ភ្នំពេញ៖ សម្ដេចតេជោ ហ៊ុន សែន បានមានប្រសាសន៍ថា ឯកឧត្តម ឯកអគ្គរដ្ឋទូតបារាំង សុំឲ្យបារាំងនាំមុខក្នុងការចរចារជាមួយធនាគារអឺរ៉ុប និងសហភាពអឺរ៉ុប ផ្ដល់ជំនួយឥតសំណងបន្ថែមមកជំហានទី៣ សូមអរគុណទុកឲ្យហើយ។ ខ្ញុំតែជួប ខ្ញុំសុំហើយ ព្រោះខ្ញុំមិនមែនសុំយកទៅធ្វើផ្ទះឯណា ខ្ញុំសុំដើម្បីសេចក្ដីត្រូវការរបស់ប្រជាពលរដ្ឋ។

តាមរយៈឯកអគ្គរដ្ឋទូតបារាំង សម្ដេចតេជោ ហ៊ុន សែន បានថ្លែងអំណរគុណយ៉ាងជ្រាលជ្រៅដល់រដ្ឋាភិបាល នៃសាធារណរដ្ឋបារាំង ដែលកន្លងមក សម្ដេចតែងស្នើឲ្យបារាំង បន្ដការជួយដល់ការអភិវឌ្ឍរបស់កម្ពុជា ក្នុងនោះមានទាំងវិស័យទឹកនេះផងដែរ។ ដូច្នេះសម្ដេចសង្ឃឹមថា ទីភ្នាក់ងារបារាំងសម្រាប់ការអភិវឌ្ឍ (AFD) បន្ដមានវត្តមានជួយក្នុងការអនុវត្តគម្រោងបន្ដបន្ទាប់ ពិសេសជំហានទី៣។

ពាក់ព័ន្ធការអភិវឌ្ឍរោងចក្រផលិតទឹកស្អាតនេះ សម្ដេចតេជោ ហ៊ុន សែន បានអះអាងថា ប្រសិនបើមិនឲ្យកម្ពុជា ពឹងបារាំងដើម្បីជួយសាងសង់ តើឲ្យកម្ពុជាទៅពឹងអ្នកណា? ដូច្នេះនេះជារឿងពិតដែលបារាំងបានចូលរួមចំណែកអភិវឌ្ឍន៍រោងចក្រផលិតទឹកស្អាតនៅកម្ពុជា ក្នុងនោះមានទាំងរោងចក្រនៅសង្កាត់និរោធន៍ ខណ្ឌព្រែកព្នៅ រហូតដល់រោងចក្រនៅសង្កាត់បាក់ខែង ខណ្ឌជ្រោយចង្វារ ដែលជាប្រភពផ្គត់ផ្គង់ធំជាងគេ។

ជាមួយនឹងសំណើស្នើសុំឲ្យជួយបន្ដនេះ, សម្ដេចតេជោ ហ៊ុន សែន បានថ្លែងទៅកាន់ភាគីបារាំង និងសហភាពអឺរ៉ុប កុំឲ្យមានការព្រួយបារម្ភរឿងសំណងដែលកម្ពុជាបានខ្ចី ពោល រដ្ឋាករទឹករាជធានីភ្នំពេញ មានលទ្ធភាពគ្រប់គ្រាន់ដើម្បីសងត្រឡប់ទៅវិញនៅពេលណាមួយ ព្រោះទឹកទាំងអស់នេះ បូមទៅលក់ ហើយយកលុយចំណេញអភិវឌ្ឍន៍បន្ដមួយផ្នែក និងមួយផ្នែកទៀត ទុកដើម្បីសងត្រឡប់ទៅវិញ។

សម្ដេចតេជោ នាយករដ្ឋមន្ត្រី បានស្នើទៅបារាំង និងសហភាពអឺរ៉ុបដូច្នេះ ក្នុងពិធីសម្ពោធរោងចក្រផលិតទឹកស្អាតបាក់ខែង ជំហានទី១ ចំណាយថវិកា ២៤៧លានដុល្លារ នៅព្រឹកថ្ងៃទី១៩ ខែមិថុនា ឆ្នាំ២០២៣។ សម្រាប់ជំហានទី១ ទីភ្នាក់ងារបារាំងសម្រាប់ការអភិវឌ្ឍ (AFD) ផ្ដល់ថវិកាចំនួន ៨៥លានដុល្លារ ធនាគារវិនិយោគអឺរ៉ុប (EIB) ថវិកាចំនួន ១០០លានដុល្លារ និងហិរញ្ញប្បទានឥតសំណងពីសហភាពអឺរ៉ុប (EU) ចំនួន ១៥លានដុល្លារ។ ដោយឡែករាជរដ្ឋាភិបាលទទួលបន្ទុកពន្ធក្នុងការនាំចូលសម្ភារទាំងឡាយ ៕

អត្ថបទ ៖ ស៊ូ វណ្ណលុក ថត ៖ វេង លឹមហួត , សួង ពិសិដ្ឋ