អាមេរិក និងចិនរំពឹងស្តារឡើងវិញនូវកិច្ចសហប្រតិបត្តិការអាកាសធាតុ
អាមេរិក៖ សហរដ្ឋអាមេរិក និងចិន រំពឹងលើការស្តារឡើងវិញនូវកិច្ចខិតខំប្រឹងប្រែងដើម្បីប្រយុទ្ធប្រឆាំងនឹងការប្រែប្រួលអាកាសធាតុ ដែលជាក្ដីព្រួយបារម្ភសកល ក្នុងកិច្ចប្រជុំទ្វេភាគីនាសប្ដាហ៍នេះ ខណៈភាពតានតឹងរវាងប្រទេសទាំងពីរលើវិស័យផ្សេងៗទៀតនៅតែបន្ត។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
កិច្ចប្រជុំចុងក្រោយ ធ្វើឡើងខណៈប្រទេសដែលបញ្ចេញឧស្ម័នផ្ទះកញ្ចក់ដ៏ធំបំផុតរបស់ពិភពលោកទាំង២ ធ្វើការដើម្បីរក្សាស្ថិរភាពទំនាក់ទំនងដែលតានតឹងដោយសារជម្លោះពាណិជ្ជកម្ម បញ្ហាយោធា និងការចោទប្រកាន់ពីបទចារកម្មផ្សេងៗជាដើម។
លោក John Kerry បេសកជនពិសេសរបស់សហរដ្ឋអាមេរិក ទទួលបន្ទុកលើបញ្ហាអាកាសធាតុ បានធ្វើដំណើរទៅដល់ទីក្រុងប៉េកាំងនៅថ្ងៃអាទិត្យនេះ ដើម្បីពិភាក្សាជាមួយសមភាគីចិន លោក Xie Zhenhua ចាប់ពីថ្ងៃចន្ទដល់ថ្ងៃពុធ។ កិច្ចពិភាក្សារវាងមន្រ្តីទាំង២ នឹងផ្តោតលើបញ្ហានានា រួមទាំងការកាត់បន្ថយការបំភាយឧស្ម័នមេតាន ការកំណត់ការប្រើប្រាស់ធ្យូងថ្ម ការទប់ស្កាត់ការកាប់បំផ្លាញព្រៃឈើ និងការជួយប្រទេសក្រីក្រដោះស្រាយការរងគ្រោះដោយសារការប្រែប្រួលអាកាសធាតុជាដើម។
អ្នកសង្កេតការណ៍បាននិយាយថា មន្រ្តីទាំងពីរក៏ទំនងនឹងពិភាក្សាអំពីការជំទាស់របស់ប្រទេសចិន ចំពោះពន្ធរបស់សហរដ្ឋអាមេរិក និងការរឹតបន្តឹងផ្សេងទៀតលើការនាំចូលបន្ទះស្រូបពន្លឺព្រះអាទិត្យ(ផ្ទាំងសូឡា) និងសមាសធាតុថ្មអាគុយរបស់ចិនផងដែរ។
កន្លងមក ទីក្រុងវ៉ាស៊ីនតោនបានស្វែងរកការការពារក្រុមហ៊ុនផលិតរបស់សហរដ្ឋអាមេរិក ពីដៃគូប្រកួតប្រជែងនៅចិន រួមទាំងក្រុមហ៊ុនចិនដែលខ្លួនសង្ស័យថាបានប្រើប្រាស់កម្លាំងពលកម្មដោយបង្ខំដូចជានៅតំបន់ស៊ីនជាំង ជាដើម។
ជុំវិញកិច្ចពិភាក្សានេះ លោក Kerry បានលើកឡើងពីគោលបំណងរបស់លោកសម្រាប់ដំណើរទស្សនកិច្ចទៅកាន់ប្រទេសចិននាពេលនេះ កាលពីថ្ងៃព្រហស្បតិ៍ថា៖ «អ្វីដែលយើងកំពុងព្យាយាមសម្រេចបាននៅពេលនេះ គឺពិតជាបង្កើតស្ថេរភាពខ្លះជាមួយទំនាក់ទំនងដោយគ្មានការយល់ព្រមលើអ្វីទាំងអស់»។
លោក Kerry គឺជាមន្ត្រីអាមេរិកទី៣បន្ទាប់ពីរដ្ឋមន្ត្រីការបរទេស លោក អ៊ែនថូនី ប្ល៊ីងកែន និងរដ្ឋមន្ត្រីក្រសួងរតនាគារ លោកស្រី ចាណិត យ៉េឡេន ដែលបំពេញទស្សនកិច្ចនៅប្រទេសចិនក្នុងឆ្នាំនេះ ដើម្បីព្យាយាមបង្កើតទំនាក់ទំនងទ្វេភាគីដែលមានស្ថិរភាពឡើងវិញ។
ប្រទេសទាំង២និយាយថា ខ្លួនគួរតែអាចសហការគ្នាលើការប្រែប្រួលអាកាសធាតុ ដោយមិនគិតពីការខ្វែងគំនិតគ្នាលើបញ្ហាផ្សេងៗទៀតនោះទេ។ អ្នកវិភាគនិយាយថា ការប្រែប្រួលអាកាសធាតុនៅតែជាគោលសម្រាប់ប្រទេសទាំង២ ដែលទំនាក់ទំនងទ្វេភាគីដ៏សំខាន់បំផុតរបស់ពិភពលោក៕
ប្រែសម្រួល៖ហួន ឌីណា
ប្រភព៖ US, China aim to revive climate cooperation as tensions simmer https://www.reuters.com/world/us-china-aim-revive-climate-cooperation-tensions-simmer-2023-07-16/
