ភ្នំពេញ៖ អង្គការផ្កាយសមុទ្រកម្ពុជាបានបានចាប់ផ្តើមរៀបចំកម្មវិធី ប្រកួតបាល់ទាត់ វិលជុំថ្នាក់សហគមន៍ប្រចាំឆ្នាំ២០២២ក្នុងរដូវកាលថ្មី នៅឯទីលានបាល់ទាត់ របស់អង្គការ ផ្កាយសមុទ្រ ស្ថិតនៅក្នុងខណ្ឌ ដង្កោ រាជធានីភ្នំពេញ ។
លោក យិន សាមឌី ប្រធានគ្រប់គ្រងកម្មវិធីបាល់ទាត់របស់អង្គការផ្កាយសមុទ្របានលើកឡើងថា កម្មវិធីប្រកួតបាល់ទាត់សហគមន៍នេះមានវត្តមាន កីឡាករចំនួន ៣៥០នាក់ មកពី ១៤ក្រុម ។ កម្មវិធីបាល់ទាត់រដូវកាលថ្មីនេះ មានរយៈពេល ២ខែ ដោយការប្រកួតវគ្គផ្តាច់ព្រ័ត្រនឹងប្រព្រឹត្ត ទៅនៅថ្ងៃអាទិត្យ ទី២៧ ខែវិច្ឆិកា ឆ្នាំ២០២២ខាងមុខនេះ ។ ការប្រកួតនេះនឹងផ្តល់ឱកាសដល់ យុវជនមកពីសហគមន៍នានានៅជុំវិញរាជធានីភ្នំពេញក្នុងការលេងកីឡាក្នុង បរិស្ថានប្រកបដោយសុវត្ថិភាព និងជាពិសេស រៀនសូត្រពីជំនាញ បំណិនជីវិតសំខាន់ៗ ដូចជាការធ្វើការងារជាក្រុម ភាពជាអ្នកដឹកនាំ ការដោះស្រាយបញ្ហា និងការប្រាស្រ័យទាក់ទងជាដើម ។
លោក បានគូសបញ្ជាក់ផងដែរថា នេះគឺជាលើកទីបួនហើយ ដែលអង្គការផ្កាយសមុទ្របានរៀបចំ កម្មវិធីប្រកួតបាល់ទាត់វិលជុំថ្នាក់សហគមន៍នេះឡើង ។ ទោះបីជាមានភ្លៀងធ្លាក់ក្នុងអំឡុងការប្រកួតបាល់ទាត់សហគមន៍នេះក៏ដោយ ក៏កីឡាករចូលរួមប្រកួត ទាំងអស់នៅតែខិតខំប្រឹងប្រែងយ៉ាងអស់ពីកម្លាំងកាយចិត្ត បង្ហាញសមត្ថភាព និងទឹកចិត្តស្រលាញ់កីឡា ដែលបានញុំាងឲ្យកម្មវិធីកីឡានេះប្រព្រឹត្តទៅពោរពេញដោយសម្លេងហ៊ោកញ្ជ្រៀវ និងស្នាមញញឹមពីអ្នក គាំទ្រកីឡាបាល់ទាត់ជាច្រើន ។
ប្រធានគ្រប់គ្រង់កម្មវិធីបាល់ទាត់ខាងលើ បានអះអាងថា ដូចឆ្នាំ ផ្សេងៗដែរ ខ្ញុំ និងក្រុមការងារកម្មវិធីបាល់ទាត់គឺពិតជារំភើបរីករាយយ៉ាងខ្លាំងក្នុងការទទួល ស្វាគមន៍កីឡាករទាំងអស់ ដែលមានទឹកចិត្តស្រលាញ់កីឡាបាល់ទាត់មកចូលរួមប្រកួត ប្រជែងក្នុងកម្មវិធីប្រកួតបាល់ទាត់វិលជុំ ថ្នាក់សហគមន៍ប្រចាំឆ្នាំ២០២២នេះ ។ លោក សង្ឈឹមជឿជាក់ថា កម្មវិធីប្រកួតបាល់ទាត់នេះនឹងផ្តល់នូវ ភាពសប្បាយរីករាយដល់កីឡាករទាំងអស់ ក៏ ដូចជាផ្តល់ ឱកាសឲ្យ ពួកគេបានបញ្ចេញសមត្ថភាព និងទេពកោសល្យ និងកសាងទំនាក់ទំនង ផងដែរ ៕ អត្ថបទ៖ ជាវ ចន្ធូ