សមត្ថកិច្ចនគរបាលបានថ្លែងនៅថ្ងៃនេះថា ក្មេងទំនើងចំនួន ២៧នាក់ ដែលជិះបង្ហោះម៉ូតូ និងបំពងសម្លេងរំខាន ត្រូវបានឃាត់ខ្លួននៅក្នុងខណ្ឌចំនួន៧ នៃភូមិសាស្រ្តទូទាំងរាជធានីភ្នំពេញ។

ក្មេងទំនើងបង្ហោះម៉ូតូ គឺជាគោលដៅបង្ក្រាបដាក់ចេញដោយសម្តេចធិបតីនាយករដ្ឋមន្ត្រី ហ៊ុន ម៉ាណែត ដើម្បីភូមិឃុំមានសុវត្ថិភាព។

យោងតាមបទបញ្ជាម៉ូតូរបស់ក្មេងទំនើងនឹងត្រូវឃាត់ទុករយៈពេល៣ខែ ក្នុងបទល្មើសលើក ទី១ និងឃាត់ទុកដល់៦ខែ ចំពោះបទល្មើសដដែលជាលើកទី២។

ម៉ូតូចំនួន ២០គ្រឿង របស់ក្មេងទំនើងទាំង ២៧នាក់ ត្រូវបានដកហូតរក្សាទុក។ ការបង្ក្រាបក្មេងទំនើងបង្ហោះម៉ូតូនេះ បានធ្វើនៅក្នុងខណ្ឌជ្រោយចង្វារ, នៅខណ្ឌមានជ័យ, នៅខណ្ឌកំបូល, ខណ្ឌបឹងកេងកង, ខណ្ឌចំការមន, ខណ្ឌច្បារអំពៅ និងខណ្ឌព្រែកព្នៅ។