កវី ឯល ប៊ុណ្ណា នឹកអនុស្សាវរីយ៍ជាមួយព្រះបរមរតនកោដ្ឋ ក្នុងគ្រាសម្រួលតន្ត្រីនិងនិពន្ធទំនុកច្រៀង
ភ្នំពេញ៖នាឱកាសខួប១០ឆ្នាំនៃការសោយទិវង្គតរបស់ព្រះបរមរតនកោដ្ឋព្រះបាទសម្ដេចព្រះ នរោត្តម សីហនុ លោក ឯល ប៊ុណ្ណា ជាតន្ត្រីករជើងចាស់មួយរូបបានលើកឡើងថា លោកមិនដែលភ្លេចអនុស្សាវរីយ៍ ដែលធ្លាប់សាងរួមគ្នាជាមួយព្រះបរមរតនកោដ្ឋ ក្នុងគ្រាសម្រួលតន្ត្រីនិងតែងនិពន្ធទំនុកច្រៀងនោះទេ។ លោកបង្ហាញអារម្មណ៍កាន់តែនឹកព្រះអង្គជាពន្លឹកនៅពេលឮបទចម្រៀង«លាហើយកម្ពុជា»សូរសៀងផ្ទាល់របស់ព្រះអង្គ ខណៈដែលរូបលោកជាអ្នកសម្រួលតន្ត្រីម្នាក់ផង។
«អនុស្សាវរីយ៍ជាច្រើនដែលខ្ញុំ ក៏ដូចជាមិត្តតន្ត្រីករផ្សេងទៀត ដែលធ្លាប់ដង្ហែ(ដើរតាម)លោក កាលលោកនៅព្រះជន្មមិនថា នៅក្នុងប្រទេស ឬនៅក្រុងប៉េកាំងនោះទេ។ ព្រះករុណា ព្រះមហាវីរក្សត្រ ព្រះបរមរតនកោដ្ឋ លោកជាមហាក្សត្រមួយព្រះអង្គ ដែលមានទសពិធរាជធម៌ ព្រហ្មវិហារធម៌ ហើយលោកអត់ដែលប្រកាន់ទោសពៃរ៍កូនចៅទេ គឺរាប់អានស្រឡាញ់កូនចៅដោយមិនរើសអើង។ ជាក់ស្ដែងពេលក្រុមតន្ត្រីករយើងដង្ហែទ្រង់នៅប្រទេសចិន ។លោកទទួលរាក់ទាក់មិនថា កន្លែងហូបចុក និងកន្លែងស្នាក់ គឺល្អប្រសើរខ្លាំងណាស់»។
នៅក្នុងវ័យ ៧៦ឆ្នាំ លោក ឯល ប៊ុណ្ណា ជាតន្ត្រីករជើងចាស់មួយរូបដែលដង្ហែតាមព្រះបរមរតនកោដ្ឋតាំងពីឆ្នាំ១៩៩១ រហូតដល់ថ្ងៃទ្រង់សោយទិវង្គត់នៅថ្ងៃទី១៥តុលា ឆ្នាំ២០១២។ បើតាមលោក ឯល ប៊ុណ្ណា មានឱកាសដង្ហែតាមព្រះបរមរតនកោដ្ឋមិនមែនជារឿងចៃដន្យទេ ។ពោលគឺជួបស្គាល់គ្នាជាលើកដំបូង តាមការណែនាំរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅគ្រាមួយជិះកាណូតរួមគ្នាលើដងទន្លេ ដោយមានការប្រគំតន្ត្រីពីក្រសួងវប្បធម៌។
តន្ត្រីករផ្នែកសម្រួលតន្ត្រីរូបនេះ បានចាត់ទុកព្រះបរមរតនកោដ្ឋជា«បិតាសិល្បជាតិ»។ «លោកសព្វព្រះទ័យជាមួយវិស័យចម្រៀងនេះខ្លាំងណាស់ ហើយយើងឃើញថា ពេលដែលលោកសូរសៀង លោកបានបញ្ចូលមនោសញ្ចេតនាជ្រាលជ្រៅខ្លាំងណាស់ ដែលស្ដាប់មើលទៅធ្វើឱ្យយើងដឹងថា ទ្រង់ជាអ្នកស្រឡាញ់សិល្បៈ»។
ជាអ្នកសម្រួលតន្ត្រីផងនិងនិពន្ធទំនុកច្រៀងផងលោក ឯល ប៊ុណ្ណា ប្រាប់ថា វត្តមានរបស់លោកនៅជាប់មិនដាច់ជាមួយព្រះបរមរតនកោដ្ឋ ដើម្បីផលិតបទចម្រៀង និងទំនុកភ្លេងថ្មីៗ «ខ្ញុំតែមានវត្តមាននៅជាមួយទ្រង់ រៀងរាល់ពេលប្រគំតន្ត្រីជូនថ្នាក់ដឹកនាំក្នុងនៅក្រៅប្រទេសស្ដាប់ និងរៀងរាល់ពេលដែលថតអាល់ប៊ុលចំរៀងបរទេសនិងខ្មែរ ដែលព្រះអង្គទ្រង់សូសៀង(ច្រៀង) ដោយផ្ទាល់គឺខ្ញុំតែងតែសម្រួលតន្ត្រីថ្វាយលោក ហើយក៏មានបទចំរៀងមួយចំនួន ២៣បទទៀត ខ្ញុំនិពន្ធថ្វាយលោកដែរ ដើម្បីឱ្យអ្នកចម្រៀងដទៃទៀតច្រៀង តែមកដល់ពេលនេះ ខ្ញុំអត់ទាន់បានបោះពុម្ពចងក្រងទុកជាឯកសារនៅឡើយទេ»។
លោក ឯល ប៊ុណ្ណា មិនចាំចំណងជើងបទចំរៀងទាំង២៣បទនេះ ដោយចាំបានខ្លះៗប៉ុណ្ណោះដូចជា៖បទជ្រោះភ្នំគូលែន ម្លប់ត្នោត ……ជាដើម។ បើតាមកវីនិពន្ធ ឯល ប៊ុណ្ណា បទដែលលោកនិពន្ធថ្វាយព្រះករុណាមានការណែនាំពីទ្រង់ផ្ដោតការពិពណ៌នាលើសម្រស់ធម្មជាតិ និងជីវភាពរស់នៅរបស់ប្រជាជនកម្ពុជា។
ស្ទើរតែពេញមួយជីវិតដង្ហែតាមព្រះបរមរតនកោដ្ឋ ចំរៀងមួយបទសូរសៀងនិងព្រះរាជនិពន្ធដោយផ្ទាល់របស់ព្រះករុណាគឺបទ«លាហើយកម្ពុជា» ធ្វើឱ្យលោក ឯល ប៊ុណ្ណា ស្រណោះទ្រង់ជាពន្លឹក។ បើតាមកវី ឯល ប៊ុណ្ណា លាហើយកម្ពុជា ដែលពេលនោះលោកមានវ័យ ៥១ឆ្នាំ ជាអ្នកសម្រួលតន្ត្រីដោយថតនៅឆ្នាំ ២០០៣ក្នុងព្រះបរមរាជវាំង៖ «ក្រោយការសោយទិវង្គតរបស់ព្រះបរមរតនកោដ្ឋ ខ្ញុំតែងតែឮ គេចាក់បទនេះធ្វើឱ្យខ្ញុំនឹកស្រណោះដល់ព្រះអង្គណាស់រាល់អនុស្សាវរីយ៍ដែលធ្លាប់មានជាមួយទ្រង់កាលពីមុន។ គ្រាមុនខ្ញុំធ្លាប់ចូលរួមតុអាហារជាមួយព្រះអង្គបានពីរលើកដែរនៅក្នុងព្រះរាជវាំងហ្នឹង»។
កាលពីនៅមានព្រះជន្មព្រះបរមរតនកោដ្ឋ និងសម្តេចព្រះមហាក្សត្រីសម្ដេចនរោត្តម មុនិនាថសីហនុតែងតែងសូរសៀងចម្រៀងជាភាសាខ្មែរ និងចំរៀងបរទេសជូនមន្ត្រីអ្នកមុខអ្នកការបណ្ដាអង្គទូតនានាសណ្ដាប់ក្នុងព្រះបរមរាជវាំង។ ជាបិតាសិល្បជាតិ! វិស័យសិល្បនៅក្នុងសម័យសង្គមរាស្ត្រនិយមក្រោមការដឹកនាំរបស់ទ្រង់ ត្រូវបានចាស់ៗជំនាន់មុនដំណាលប្រាប់តៗគ្នាមានការរីកចម្រើនគ្រប់ទម្រង់ដូចជាៈសិល្បចម្រៀង តន្ត្រី ភាពយន្ត ហើយតួសម្ដែងសុទ្ធតែមានសមត្ថភាពរហូតមានការទទួលស្គាល់ជាអន្តរជាតិ។
លោក ឯល ប៊ុណ្ណា ឱ្យដឹងទៀតថា កាលពីនៅមានព្រះជន្មព្រះបរមរតនកោដ្ឋធ្លាប់មានបន្ទូលថា៖ «ទ្រង់ធ្លាប់មានបន្ទូលផ្ទាល់តែម្ដងថា បទចំរៀងឥឡូវឃើញតែស្រែក…! ហើយជាការពិតបទចំរៀងរបស់យុវវ័យឥឡូវវាខុសពីទម្រង់ដើម។ ដូច្នេះទាំងខ្ញុំនិងទ្រង់យើងខិតខំថែរក្សា និងអភិរក្សបទចម្រៀងមរតដើម ព្រោះបង្ហាញពីអត្តសញ្ញាណរបស់ជាតិយើង»។
មិនខុសពីបទចម្រៀងមរតដើមរបស់លោក ស៊ីន សាមុត អ្នកស្រី រស់ សេរីសុទ្ធា និងអ្នកចម្រៀងជំនាន់មុនឯទៀត បទចំរៀងជាច្រើនដែលជាព្រះរាជនិពន្ធ និងព្រះសូរសៀងដោយផ្ទាល់ពីព្រះបរមរតនកោដ្ឋ នៅតែមានគាំទ្រ និងពេញនិយមស្ដាប់ពីសំណាក់ពលរដ្ឋខ្មែរគ្រប់រូប។ បទទាំងនោះរួមមាន៖ ភ្នំពេញ ,ផ្កាយស្នេហា ,ទីកែប ,បុប្ឆាវៀងចន្ទន៍ ,រាត្រីដែលបានជួបភ័ក្ត្រ ជាដើម៕
ដោយ៖ អេង រាជនី
