ភ្នំពេញ៖ SOGO និង សេវាកម្មផ្លាស់ប្តូរវប្បធម៌សិក្សាអន្តរជាតិកម្ពុជា បានរៀបចំព្រឹត្តិការណ៍វគ្គតម្រង់ទិសដោយផ្ទាល់ សម្រាប់សិស្សានុសិស្ស ICES ដើម្បីត្រៀមខ្លួនធ្វើដំណើរមុនការចាកចេញទៅសិក្សាលើកម្មវិធីផ្លាស់ប្តូរការសិក្សារបស់ពួកគេនៅសហរដ្ឋអាមេរិក ។ SOGO ICES ជាកម្មវិធីសិក្សានៅក្រៅប្រទេសដែលផ្តល់ឱកាសសម្រាប់សិស្សានុសិស្ស កម្ពុជា ដែលចង់បន្តការសិក្សានៅសហរដ្ឋអាមេរិក ចក្រភពអង់គ្លេស កាណាដា និងប្រទេសដទៃទៀត។

គួរជម្រាបថា កម្មវិធីនេះផ្តល់ជូននូវកម្មវិធីផ្លាស់ប្តូរវប្បធម៌សិក្សា និងកម្មវិធីសិក្សាថ្នាក់វិទ្យាល័យ។ SOGO ត្រូវបានបើកដំណើរការជាផ្លូវការនៅថ្ងៃទី៨ ខែសីហា ឆ្នាំ២០២២ ដើម្បីឆ្លើយតបទៅនឹងការកើនឡើងនៃតម្រូវការរបស់សិស្សដែលចង់បន្តការសិក្សានៅបរទេស និងដើម្បីជួយសិស្សកម្ពុជាសម្រេចក្តីសុបិននៃការសិក្សារបស់ពួកគេ។ ក្រុមការងារ SOGO មានជំនាញក្នុងការធ្វើបដិរូបកម្ម និងបង្កើតជម្រើសដ៏ល្អបំផុត ដើម្បីបំពេញតម្រូវការអ្នកសិក្សាផ្សេងៗ ។

ព្រឹត្តិការណ៍តម្រង់ទិស ក៍ដូចជា pre-departure orientation គឺជាព្រឹត្តិការណ៍ដ៏សំខាន់មួយ ក៍ជាលើកដំបូងដែរ ដែល SOGO រៀបចំព្រឹត្តិការណ៍នេះដោយផ្ទាល់ក្រោយពីការរីករាលត្បាតនៃជំងឺ Covid 19។ កម្មវិធីនេះធ្វើឡើងក្រោមវត្តមានអ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន ក៏ដូចជាអ្នកជំនាញផ្លាស់ប្តូរការសិក្សាពី ICES Thailand ។

សិស្សានុសិស្ស និងមាតាបិតាមានសេចក្តីសោមនស្សរីករាយចំពោះការស្វែងយល់បន្ថែមអំពីកម្មវិធីសិក្សារបស់បុត្រា បុត្រី។ លើសពីនេះ សិស្សានុសិស្សផ្ទាល់បានជួបសំណេះសំណាលជាមួយសិស្សច្បងដែលបានឆ្លងកាត់បទពិសោធន៍ក្រោយត្រឡប់មកពីសហរដ្ឋអាមេរិកវិញផងដែរ ។

ព្រឹត្តិការណ៍តម្រង់ទិសធ្វើឡើងផ្តោតលើប្រធានបទជាច្រើន រួមមាន៖ អំពីវប្បធម៌ គ្រួសារចិញ្ចឹម សាលារៀន ការហោះហើរ ការធានារ៉ាប់រង ។ល។ សិស្សានុសិស្ស និងមាតាបិតា ក៏មានឱកាសជួបជាមួយអ្នកជំនាញផ្លាស់ប្តូរការសិក្សាពី ICES Thailand ដែលបានចែករំលែកបទពិសោធន៍ផ្ទាល់របស់ពួកគេក្នុងការសិក្សានៅសហរដ្ឋអាមេរិក ។

លោក William Hopkins ជំនួយការនាយក SOGO និង ICES Cambodia បានឱ្យដឹងថា យើងមានមោទកភាពក្នុងការប្រារព្ធកម្មវិធីពិសេសនេះឡើងសម្រាប់សិស្សានុសិស្សយើង ដើម្បីទទួលបាននូវបទពិសោធន៍វប្បធម៌ និងស្តង់ដារនៃការអប់រំរបស់អាមេរិក។ លើសពីនេះ SOGO ផ្តល់នូវដំណោះស្រាយតែមួយគត់ជាមួយនឹងសេវាកម្មអប់រំនៅក្រៅប្រទេសដ៏ទូលំទូលាយដោយផ្អែកលើជម្រើសតម្រូវការរបស់អ្នកក្នុងសេវាកម្មជាច្រើនដូចជា៖ ជំនួយទិដ្ឋាការ, ការបណ្តុះបណ្តាលវប្បធម៌, ការស្វែងរកគ្រួសារចិញ្ជឹម និងការគាំទ្រផ្នែកសិក្សា ដើម្បីជួយសិស្សានុសិស្សរៀបចំសម្រាប់ការសិក្សានាថ្ងៃអនាគតរបស់ពួកគេ ៕

អត្ថបទ៖ វណ្ណលុក, រូបភាព៖ សួង ពិសិដ្ឋ