បរទេស៖ ប៉ូលិសបាននិយាយកាលពីថ្ងៃសៅរ៍ថា ទឹកជំនន់ និងការបាក់ដី ដែលបង្កឡើងដោយភ្លៀងធ្លាក់ខ្លាំង នៅក្នុងប្រទេសនេប៉ាល់ បានសម្លាប់មនុស្សយ៉ាងហោចណាស់ ៥៩នាក់ នៅទូទាំងប្រទេសមានភ្នំហិម៉ាឡៃយ៉ា មួយនេះ។

អ្នកនាំពាក្យប៉ូលិសនេប៉ាល់ លោក Dan Bahadur Karki បានប្រាប់ AFP ថា៖ «មកទល់ពេលនេះ មានអ្នកស្លាប់ ៥៩នាក់, របួស៣៦នាក់ និង ៤៤នាក់ បាត់ខ្លួន»។

កងកម្លាំងសន្តិសុខជាង ៣,០០០នាក់ ត្រូវបានដាក់ពង្រាយដើម្បីជួយដល់កិច្ចខិតខំប្រឹងប្រែងសង្គ្រោះ និងស្វែងរកមនុស្សបាត់ខ្លួន នៅតំបន់ដែលជន់លិច រួមទាំងមានរដ្ឋធានី Kathmandu។ អាជ្ញាធរបានព្រមានអំពីទឹកជំនន់ដែលអាចកើតមានបន្ថែមទៀត កើនឡើងពីទឹកទន្លេ។

ភ្លៀងមូសុង ចាប់ពីខែមិថុនា ដល់ខែកញ្ញា ជាទូទៅ បណ្តាលឲ្យមានការស្លាប់មនុស្ស និងការបំផ្លិចបំផ្លាញយ៉ាងទូលំទូលាយ ជារៀងរាល់ឆ្នាំ នៅក្នុងប្រទេសនេប៉ាល់ និងទូទាំងអាស៊ីខាងត្បូង ប៉ុន្តែ បញ្ហាទឹកជំនន់ និងការបាក់ដីបានកើនឡើង ក្នុងរយៈពេលប៉ុន្មានឆ្នាំ ចុងក្រោយនេះ៕

ប្រភពពី AFP ប្រែសម្រួល៖ សារ៉ាត