សេអ៊ូល៖ កូរ៉េខាងត្បូងបានប្រកាសដាក់ទណ្ឌកម្មឯកតោភាគីប្រឆាំងនឹងកូរ៉េខាងជើង ជាលើកដំបូង ក្នុងរយៈពេលជិតប្រាំឆ្នាំ។ ទង្វើនេះគឺជាការឆ្លើយតបនឹងការបាញ់មីស៊ីលម្តងហើយម្តងទៀតរបស់កូរ៉េខាងជើង។

ក្រសួងការបរទេសកូរ៉េខាងត្បូងបានប្រកាសពីការដាក់ទណ្ឌកម្ម កាលពីថ្ងៃសុក្រ ដោយកត់សម្គាល់ថា ប្រទេសនេះបានថ្កោលទោសយ៉ាងខ្លាំងចំពោះការញុះញង់មីស៊ីលរបស់កូរ៉េខាងជើង ដែលមានកម្រិត ដែលមិនធ្លាប់មានពីមុនមក។

ប្រភពក៏បាននិយាយថា ការបាញ់បង្ហោះទំនងជាធ្វើឡើងក្រោមសេណារីយ៉ូនៃការប្រើប្រាស់អាវុធនុយក្លេអ៊ែរយុទ្ធសាស្ត្រ ប្រឆាំងនឹងកូរ៉េខាងត្បូង។
ទណ្ឌកម្មនេះបានកំណត់គោលដៅបុគ្គលចំនួន ១៥ នាក់ និងអង្គការចំនួន ១៦។

បុគ្គលទាំងនោះរួមមានមន្ត្រីជាន់ខ្ពស់នៅបណ្ឌិត្យសភាវិទ្យាសាស្ត្រធម្មជាតិទីពីរ របស់យោធាកូរ៉េខាងជើង ដែលត្រូវបានគេជឿថា ជាអ្នកទទួលខុសត្រូវលើការអភិវឌ្ឍន៍នុយក្លេអ៊ែរ និងមីស៊ីលរបស់ប្រទេស។ អង្គការដែលបានចាត់តាំងរួមមានក្រសួងឧស្សាហកម្មរ៉ុក្កែត និងក្រុមហ៊ុនពាណិជ្ជកម្មពាក់ព័ន្ធរបស់ខ្លួន។

សេចក្តីប្រកាសនោះបាននិយាយថា បុគ្គលទាំងនោះបានចូលរួមក្នុងកម្មវិធីនុយក្លេអ៊ែរ និងមីស៊ីល ឬការទិញសម្ភារចាំបាច់។ អង្គការទាំងនោះត្រូវបានគេរាយការណ៍ថា មានទំនាក់ទំនងជាមួយនឹងកិច្ចខិតខំប្រឹងប្រែងរបស់ក្រុងព្យុងយ៉ាងក្នុងការគេចពីការដាក់ទណ្ឌកម្មដោយផ្អែកលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

ក្រសួងការបរទេសបាននិយាយថា ការសម្រេចចិត្តនេះនឹងរួមចំណែកដល់ការពង្រឹងការសម្របសម្រួលជាមួយសហរដ្ឋអាមេរិក និងជប៉ុនដែលបានដាក់ទណ្ឌកម្មផ្ទាល់ខ្លួនរបស់ពួកគេរួចហើយ។ ការដាក់ទណ្ឌកម្មឯកតោភាគីចុងក្រោយរបស់កូរ៉េខាងត្បូងបានកើតឡើងនៅក្នុងខែធ្នូ ឆ្នាំ ២០១៧ ហើយការសម្រេចថ្មីនេះ គឺបន្ទាប់ពីកូរ៉េខាងជើងបានបាញ់មីស៊ីលផ្លោងអន្តរទ្វីប Hwasong-15 កាលពីខែមុន៕ ប្រភពពី NHK , ដោយ៖ សារ៉ាត