ខេត្តចំនួនបួន នៃប៉ែកពាយព្យប្រទេស នឹងត្រូវបង្កើតទៅជាប៉ូលសេដ្ឋកិច្ចទី ៤
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសជ្រើសរើសនិងកំណត់យកខេត្តចំនួនបួន គឺខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ និងខេត្តប៉ៃលិន បង្កើតទៅជាប៉ូលសេដ្ឋកិច្ចទី៤របស់កម្ពុជា ដើម្បីឆ្លើយតបទៅនឹងកំណើនវិស័យកសិកម្ម និងមច្ឆាជាតិ។
ក្នុងពិធីជួបសំណេះសំណាល ជាមួយប្រជាពលរដ្ឋ ដែលបានផ្លាស់ប្តូរទីលំនៅទៅទីតាំងថ្មី និងត្រួតពិនិត្យការដ្ឋានសាងសង់ វារីអគ្គិសនីស្ទឹងពោធិ៍សាត់១ ក្នុងខេត្តពោធិ៍សាត់នៅព្រឹកថ្ងៃទី១៤ ខែមីនា ឆ្នាំ២០២៣ សម្ដេចតេជោនាយករដ្ឋមន្ត្រីកម្ពុជាបញ្ជាក់ថា គម្រោងបង្កើតប៉ូលសេដ្ឋកិច្ចទី៤នេះ ស្ថិតក្រោមគំនិតផ្តួចផ្តើមរវាង សម្ដេច និងប្រធានាធិបតីចិនឯកឧត្តម ស៊ី ជីនពីង ដោយផ្តោតលើគម្រោងមច្ឆា និងអង្ករ ពីព្រោះខេត្តទាំងបួនខាងលើ សម្បូរទៅដោយស្រូវ និងត្រី។
បើតាមសម្ដេចតេជោនាយករដ្ឋមន្ត្រី ហ៊ុន សែន ខេត្តទាំងបួននេះ ក៏ត្រូវបង្កើនផលិតផលផ្សេងៗទៀតផងដែរ ដើម្បីចូលរួមជាមួយទីផ្សារតំបន់ និងពិភពលោក។
ឯកឧត្តម សុខ លូ អភិបាលខេត្តបាត់ដំបង បានលើកឡើងថា ការប្រកាសរបស់ប្រមុខរាជរដ្ឋាភិបាលដាក់បញ្ចូលខេត្តបាត់ដំបង ជាខេត្តប៉ូលសេដ្ឋកិច្ចទី៤ និងជាខេត្តរបៀងត្រី និងស្រូវ ស័ក្តិសមទៅនឹងខេត្តដែលមានសក្ដានុពលផ្នែកវិស័យកសិកម្ម។
ឯកឧត្តមបានប្រាប់ថា ៖ «បច្ចុប្បន្នផលិតផលកសិកម្មនៅមានចំណុចខ្វះខាតនៅឡើយ គឺខ្វះខាតក្នុងការកែច្នៃ ដូចនេះខេត្តបាត់ដំបងត្រូវការអ្នកវិនិយោគដែលពាក់ព័ន្ធនឹងផ្នែកកែច្នៃផលិតផលកសិកម្មដូចជាពោត ស្វាយជាដើម ដើម្បីធ្វើការផ្គត់ផ្គង់ក្នុងស្រុក ក៏ដូចជាក្នុងការនាំចេញទៅក្រៅប្រទេស ព្រោះខេត្តបាត់ដំបង នាពេលអនាគតនឹងមានផ្លូវថ្នល់ខ្វាត់ខ្វែងដែលតភ្ជាប់ទៅនឹងខេត្តសំខាន់ៗ ក៏ដូចជាច្រកទ្វារអន្តរជាតិសំខាន់ៗជាច្រើនទៀត»។
ចំណែក លោក គី សិរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភកម្ពុជា ក៏បានថ្លែងឱ្យដឹងដែរថា តាមពិតទៅប៉ូលសេដ្ឋកិច្ចសម្រាប់ខេត្តទាំងបួននេះ គឺមានតាំងពីយូរយារណាស់មកហើយ ប៉ុន្តែការកំណត់ឱ្យវាទៅជាប៉ូលសេដ្ឋកិច្ចពេញលេញ គឺមិនទាន់បានធ្វើនៅឡើយ។ ដូច្នេះ អ្វីដែលប្រមុខនៃរាជរដ្ឋាភិបាលបានលើកឡើង គឺជាការយកចិត្តទុកដាក់នូវឧត្តមភាពនៃការប្រកួតប្រកួតប្រជែងរបស់តំបន់។
លោកបានបញ្ជាក់ដូច្នេះថា ៖ «ជាក់ស្តែង យើងឃើញនៅតំបន់ខេត្តពោធិ៍សាត់ បាត់ដំបង បន្ទាយមានជ័យ និងប៉ៃលិន គឺជាតំបន់ដែលមានសក្តានុពលទៅដល់វិស័យកសិកម្ម ដែលយើងឃើញមានបីប្រភេទ ដូចជាដំណាំស្រូវ ជលផល និងដំណាំឧស្សាហកម្ម។ ក្នុងនោះយើងឃើញតំបន់ខ្លះជាតំបន់ភ្នំ តំបន់ខ្លះក៏ទំនាប និងមានតំបន់បឹងទន្លេសាប ដែលទាំងនេះ ធ្វើឱ្យរាជរដ្ឋាភិបាលយកចិត្តទុកដាក់ប្រែកក្លាយទៅជាឯកទេសកម្ម»។
ទោះជាយ៉ាងណាលោកថា ការកំណត់យកខេត្តទាំងបួននេះ ជាប៉ូលសេដ្ឋកិច្ច មិនមែនជួយឱ្យវិស័យកសិកម្មរបស់កម្ពុជាទាំងមូលល្អប្រសើរនោះទេ ប៉ន្តែជាគោលដៅ គឺលើកម្ពស់ទិន្នផលសិកម្ម និងចំណូល សម្រាប់ជាតិឱ្យបានច្រើនជាងមុន។ រីឯកសិកម្មទាំងមូល គឺក្រសួងជំនាញត្រូវពិនិត្យមើល និងអនុវត្តទៅតាមតំបន់ នានានៅទូទាំងប្រទេស ទើបវាអាចលូតលាស់ទៅមុខលឿន។
ជាមួយគ្នានេះលោកស្នើឱ្យរាជរដ្ឋាភិបាលគិតគូរ និងយកចិត្តទុកដាក់លើការចិញ្ចឹមសត្វ និងដំណាំដាំដុះដែលកម្ពុជាតែងតែនាំចូលពីក្រៅប្រទេសជិតខាងដូចជាមកពីប្រទេសវៀតណាម និងប្រទេសថៃ ក្នុងមួយថ្ងៃៗប្រមាណពី ៣០ ទៅ ៤០ តោន។ ដូច្នេះ ការដាំដុះ និងចិញ្ចឹមសត្វនេះ ដើម្បីទប់ស្កាត់ការនាំចូល និងរួមចំណែកជួយដល់សុខភាពរបស់ប្រជាពលរដ្ឋ និងចំណេញសេដ្ឋកិច្ចជាតិ។
សូមបញ្ជាក់ថា បច្ចុប្បន្ន កម្ពុជាមានប៉ូលសេដ្ឋកិច្ចសំខាន់ៗចំនួន៣ គឺរាជធានីភ្នំពេញ ខេត្តព្រះសីហនុ និងខេត្តសៀមរាប។ រាជរដ្ឋាភិបាលកាលពីកន្លងទៅ ក៏បានដាក់ចក្ខុវិស័យប្រែក្លាយតំបន់ភូមិភាគឦសាន ទៅជាប៉ូលសេដ្ឋកិច្ចទី ៤ ផងដែរ ដោយគ្របដណ្តប់នៅក្នុងខេត្តរតនគិរី មណ្ឌលគិរី ស្ទឹងត្រែង ក្រចេះ និងខេត្តព្រះវិហារ ព្រោះជាតំបន់កសិឧស្សាហកម្ម និងជាតំបន់អភិវឌ្ឍន៍ធនធានរ៉ែ៕ ដោយ៖យុទ្ធ វីរៈ
