ភ្នំពេញ ៖ កីឡាករអត្តពលកម្មជម្រើសជាតិកម្ពុជា បានបំបែកកំណត់ត្រាជាប្រវត្តិសាស្ដ្រ លើវិញ្ញាសារត់ចម្ងាយ ៨០០ម៉ែត្របុរស ក្នុងព្រឹត្តិការណ៍កីឡាស៊ីហ្គេម លើកទី៣២ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ដោយដណ្ដើមបានមេដាយមាស មកជូនកម្ពុជា។ នេះជាមេដាយ មាសលើកដំបូងសម្រាប់កីឡាករ ឈុន ប៊ុន ថន ហើយក៏ជាមេដាយមាស ដំបូងលើប្រភេទកីឡាអត្តពលកម្ម ក្នុងព្រឹត្តិការណ៍ស៊ីហ្គេម ព្រោះថាក្នុង ស៊ីហ្គេមកន្លង កម្ពុជាពុំដែល ទទួលបាន មេដាយមាសនោះឡើយ គឺធា្លប់ ប្រជែងបានត្រឹមមេដាយសំរិទ្ធប៉ុណ្ណោះ លើវិញ្ញាសារត់ម៉ារ៉ាតុង ដែលធ្វើបានដោយកីឡាករ ហែម ប៊ុនទីង ។

សូមជម្រាបជូនថា ក្នុងការប្រកួត នៅពហុកីឡដ្ឋានមរតកតេជោ កីឡាករ ឈុន ប៊ុនថន ប្រជែងឈ្នះកីឡាករ ខ្លាំងៗមកពីបណ្ដាប្រទេសនានា ចំនួន៧រូប ក្នុងវគ្គផ្ដាច់ព្រ័ត្រ លើចម្ងាយផ្លូវ៨០០ម៉ែត្រ ដោយបានមកដល់ទីមុនគេ ក្នុងថេរៈវេលា ១នាទី ៥២វិនាទី ចុច៩១ ខណៈដែលកីឡាករ វៀតណាម ឌុក ហ្វូក មកដល់ទីបន្ទាប់ ប្រើថេរៈវេលា ១នាទី ៥៣វិនាទី ចុច៣៤ និង តំណែង លេខ៣បានទៅកីឡាករ វ៉ាន មហាម៉េត មកពី ម៉ាឡេស៊ី ដោយប្រើរយៈពេល ១នាទី ៥៣វិនាទីចុច ៩៦ ។ យោងតាមលទ្ធផលនេះ កម្ពុជា ទទួលបានមេដាយមាស ឯវៀតណាម បានមេដាយប្រាក់ និង ម៉ាឡេស៊ីទទួលបានមេដាយសំរិទ្ធ ។

ក្រោយពីទទួលបាន មេដាយមាសជូនជាតិ កីឡាករ ឈុន ប៊ុនថន មានសេចក្ដីរីករាយជាខ្លាំង រំភើបរហូតស្រក់ទឹកភ្នែក ដោយបាននិយាយថា ការដណ្ដើមបានមេដាយមាសនាពេលនេះ មិនមែនជាជោគជ័យរបស់គេម្នាក់ឯកនោះទេ គឺជាជោគជ័យរបស់ប្រជាជនកម្ពុជាទាំងមូល ហើយក៏មិនមែន កើតឡើងដោយ ចៃដន្យដែរ គឺកើតចេញពីការខិតខំប្រឹងប្រែងហ្វឹកហាត់ របស់គេ និងបង្ហាត់ពីគ្រូបង្វឹក ជាមួយនឹង ជាមួយនឹងការយកចិត្តទុកដាក់ ពីថ្នាក់ដឹនាំសហព័ន្ធ ក៏ដូចជាប្រមុខរាជរដ្ឋាភិបាល សម្ដេចតេជោហ៊ុនសែននាយករដ្ឋមន្ដ្រី នៃកម្ពុជា ដែលតែងយកចិត្តទុកដាក់ ទំនុកបម្រុង ផ្ដល់ការលើកទឹកចិត្ត ដល់កីឡាករកីឡាការិនីយើង ពិសេស ទៀតនោះគឺការគាំទ្រផ្ដល់កំលាំងចិត្ត ពីបងប្អូនប្រជាពលរដ្ឋ ជាទស្សនិកជន ដែលបំផ្ទុះស្មារតី ធ្វើឲ្យរូបគេអាចដណ្ដើមបានមេដាយមាសមកជូនជាតិ ។

កីឡាករ មេដាយមាសរូបនេះ បានអំពាវនាវ សូមឲ្យបងប្អូនប្រជាពលរដ្ឋ បន្ដគាំទ្រដល់អត្តពលិករបស់យើង ឲ្យបានខ្លាំងក្លាថែមទៀត ដើម្បីជាកម្លាំងចិត្តដល់កីឡាករកីឡាការិនីយើង ។ជាមួយនេះ រូបគេ បានប្ដេជ្ញាថា នឹងខិតខំតស៊ូប្រឹងប្រែងឲ្យបានមោះមុត ដើម្បីស្វែងរក មេដាយ ពីការប្រកួតថ្នាក់អន្ដរជាតិផ្សេងៗ មកជូនជាតិ បន្ថែមទៀត ៕ អត្ថបទ៖ ជាវ ចន្ធូ