នៅថ្ងៃពុធទី២៥កុម្ភៈដែលជាថ្ងៃចុងក្រោយនៃដំណើរទស្សនកិច្ចនៅទ្វីបអឺរ៉ុប សម្តេចបវរធិបតី ហ៊ុន ម៉ាណែត បានផ្តល់បទសម្ភាសផ្តាច់មុខមួយដល់ទីភ្នាក់ងារសារព័ត៌មានបារាំង AFP នៅប្រទេសបែលហ្សិក។ សម្តេចនាយរដ្ឋមន្រ្តីបានគូសបញ្ជាក់ថា មជ្ឈមណ្ឌលឆបោកអនឡាញបានធ្វើឲ្យខូចខាតសេដ្ឋកិច្ចជាតិ និងប៉ះពាល់កេរ្តិ៍ឈ្មោះប្រទេសកម្ពុជា ប៉ុន្តែបដិសេធការចោទប្រកាន់ពីការជាប់ពាក់ព័ន្ធណាមួយរបស់រាជរដ្ឋាភិបាលកម្ពុជាក្នុងបទល្មើសទាំងនេះ។

សម្តេចបវរធិបតីបានលើកឡើងថា អំពើឆបោកតាមបច្ចកវិទ្យាគឺជា «សេដ្ឋកិច្ចខ្មៅ» ដែលកំពុងបំផ្លាញ«សេដ្ឋកិច្ចសុចរិត»របស់កម្ពុជា ហើយធ្វើឲ្យកម្ពុជាមានកេរ្តិ៍ឈ្មោះអាក្រក់។ មិនតែប៉ុណ្ណោះ វាបានបង្អាក់វិស័យទេសចរណ៍ និងការវិនិយោគផងដែរ។

ហេតុដូច្នេះហើយ បានជាកម្ពុជាត្រូវសម្អាតវាចេញ ដើម្បីលើកស្ទួយសកម្មភាពសេដ្ឋកិច្ចពិតប្រាកដ ដូចជាការផលិតសម្រាប់ការនាំចេញ ឧស្សាហកម្មរថយន្ត និងវិស័យបច្ចេកវិទ្យាព័ត៌មាន (IT) — ទាំងនេះមានអត្ថប្រយោជន៍ច្រើនជាងសម្រាប់សេដ្ឋកិច្ចរបស់កម្ពុជា។

យោងតាម AFP សម្តេចធិបតីបានទទួលស្គាល់ថា ឧក្រិដ្ឋកម្មនេះបានជំរុញសកម្មភាពអាជីវកម្មខ្លះៗ ដូចជាវិស័យអចលនទ្រព្យ ការវិនិយោគ ការសាងសង់ និងការទិញ ហើយបានបង្កើតការងារមួយចំនួននៅក្នុងប្រទេស ប៉ុន្តែសម្តេចបានសង្កត់ធ្ងន់ថា កម្ពុជាមិនបានទទួលផលចំណេញពីវានោះឡើយ។

ទីភ្នាក់ងារសារព័ត៌មានបារាំងបានរំលឹកពីរបាយការណ៍ឆ្នាំ២០២៤ របស់វិទ្យាស្ថានសន្តិភាពសហរដ្ឋអាមេរិក ដែលបានប៉ាន់ប្រមាណថា ប្រាក់ចំណូលពីការឆបោកតាមអ៊ីនធឺណិតនៅកម្ពុជា គឺអាចលើសពី ១២.៥ ពាន់លានដុល្លារអាមេរិកក្នុងមួយឆ្នាំ ដែលស្មើនឹងជិតពាក់កណ្តាលនៃផលិតផលក្នុងស្រុកសរុបរបស់កម្ពុជា។

ប៉ុន្តែសម្តេចធិបតី ហ៊ុន ម៉ាណែត បានបដិសេធការចោទប្រកាន់មួយចំនួនដែលថា សេដ្ឋកិច្ចកម្ពុជាពឹងផ្អែកលើការឆបោក។ សម្តេចគូសបញ្ជាក់ថា កម្ពុជាពឹងផ្អែកលើសេដ្ឋកិច្ចសុចរិត ដូចជា ទេសចរណ៍ ផលិតកម្ម និងវិស័យផ្សេងៗទៀ។

ក្នុងបទសម្ភាសជាមួយ AFP សម្តេចបវរធិបតីក៏បានលើកឡើងផងដែរពីជម្លោះព្រំដែនកម្ពុជា-ថៃ ជាពិសេសការខិតខំប្រឹងប្រែងរបស់រាជរដ្ឋភិបាលកម្ពុជាក្នុងការរកដំណោះស្រាយដោយសន្តិវិធី ដោយឈរលើមូលដ្ឋានច្បាប់៕