ភ្នំពេញ៖ ក្នុងពិធីជួបជុំសំណេះសំណាល និងទទួលទានអាហារ សាមគ្គីជាមួយមហាគ្រួសារកីឡាកម្ពុជាចំនួន ៤ ២៦៤នាក់ នៅ មជ្ឈមណ្ឌលកោះពេជ្រ រាជធានីភ្នំពេញ នាល្ងាចថ្ងៃទី៣ ខែមេសា ឆ្នាំ២០២៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋ មន្ត្រីកម្ពុជា បានផ្ដល់អនុសាសន៍សំខាន់ៗ ដើម្បីឱ្យមានប្រសិទ្ធភាព លើ ការងារ សម្រាប់ព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ។

អនុសាសន៍សំខាន់ៗរបស់សម្តេចតេជោ មានដូចជា ៖
១-ពង្រឹងសាមគ្គីភាព ឯកភាពផ្ទៃក្នុងការងារ និងសុខដុមរមនា ការងារ ក្នុងគណៈកម្មាធិការជាតិ រៀបចំការប្រកួត និងភាគីពាក់ព័ន្ធ ពិសេស ត្រូវឯកភាពគ្នាជាគោលការណ៍ដឹកនាំ និងអនុវត្តឱ្យមានប្រសិទ្ធភាព។

២-គណៈកម្មាធិការជាតិរៀបចំការប្រកួតប្រើប្រាស់ថវិកា ពិសេស របស់ រាជរដ្ឋាភិបាល ដូចនេះក្នុង ដំណាក់កាលចុងក្រោយនេះ បើមាន ករណីចាំបាច់បន្ទាន់ អនុញ្ញាតឲ្យដោះស្រាយចំណាយមុន ទើបរៀបចំ សក្ខីបត្រទូទាត់ក្រោយ។

៣-រដ្ឋបាលរាជធានី-ខេត្តទទួលការប្រកួតកីឡាទាំងអស់ ត្រូវពង្រឹង គុណភាព លើសេវាសាធារណៈ សន្តិសុខ-សណ្តាប់ធ្នាប់ សោភ័ណ ភាព អនាម័យ និងបរិស្ថានចាប់ពីពេលនេះតទៅ។

៤-ក្រសួង ស្ថាប័នពាក់ព័ន្ធ ត្រូវចូលរួមសហការនិងទទួលសំណូមពរ ចាំបាច់នានារបស់គណៈកម្មា ធិការជាតិរៀបចំការប្រកួត ដើម្បី ធានា ប្រសិទ្ធភាពគ្រប់ជ្រុងជ្រោយក្នុងការរៀបចំព្រឹត្តិការណ៍ឱ្យទទួលបានជោគេជ័យ។

៥-សូមសហព័ន្ធកីឡាជាតិ ថ្នាក់ដឹកនាំ គ្រូបង្វឹក និងអ្នកគាំទ្រចុះជួយ ជំរុញ លើកទឹកចិត្ត ផ្តល់កម្លាំងចិត្តដល់កីឡាករ កីឡាការិនីក្នុង ដំណាក់កាលចុងក្រោយនៃការប្រកួត ដើម្បីបន្ថែមកម្លាំងចិត្ត និងជំនឿចិត្តខ្ពស់ដល់កីឡាករ កីឡាការិនី។

៦-ចំពោះប្រជាពលរដ្ឋនៅរាជធានីភ្នំពេញ អំឡុងពេល ព្រឹត្តិការណ៍ ប្រកួត សូមអធ្យាស្រ័យកាត់បន្ថយ ការប្រើប្រាស់យានយន្ត និង សូមលើកទឹកចិត្តឲ្យប្រើរថយន្តក្រុង ឬរថយន្តរួមគ្នា ដើម្បីកាត់បន្ថយ ការកកស្ទះ សម្រួលដល់ការដឹកជញ្ជូនប្រតិភូកីឡា និងភ្ញៀវអន្តរជាតិ។

សម្តេចតេជោ ក៏បានប្រកាសទន្ទឹងរង់ចាំលទ្ធផលល្អប្រសើរ ប្រកប ដោយកិត្តិយស និងមោទនភាពជាតិ ដែលបានមកពីកិច្ចខិតខំ ប្រឹង ប្រែង បំពេញការងារដោយការប្តេជ្ញាចិត្តខ្ពស់ក្នុងព្រឹត្តិការណ៍ប្រកួតកីឡា SEA Games-ASEAN Para Games ឆ្នាំ២០២៣ ដើម្បីធ្វើឱ្យ ព្រឹត្តិការណ៍ «កម្ពុជា ឆ្នាំ២០២៣» ទទួលបានជោគជ័យដ៏ធំធេង និង ធានាឱ្យ «ក្រុមជម្រើសជាតិកម្ពុជា» សម្រេចបាននូវគុណផល កីឡា ដ៏ល្អបំផុត ដែលមិនធ្លាប់មាននៅក្នុងប្រវត្តិសាស្ត្រនៃកីឡាស៊ីហ្គេម និងអាស៊ានប៉ារ៉ាហ្គេម ៕
អត្ថបទ៖ វណ្ណលុក, រូបភាព៖ វ៉េង លីមហួត និង សួង ពិសិដ្ឋ