បារាំង ត្រៀមខ្លួនរួចជាស្រេច ក្នុងការជួយ និងពង្រឹងកិច្ចសហប្រតិបត្តិការជាមួយកម្ពុជា លើច្រើនវិស័យ ទាំងអប់រំ, បរិស្ថាន, រទេះភ្លើងល្បឿនលឿន, សេដ្ឋកិច្ច ពាណិជ្ជកម្ម និងវិស័យកសិកម្ម ជាដើម
ភ្នំពេញ៖ ក្នុងឱកាសចូលជួបសម្ដែងការគួរសម និងពិភាក្សាការងារ ជាមួយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅវិមានសន្តិភាព នាព្រឹកថ្ងៃទី២៥ ខែមករា ឆ្នាំ២០២៣ ឯកឧត្តម អូលីវីយេ បេស (Olivier Becht) រដ្ឋមន្ត្រីប្រតិភូអម រដ្ឋមន្ត្រីក្រសួងអឺរ៉ុប និងការបរទេសបារាំង បានគោរពជម្រាបសម្ដេចតេជោថា បារាំង ត្រៀមខ្លួនរួចជាស្រេច ក្នុងការជួយ និងពង្រឹងកិច្ចសហប្រតិបត្តិការ ជាមួយកម្ពុជា លើវិស័យអប់រំ, វិស័យវិនិយោគ, វិស័យបរិស្ថាន, វិស័យហេដ្ឋារចនាសម្ព័ន្ធ, រទេះភ្លើងល្បឿនលឿន, វិស័យសេដ្ឋកិច្ច និងពាណិជ្ជកម្ម និងវិស័យកសិកម្ម ជាដើម ។
![](https://asset.ams.com.kh/central/media/2023/01/photo_2023-01-25_12-56-53-1024x755.jpg)
បើតាមឯកឧត្តម អ៊ាង សុផល្លែត ជំនួយការសម្ដេចតេជោបានឲ្យដឹងថា ឯកឧត្តម អូលីវីយេ បានលើកឡើងថា មិត្តភាពរវាងប្រទេសយើងទាំងពីរ គឺចាប់ផ្ដើមចេញពីវប្បធម៌ ហើយតាមរយៈវប្បធម៌នេះ បានធ្វើការពង្រីកទៅកាន់វិស័យដទៃទៀត ។
ឯកឧត្តម អូលីវីយេ ក៏បានគោរពថ្លែងអំណរគុណ ជូនចំពោះសម្ដេចតេជោ នូវការកសាងស្ដូប រំលឹកដល់វីរៈជនកម្ពុជាបារាំង ដែលបានពលីជីវិតក្នុងសង្គ្រាមលោកលើកទី១។ ឯកឧត្តម មានប្រសាសន៍ថា នេះជានិមិត្តរូប នៃមិត្តភាព និងសាមគ្គីភាពរវាងកម្ពុជា និងបារាំង ។
![](https://asset.ams.com.kh/central/media/2023/01/photo_2023-01-25_12-56-44-1024x700.jpg)
ជាការឆ្លើយតប សម្ដេចតេជោ បានសំដែងនូវការរីករាយជាមួយនឹងទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ជាពិសេស បន្ទាប់ពីជំនួបរវាងសម្ដេចតេជោផ្ទាល់ ជាមួយឯកឧត្តមប្រធានាធិបតី ម៉ាក្រុង កាលពីខែធ្នូកន្លងទៅ។
សម្ដេចតេជោ ហ៊ុន សែន បានមានប្រសាសន៍ថា រូបសំណាកដែលកំពុងត្រៀមការសាងសង់ គឺបានសាងសង់ឡើង ពីឆ្នាំ១៩២៥ តែត្រូវបំផ្លាញចោលនាសម័យប៉ុលពត ហើយរូបសំណាកនេះ គឺជានិមិត្តរូប នៃមិត្តភាពនិងសមិទ្ធផល នៃទំនាក់ទំនងរវាងប្រទេសទាំងពីរ។
![](https://asset.ams.com.kh/central/media/2023/01/photo_2023-01-25_12-56-39-1024x673.jpg)
ឆ្លៀតក្នុងឱកាសនេះដែរ សម្ដេចតេជោ នាយករដ្ឋមន្ត្រី ក៏បានថ្លែងអំណរគុណ ចំពោះរដ្ឋាភិបាល និងប្រជាជនបារាំងដែលកន្លងមក តែងតែជួយដល់កម្ពុជា ៕
ដោយ វណ្ណលុក