តូក្យូ : ទិន្នន័យរបស់រដ្ឋាភិបាល បានឱ្យដឹងថា ប្រជាជនជប៉ុនមានអាយុលើសពី ៦៥ឆ្នាំ បានកើនឡើងក្នុងកម្រិតខ្ពស់បំផុត ដល់ ៣៦.២៥លាននាក់។ នេះបើតាមសេចក្តីរាយការណ៍របស់សារព័ត៌មាន Japan today។

តួលេខនេះ ស្មើនឹង ២៩.៣ភាគរយនៃចំនួនប្រជាជនសរុបរបស់ប្រទេសជប៉ុន ក្នុងឆ្នាំ ២០២៤ កើនឡើង ២០,០០០នាក់ បើធៀបនឹងឆ្នាំ ២០២៣ ធ្វើឱ្យជប៉ុនក្លាយជាប្រទេសមានប្រជាជនវ័យ ៦៥ឆ្នាំឡើងច្រើនជាងគេលើពិភពលោក។

គិតត្រឹមថ្ងៃអាទិត្យទី១៥ ខែកញ្ញា ចំនួនស្ត្រីមានអាយុចាប់ពី ៦៥ឆ្នាំឡើងនៅក្នុងប្រទេសជប៉ុន មានចំនួនប្រហែល ២០.៥៣លាននាក់ ខណៈដែលបុរសមានអាយុដូចគ្នាមានចំនួន ១៥.៧២លាននាក់។

រីឯប្រជាជនប្រហែល ១២.៩០លាននាក់មានអាយុចាប់ពី ៨០ឆ្នាំឡើងទៅ ស្មើនឹង ១០.៤ភាគរយនៃចំនួនប្រជាជនសរុបរបស់ប្រទេសជប៉ុន និងកើនឡើងលើសពីខ្សែបន្ទាត់ ១០ភាគរយសម្រាប់ឆ្នាំទីពីរជាប់ៗគ្នា។

យោងតាមទិន្នន័យបានឱ្យដឹងថា អត្រាប្រជាជនវ័យចំណាស់របស់ប្រទេសជប៉ុននៅតែខ្ពស់បំផុតក្នុងចំណោមប្រទេស និងតំបន់ចំនួន២០០ ដែលមានមនុស្សយ៉ាងតិច ១០០,០០០នាក់។

សមាមាត្រនៃមនុស្សចាស់នៅជប៉ុន ត្រូវបានរំពឹងថា នឹងឈានដល់ ៣៤.៨ភាគរយនៃចំនួនប្រជាជនសរុបនៅឆ្នាំ ២០៤០ នេះបើយោងតាមវិទ្យាស្ថានជាតិស្រាវជ្រាវប្រជាជន និងសន្តិសុខសង្គម៕

ប្រភព : Japan today ប្រែសម្រួលដោយ: ឈឹម ទីណា