រដ្ឋបាលខេត្តសៀមរាប ជូនដំណឹងឱ្យពលរដ្ឋមានការប្រុងប្រយ័ត្នចំពោះគ្រោះមហន្តរាយទឹកជំនន់
សៀមរាប៖រដ្ឋបាលខេត្តសៀមរាបបានជូនដំណឹងដល់អាជ្ញាធរមូលដ្ឋានដែលពាក់ព័ន្ធ ប្រជាពលរដ្ឋ និងសាធារណៈជន ត្រូវមានការប្រុងប្រយ័ត្នខ្ពស់ក្នុងការបង្ការ តាមដាន គ្រប់គ្រង និងឆ្លើយតបគ្រោះមហន្តរាយទឹកជំនន់ឲ្យបានទាន់ពេលវេលា។តំបន់មួយចំនួនដែលស្ថិតក្នុងខេត្តនឹងរងគ្រោះពីទឹកជំនន់ ហើយវាអាចនឹងបង្កឲ្យមានគ្រោះថ្នាក់ផ្សេងៗដូចជា បាត់បង់ជីវិត និងបាត់បង់ទ្រព្យសម្បត្តិជាដើម។នេះបើយោងសេចក្ដីជូនដំណឹង ចុះថ្ងៃទី២២ ខែកញ្ញា ឆ្នាំ២០២២ ។
សេចក្ដីជូនដំណឹងរបស់រដ្ឋបាលទេសចរណ៍មួយនេះបានបញ្ជាក់ថា អាជ្ញាធរនៅតាមមូលដ្ឋាននីមួយៗត្រូវត្រៀមសម្ភារៈនិងមធ្យោបាយផ្សេងៗ ដើម្បីផ្សព្វផ្សាយនិងចុះធ្វើការណែនាំទៅកាន់ប្រជាពលរដ្ឋឲ្យមានការប្រុងប្រយ័ត្ន នូវគ្រោះមហន្តរាយទឹកជំនន់។ ជាពិសេស កុមារ និងជនងាយរងគ្រោះ ដែលពួគគាត់អាចជួបប្រទះនូវគ្រោះថ្នាក់ដល់អាយុជីវិត ដែលបង្កឡើងដោយគ្រោះមហន្តរាយទឹកជំនន់ផងដែរ។
ប្រភពដដែលបន្តថា រដ្ឋបាលខេត្តសៀមរាបកំពុងតែបន្តការតាមដានស្ថានភាពអាកាសធាតុជាប្រចាំ ដោយពឹងផ្អែកលើការព្យាករណ៍របស់ក្រសួងធនធានទឹក និងឧតុនិយមដែលបញ្ជាក់ថាចាប់ពីថ្ងៃទី២១ ដល់ថ្ងៃទី២៩ ខែកញ្ញា ឆ្នាំ២០២២ នៅតំបន់មួយចំនួនក្នុងខេត្តសៀមរាប នឹងទទួលរងបរិមាណទឹកភ្លៀងច្រើន ហើយវានឹងបង្កជាទឹកជំនន់។
សូមបញ្ជាក់ថា គិតត្រឹមថ្ងៃទី២២ ខែកញ្ញាម្សិលមិញនេះក្នុងខេត្តសៀមរាបមានភ្លៀងធ្លាក់ជាបន្តបន្ទាប់ដែលបណ្តាលឲ្យមានផលប៉ះពាល់ដល់ប្រជាពលរដ្ឋចំនួន ៥ ៨៧២ គ្រួសារ នៃភូមិចំនួន ១៨៤ភូមិ ឃុំចំនួន៤១ នៃស្រុកចំនួន៨ រួមមាន ស្រុកស្រីស្នំ ស្រុកក្រឡាញ់ ស្រុកជីក្រែង ស្រុកអង្គរជុំ ស្រុកវ៉ារិន ស្រុកពួក ស្រុកប្រាសាទបាគង និងស្រុកសូទ្រនិគមដែលបង្កឲ្យមានផលប៉ះពាល់ និងជំនន់ទឹកភ្លៀង។
ក្រៅពីប៉ះពាល់ដល់លំនៅឋាននិងប្រជាពលរដ្ឋនោះ ទឹកជំនន់នេះបានប៉ះពាល់ដល់ស្រូវពង្រោះចំនួន ៦.១២៥ហិកតា ដំឡូងមី ចំនួន ១.៥៧៨ហិកតា លិចទីធ្លាសាលារៀន ៣៣កន្លែង លិចបរិវេណមណ្ឌលសុខភាព ០៤កន្លែង អាគាររដ្ឋបាលឃុំ ប៉ុស្តិ៍រដ្ឋបាលប្រាំពីរកន្លែង លិចបរិវេណវត្តប្រាំមួយកន្លែង លិចផ្លូវប្រវែង ៧៨.៤២៦ម៉ែត្រ និងខូចខាតប្រវែង ២.៣៦៦ម៉ែត្រលិចខ្នងទំនប់ ខ្នងប្រឡាយ ប្រវែង ១៩.២២៣ម៉ែត្រ និងខូចខាតប្រវែង ៩៥ម៉ែត្រ លិចស្ពាន ១កន្លែង និងខូចខាតប្រវែង ១០ម៉ែត្រ ងាប់គោចំនួន ១ក្បាល ងាប់មាន់ទាសរុបចំនួន ៦៧៦ក្បាល៕
ដោយ៖ជា សុខនី
