ក្រសួងប្រៃសណីយ៍ បើកកិច្ចពិគ្រោះយោបល់លើសេចក្តីព្រាងសៀវភៅណែនាំ ស្តីពីការគ្រប់គ្រងហិរញ្ញវត្ថុសាធារណៈរបស់ក្រសួង

(ភ្នំពេញ)៖ ឯកឧត្តម ជាប សត្ថារតន៍ រដ្ឋលេខាធិការប្រចាំការក្រសួងប្រៃសណីយ៍ និង ទូរគមនាគមន៍ (ក.ប.ទ.)នៅព្រឹកថ្ងៃទី១៩ ខែវិច្ឆិកា ឆ្នាំ២០២៥ បានអញ្ជើញជាអធិបតីភាពក្នុងពិធីបើកសិក្ខាសាលាពិគ្រោះយោបល់លើសេចក្តីព្រាងសៀវភៅណែនាំស្តីពីការគ្រប់គ្រងហិរញ្ញវត្ថុសាធារណៈរបស់ ក.ប.ទ. ដោយមានការអញ្ជើញចូលរួមពី ថ្នាក់ដឹកនាំ និងមន្ត្រីរាជការ អង្គភាពចំណុះក្រោមឱវាទក្រសួង សរុបប្រមាណ ១៨៥នាក់ នៅសណ្ឋាគារ សុខាភ្នំពេញ។

សិក្ខាសាលានេះរៀបចំឡើងក្នុងគោលបំណងពិគ្រោះយោបល់ និងប្រមូលធាតុចូលពីគ្រប់អង្គភាពអនុវត្ត និងដើម្បីឱ្យសិក្ខាកាមបានស្វែងយល់អំពីវិធាន នីតិវិធី និងទម្រង់បែបបទ ដែលមន្ត្រីជំនាញធ្វើបទបង្ហាញជូន។

ជាមួយគ្នានេះ ឯកឧត្តមរដ្ឋលេខាធិការប្រចាំការ សង្ឃឹមយ៉ាងមុតមាំថា សិក្ខាសាលានេះនឹង ទទួល បានមតិយោបល់ច្រើនសម្រាប់បញ្ចូលបន្ថែម ឬកែលម្អទាំងខ្លឹមសារ នីតិវិធី ទម្រង់បែបបទ ដើម្បីធ្វើឱ្យសេចក្តីព្រាងសៀវភៅណែនាំនេះមានលក្ខណៈគ្រប់ជ្រុងជ្រោយ ដែលអាចអនុវត្តបានទាំងអស់គ្នា៕