អាមេរិក៖ប្រធានាធិបតី​អាមេរិក​លោក ចូ បៃដិន​ គ្មានគម្រោង​ជួបជាមួយ​ព្រះរាជបុត្រស្នងរាជ្យ​អារ៉ាប៊ីសាអ៊ូឌីត​ ម៉ូហាមេដ បេនសាលម៉ាន​ នៅឯកិច្ចប្រជុំ​កំពូល​របស់​ក្រុមប្រទេស​សេដ្ឋកិច្ចនាំមុខ​ ហៅកាត់ថា G20​ នៅក្នុង​ប្រទេស​ឥណ្ឌូណេស៊ី​ នា​ខែវិច្ឆិកាខាងមុខ​នោះទេ​។ នេះ​បើតាម​ការអះអាង​របស់​ទីប្រឹក្សា​សន្តិសុខជាតិ​អាមេរិក​លោក ជេក ស៊ូលីវ៉ាន់ (Jake Sullivan) នៅថ្ងៃអាទិត្យ ទី១៦ ខែតុលា​ឆ្នាំ២០២២​។

ទំនាក់ទំនង​រវាង​សហរដ្ឋអាមេរិក​ និង​អារ៉ាប៊ីសាអូឌីត​ បានជួបភាពតានតឹងនឹងគ្នា​ក្នុងពេលថ្មីៗនេះ​ ដោយសារតែ​ទីក្រុងរីយ៉ាដ​ បានសម្រេចកាត់បន្ថយ​ការផលិតប្រេងក្នុងចំនួនដ៏ច្រើន​ ដោយ​មិន​ខ្វល់​ពី​ការ​ទាមទារ​របស់លោកប្រធានាធិបតីអាមេរិក ចូ បៃដិន​។ឆ្លើយតប​នឹងជំហរ​របស់​អារ៉ាប៊ីសាអូឌីតនេះ​ លោកប្រមុខសេតវិមានអាមេរិក​ បានព្រមានអំពីផលវិបាក​ តែមិនបានបញ្ជាក់ច្បាស់លាស់​ថា​ជា​ផលវិបាក​បែប​ណា​ទេ​។

សេចក្តី​សម្រេច​របស់​ OPEC+ ដែល​មាន​សមាជិក​ ១៣​ប្រទេស​ជាអ្នក​ផលិត​ប្រេង​ ដឹកនាំ​ដោយ​អារ៉ាប៊ីសាអូឌីត និង​ដៃគូ​១០​ប្រទេស ​ដឹក​មុខ​ដោយ​រុស្ស៊ី​ នឹងកាត់បន្ថយទិន្នផលប្រេង​ពិភពលោក​មកត្រឹម​ ២ លាន​បារ៉ែលក្នុងមួយថ្ងៃ​ ចាប់ពីខែវិច្ឆិកា​ខាងមុខ​។

ចំណាត់ការនេះ​នឹងធ្វើឱ្យតម្លៃ​ថាមពលកើនឡើង​ នៅចំពេលមាន​វិបត្តិថាមពល​បង្កឡើងដោយសង្រ្គាម​ក្នុង​ប្រទេសអ៊ុយក្រែន​ និងនៅខណៈដែល​អ្នកបោះឆ្នោតអាមេរិក​ដែលកំពុងធុញទ្រាន់​នឹងអតិផរណា​ កំពុងរៀបចំទៅបោះឆ្នោត​ក្នុងការ​បោះឆ្នោតពាក់កណ្តាលអាណត្តិ​។

ការសម្រេច​របស់​ OPEC+​ ត្រូវបានគេ​មើលឃើញថា​ហាក់បីដូចជាការទះកំផ្លៀង​ខាងកាទូត​លើ​សហរដ្ឋអាមេរិក​។ ក្រុមអ្នក​ប្រជាធិបតេយ្យនៃ​រដ្ឋបាល​របស់លោក បៃដិន​ ដែល​ខឹងសម្បា​ បានបង្ហាញពីជំហរ​គាំទ្ររបស់​ពួកគេ​ចំពោះវិធានការសងសឹក​ដើម្បីឆ្លើយតប​ទៅវិញ​។

ក៏ប៉ុន្តែ​ ទីប្រឹក្សាសន្តិសុខជាតិអាមេរិក​លោក ស៊ូលីវ៉ាន់​ បាននិយាយកាលពីថ្ងៃអាទិត្យថា​ ប្រធានាធិបតី​អាមេរិក​ ចូ បៃដិន នឹងមិនធ្វើសកម្មភាពច្រឡោងខាម​ណាមួយនោះទេ​។

គួរជ្រាបថា​ សេតវិមានអាមេរិក​ បានចោទប្រកាន់​ក្រុមប្រទេសផលិតប្រេង​ OPEC+ ថាកំពុងរួមដៃជាមួយ​រុស្ស៊ី​កាត់បន្ថយការបូមប្រេង​ ដោយនិយាយថាពួកគេ​ នឹង​បង្កើនប្រាក់ចំណូល​របស់ទីក្រុងមូស្គូនិងធ្វើឱ្យប៉ះពាល់​ដល់ការដាក់ទណ្ឌកម្មលើរុស្ស៊ី​ ចំពោះ​ទង្វើឈ្លានពាន​លើអ៊ុយក្រែន​។

មន្ត្រី​អារ៉ាប៊ីសាអូឌីត ​បាន​ការពារ​សេចក្តីសម្រេច​នេះ​ ដោយអះអាងថាវា​ជា​ការ​ជំរុញ​ដោយ​សេដ្ឋកិច្ច​សុទ្ធសាធ​ មិនមែន​ពាក់ព័ន្ធរឿង​នយោបាយ​ទេ។

ឥឡូវនេះ​ ទំនាក់ទំនងតានតឹងរវាងអាមេរិក និងអារ៉ាប៊ីសាអូឌីត​ បានឈានឡើង​មួយកម្រិតទៀត​។ ជាក់ស្តែង​ ការ​ចរចារបស់​រដ្ឋមន្ត្រីហិរញ្ញវត្ថុ​ G20​ និងធនាគារកណ្តាលនៅទីក្រុងវ៉ាស៊ីនតោន​ បានបិទកាលពី​ថ្ងៃព្រហស្បតិ៍​សប្តាហ៍មុន​ ដោយគ្មានសម្រេចបាន​សេចក្តីថ្លែងការណ៍រួមឡើយ​។

គួរជ្រាបដែរថា​ ប្រមុខរដ្ឋ​ និង​រដ្ឋាភិបាលនៃក្រុមប្រទេស​ G20​ គ្រោងនឹងជួបប្រជុំគ្នានៅខែក្រោយ​ ឯកោះបាលីប្រទេសឥណ្ឌូណេស៊ី​ ក្នុងកិច្ចប្រជុំកំពូលមួយ​ដែលគេអាចមើលឃើញ​វត្តមានរបស់​លោក ចូ បៃដិន​ រួម​ជាមួយនឹង​ប្រធានាធិបតីរុស្ស៊ីលោក វ្ល៉ាឌីមៀរ ពូទីន​ និងគូប្រជែងមួយទៀត គឺមេដឹកនាំចិនលោក ស៊ី ជីងពីន​៕

ដោយ៖ លី លីយ៉ា

ប្រភពព័ត៌មាន៖ Biden has ‘no plans’ to meet Saudi crown prince at G20 summit: US official