បុគ្គលបម្រើការក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធ អាចប្រើប្រាស់របបថែទាំសុខភាពតាមប្រព័ន្ធមូលនិធិសមធម៌សុខាភិបាល
ភ្នំពេញ៖ ក្រសួងធំៗចំនួនបីបានចេញប្រកាសអន្តរក្រសួងស្តីពីរបបថែទាំសុខភាពតាមប្រព័ន្ធមូលនិធិសមធម៌សុខាភិបាលសម្រាប់បុគ្គលបម្រើការក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធហើយត្រូវបានសម្រេចឱ្យអនុវត្តផងដែរចាប់ពីដើមសប្តាហ៍នេះ។
យោងតាមប្រកាសអន្តរក្រសួង ចុះថ្ងៃទី១៩ ខែមិថុនា ឆ្នាំ២០២៣ ដោយមានថ្នាក់ដឹកនាំ ក្រសួងចំនួនបី បានចុះហត្ថលេខារួមមានឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ,ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល និងឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ។
ប្រកាសនេះបានបញ្ជាក់ថា និយោជក ឬម្ចាស់សហគ្រាស គ្រឹះស្ថាន ក្នុងវិស័យសេវាកម្សាន្តទេសចរណ៍ នៃសេដ្ឋកិច្ចក្រៅប្រព័ន្ធត្រូវរៀបចំបញ្ជីឈ្មោះបុគ្គលបម្រើក្នុងសេវាកម្សាន្តទេសចរណ៍របស់ខ្លួន ហើយបញ្ជូនទៅរដ្ឋបាលរាជធានីខេត្ត ឬក្រុង/ស្រុក/ខណ្ឌសម្រាប់ផ្ទៀងផ្ទាត់ពីភាពត្រឹមត្រូវ មុននឹងស្នើទៅបេឡាជាតិរបបសន្តិខសុខសង្គម (ប.ស.ស) ដើម្បីចុះបញ្ជី។
ជាមួយគ្នានេះដែរ ប្រកាសអន្តរក្រសួងក៏បានលើកឡើងដែរថា បុគ្គលបម្រើការងារដែលមិនស្ថិតក្រោមកិច្ចសន្យាការងារក្នុងវិស័យសេវាកម្សាន្តនៃសេដ្ឋកិច្ចក្រៅប្រព័ន្ធ មានសិទ្ធិដាក់ពាក្យស្នើសុំបណ្ណមូលនិធិសមធម៌សុខាភិបាលដោយផ្ទាល់ទៅរដ្ឋបាលរាជធានី-ខេត្ត ឬក្រុង/ស្រុក/ខណ្ឌ សម្រាប់ផ្ទៀងផ្ទាល់ពីភាពត្រឹមត្រូវ មុននឹងស្នើទៅប.ស.ស ដើម្បីចុះបញ្ជី។
សូមបញ្ជាក់ថា ប.ស.ស ជាអ្នកទទួលបន្ទុកចុះបញ្ជី និងចេញបណ្ណមូលនិធិសមធម៌សុខាភិបាល (បណ្ណ ម.ស.ស) ដល់បុគ្គលបម្រើការក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធ ហើយបណ្ណ ម.ស.ស មានសុពលភាពរយៈពេល១ឆ្នាំ។
ប្រកាសអន្តរក្រសួងបានលើកឡើងដែរថា រាល់ការចំណាយលើការផ្តល់សេវាថែទាំសុខភាពសម្រាប់បុគ្គលបម្រើការក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធតាមប្រព័ន្ធមូលនិធិសមធម៌សុខាភិបាលត្រូវហិរញ្ញប្បទានដោយថវិការដ្ឋ។
ប្រភពដដែលបានបន្តថា ក្រុមប្រឹក្សាជាតិគាំពារសង្គមមានតួនាទីដឹកនាំការតាមដាន ត្រួតពិនិត្យប្រសិទ្ធភាព និងការវាយតម្លៃវឌ្ឍនភាពនៃការអនុវត្តមូលនិធិសមធម៌សុខភាភិបាល ហើយប្រធានក្រុមប្រឹក្សាជាតិគាំពារសង្គម មានសិទ្ធិចាត់តាំងមន្រ្តីជំនាញពាក់ព័ន្ធចុះពិនិត្យ និងសង្កេតជាក់ស្តែងដល់ទីកន្លែង អំពីប្រសិទ្ធភាពនៃការអនុវត្តកម្មវិធីនេះ។
បើតាមប្រកាសអន្តរក្រសួង បុគ្គលបម្រើសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធ ត្រូវប្រើប្រាស់សេវាសុខាភិបលាតាមប្រព័ន្ធផ្តល់សេវាពីថ្នាក់បឋមនៅមូលដ្ឋានសុខាភិបាលថ្នាក់ទាបទៅមូលដ្ឋានសុខាភិបាលថ្នាក់ខ្ពស់ជាង។ ក្នុងករណីសង្រ្គោះបន្ទាន់, ជនរងគ្រោះ ឬអ្នកជំងឺអាចទៅទទួលសេវានៅមូលដ្ឋានសុខាភិបាលសាធារណៈដែលនៅជិតបំផុតបាន។
ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា លោក ទូច កុសល បានសាទរចំពោះការប្រកាសអន្តរក្រសួងនេះ ហើយលោកក៏ស្នើឱ្យនិយោជក ឬម្ចាស់សហគ្រាស គួរតែយកចិត្តទុកដាក់ និងរូតរះក្នុងចុះឈ្មោះបុគ្គលិករបស់ពួកគាត់ក្នុងបញ្ជីជាមួយប.ស.សដើម្បីពួកគេបានទទួលនូវអត្ថប្រយោជន៍នេះផងដែរ។លោកបានប្រាប់ថា វាជារឿងល្អមួយសម្រាប់បុគ្គលិកបម្រើការក្នុងសេវាកម្សាន្តទេសចរណ៍ នៃសេដ្ឋកិច្ចក្រៅប្រព័ន្ធ ដោយសារពួកគាត់អាចទទួលបាននូវសេវាព្យាបាលសុខភាពនៅពេលដែលគាត់ឈឺ ដែលនឹងអាចចូលរួមបកាត់បន្ថយការចំណាយថវិកាផ្ទាល់ខ្លួនបានមួយចំនួនដែរ។
សូមរំឮកដែរថា រាជរដ្ឋាភិបាលកម្ពុជា កាលពីថ្ងៃទី១២ ខែមិថុនា បានប្រកាសផ្ដល់របបថែទាំសុខភាព តាមប្រព័ន្ធមូលនិធិសមធម៌សុខាភិបាល សម្រាប់បុគ្គលបម្រើការក្នុងសេវាកម្សាន្ត ទេសចរណ៍ នៃសេដ្ឋកិច្ចក្រៅប្រព័ន្ធ ដើម្បីធានាឱ្យប្រជាជនគ្រប់រូបអាចកាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុ។
សេចក្ដីប្រកាសបានបញ្ជាក់ថា ៖ «ក្នុងបរិការណ៍នៃសុខសន្ដិភាព និងស្ថេរភាពនយោបាយ, រាជរដ្ឋាភិបាលតែងតែងគិតគូរយ៉ាងមធ្យ័ត អំពីសុខុមាលភាពរបស់ប្រជាជនកម្ពុជាគ្រប់រូប ដោយឈរលើគោលនយោបាយ មិនបោះបង់ពលរដ្ឋណាម្នាក់ឡើយ»។
ការសម្រេចផ្ដល់របបថែទាំសុខភាព តាមប្រព័ន្ធមូលនិធិសមធម៌សុខាភិបាល សម្រាប់បុគ្គលបម្រើការក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធ ដែលបម្រើការនៅតាមរង្គសាល ឌីស្កូតែក ខារ៉ាអូខេ បៀរហ្កាឌិន កន្លែងម៉ាស្សា និងស្ប៉ា ស្របតាមលិខិតបទដ្ឋានគតិយុត្ដជាធរមាន ដែលរដ្ឋនឹងរាប់រងនូវចំណាយទាំងស្រុង៕ ដោយ៖ នាង សុគន្ធា
