យន្តហោះចម្បាំងរុស្ស៊ី ហើយក៏ត្រូវបានរុស្ស៊ីប្រើ ដើម្បីបើកការវាយប្រហារអ៊ុយក្រែនពីភាគខាងត្បូង។ មូលដ្ឋានទ័ពក្នុងតំបន់គ្រីមៀនេះ ក៏នៅជិតសមរភូមិតានតឹងនៃតំបន់ Kherson របស់អ៊ុយក្រែន ដែលរុស្ស៊ីកាន់កាប់ក្រោយការឈ្លានពាន។
ប្រភព៖ Aljazeera