ភ្នំពេញ៖ នៅក្នុងពិធីសម្ពោធជាផ្លូវការនូវអគារមជ្ឈមណ្ឌលពហុឯកទេស «អគារតេជោអភិវឌ្ឍន៍» នៃមន្ទីរពេទ្យកាល់ម៉ែត នៅថ្ងៃទី២៣ ខែឧសភា ឆ្នាំ២០២៣ នេះ សម្ដេចតេជោ  ហ៊ុន សែន នាយករដ្ឋមន្ត្រីកម្ពុជា បានថ្លែងថាសម្ដេចមានគម្រោងនឹងជួបកម្មករកម្មការិនី ចំនួន១៨គោលដៅ ដើម្បីពិនិត្យស្ថានភាពកម្មករកម្មការិនី ក្រោយស្ថានភាពកូវីដ១៩ បានធូរស្រាល។

សម្ដេចតេជោបានថ្លែងដូច្នេះថា ៖ «នៅក្នុងអាទិត្យនេះ គឺសុក្រ សៅរ៍​ និងអាទិត្យ (២៦,២៧ និង២៨ ខែឧសភា) ៣ថ្ងៃជាប់គ្នា ខ្ញុំនឹងទៅសួរសុខទុក្ខ​កម្មករកម្មាការិនី ​ហើយ​នៅពេលខាងមុខតាមគ្រោងទុក ខ្ញុំនឹងជួបកម្មករកម្មការិនី ១៨ គោលដៅដែល​ឱកាសបានផ្តល់ឱ្យយើង សម្រាប់ការជួបជុំ ដើម្បីសួរទុក្ខកម្មករកម្មការិនីរបស់យើង»។

សម្ដេចតេជោនាយករដ្ឋមន្រ្តីកម្ពុជាបានបញ្ជាក់ទៀតថា៖ ពីមុនខ្ញុំជួប៧៧លើក ជាមួយនឹងកម្មករប្រមាណជាមួយលាននាក់ ឥឡូវខ្ញុំនឹងចុះទៅជាថ្មីទៀត។ ​ម្សិលមិញជួបម្តងហើយ ជាង២៤ ០០០ នាក់។ ឥឡូវមួយកន្លែងៗ មានចាប់ពី ១៥ ០០០នាក់ ឡើងទៅ។ ពីមុននេះ ​យើងមិនអាចទៅសួរសុខទុក្ខបានទេ សូម្បីតែឥឡូវហ្នឹង ទោះបីជាទៅសួរសុខទុក្ខមែន តែមិនអាចថត មិនចាប់ដៃបានទេ ព្រោះមិនដឹងថាខ្ញុំកើតកូវីដ ឬអ្នកដទៃកើតកូវីដ ដូច្នេះត្រូវរក្សាគម្លាតសិន។ ​

នៅក្នុងពិធីសំណេះសំណាលជាមួយ កម្មករ និយោជិត កាលពីថ្ងៃទី២២ ខែឧសភា កន្លងទៅថ្មីៗនេះដែរ សម្ដេចតេជោនាយករដ្ឋមន្រ្តីបានថ្លែងបញ្ជាក់ថា ការចុះទៅជួបកម្មករកម្មការិនីនាពេលកន្លងទៅ នឹងនាពេលខាងមុខនេះ មិនមែនដោយសារតែការជិតបោះ​ឆ្នោតមកដល់នោះទេ តែជាកាតព្វកិច្ចចាំបាច់ដែលរដ្ឋាភិបាលតែងតែធ្វើជាប្រចាំក្នុងការដឹងសុខទុក្ខរបស់ពលរដ្ឋ។រឿងនេះវាជាកាតព្វកិច្ចពិនិត្យបងប្អូន ក្រោយពេលជំងឺកូវីដ។ អ៊ីចឹងខ្ញុំអាចនឹងរកពេលខ្លះ ដើម្បីចែ​ករំលែក ដោយសារឥឡូវមិនចសូវចាយពេលដូចមុនទេ ពីមុនចាយពេលច្រើន ជាពិសេសចែកលុយឱ្យស្រ្តីមានផ្ទៃពោះ និងថតសែលហ្វីជាមួយបងប្អូនកម្មករកម្មការិនីយើង។

បើតាម លោក អ៊ីត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា កម្មវិធីសំណេះសំណាលជាមួយកម្មករនិយោជិតនាពេលកន្លងមក និងកម្មវិធីដែលគ្រោងនឹងធ្វើនាពេលខាងមុខនេះ ​គឺជាការបន្តអនុវត្តអនុសាសន៍ប្រមុខរាជរដ្ឋាភិបាលកម្ពុជា ក្នុងការជំរុញការអភិវឌ្ឍគោលនយោបាយវិស័យឧស្សាហកម្ម ដើម្បីបន្តបង្កើតឱកាសវិនិយោគ ការងារ និងមុ​ខរបរ កាន់តែប្រសើរឡើង។

ឯកឧត្តមបានបន្ថែមថា ចាប់តាំងពីថ្ងៃទី២០ខែសីហា ឆ្នាំ២០១៧ ដល់ថ្ងៃទី១ ខែឧសភា ឆ្នាំ២០១៩ ប្រមុខរាជរដ្ឋាភិបាលកម្ពុជា បានជួបសំណេះសំណាលជាមួយបងប្អូនកម្មករនិយោជិតចំនួន ៧៧ លើក ដែលមានសរុបប្រមាណជាងមួយលាននាក់ ដោយក្នុ​ងនោះមានពីរលើក បានធ្វើឡើងនៅតំបន់សេដ្ឋកិច្ចពិសេសក្រុងព្រះសីហនុ។ ​គិតមកដល់ត្រឹម​ថ្ងៃទី២២ ខែឧសភា ឆ្នាំ២​០​២៣ ការជួបសំណេះសំណាលជាមួយកម្មករនិយោជិតរបស់លោកនាយករដ្ឋមន្រ្តី ហ៊ុន សែន មានចំនួន ៨០ លើក។

ឯ អុិត សំហេង បានបញ្ជាក់ថា ៖ «តាមរយៈកម្មវិធីសំណេះសំណាលនេះ សម្តេចតេជោ បានផ្តល់អនុសាសន៍គន្លឹះ១០ចំណុច ដែលបានសម្រួលដល់បរិយាការវិនិយោគ, ផ្តល់នូវការលើកម្ពស់សិទ្ធិអត្ថប្រយោជន៍​ និងកិច្ចគាំពារសង្គមយ៉ាងច្រើន ដល់បងប្អូនកម្មករនិយោជិត ហើយក្រសួង​ក៏​បាន និងកំពុងសហការជាមួយក្រសួងស្ថាប័ន ដោយបាន​អនុវត្តអនុសាសន៍​ជោ​គជ័យផងដែរ​»។

បើតាមរដ្ឋមន្រ្តីក្រសួងការងារ ស្ថានភាពទីផ្សារការងារនៅកម្ពុជាមានភាពរឹងមាំដោយ រក្សាបាននូវអត្រាមានការងារធ្វើខ្ពស់ប្រមាណ ៩៩,៣ភាគរយ នៃកម្លាំងពលកម្មសរុបចំនួនប្រមាណ ១០,៨លាននាក់។ បច្ចុប្បន្ន សហគ្រាស គ្រឹះស្ថានសេដ្ឋកិច្ចក្នុងប្រព័ន្ធដែលបានចុះបញ្ជីនៅក្រសួងការងារ និងបណ្តុះបណ្តាលវិជ្ជាជីវៈ មានចំនួន ១៧ ១០២ សហគ្រាស ដែលមានកម្មករនិយោជិតចំនួន ១,៥ លាននាក់៕ ដោយ៖ វណ្ណ សុជាតា