ព្យុងយ៉ាង ៖ លោក គីម ជុងអ៊ុន មេដឹកនាំកូរ៉េខាងជើង បាននិយាយថា ប្រទេសរបស់លោកចង់មានទំនាក់ទំនងល្អ ជាមួយសហរដ្ឋអាមេរិក។

ការកត់សម្គាល់ដ៏កម្របែបនេះ របស់លោក គីម ជុងអ៊ុន បានធ្វើឡើង កាលពីថ្ងៃពុធ ដែលជាថ្ងៃចុងក្រោយ នៃមហាសន្និបាតរបស់គណបក្សពលករ។

សារព័ត៌មាន KCNA បានដកស្រង់សម្ដី របស់លោក គីម ជុងអ៊ុន រៀបរាប់ថា «ប្រសិនបើទីក្រុងវ៉ាស៊ីនតោនគោរពឋានៈបច្ចុប្បន្ន នៃប្រទេសរបស់យើង ដូចដែល មានចែងនៅក្នុងរដ្ឋធម្មនុញ្ញ…ហើយលុបចោលគោលនយោបាយអរិភាព…នោះយើងគ្មានហេតុផលអ្វីដែលមិនអាចត្រូវគ្នាជាមួយសហរដ្ឋអាមេរិកនោះទេ»។

បើតាម AFP, ការលើកឡើងរបស់លោក គីម កើតមានឡើង ចំពេលដែលមានការសង្ស័យថា ប្រធានាធិបតីអាមេរិក លោក ដូណាល់ ត្រាំ ប្រហែលជាអាចនឹងស្វែងរកការរៀបចំជំនួប ក្រោមទម្រង់ណាមួយជាមួយលោក គីម ជុងអ៊ុន នាឱកាសដែលរូបលោកធ្វើទស្សនកិច្ច ទៅកាន់ប្រទេសចិន នៅខែមេសា៕

ប្រភពពី AFP ប្រែសម្រួល ៖ សារ៉ាត