ប្រធានអង្គភាពប្រឆាំងអំពើពុករលួយឯកឧត្តមកិត្តិនីតិកោសល្យបណ្ឌិត ឱម យិនទៀង បានមានប្រសាសន៍ថា ប្រព័ន្ធ​គាំពារ​សង្គម​អាចដំណើរការបានកាន់តែប្រសើរ លុះត្រាតែមានតម្លាភាព និងគណនេយ្យភាព។តម្លាភាព និងគណនេយ្យភាព ជាសសរស្តម្ភដ៏សំខាន់២នៃអភិបាលកិច្ចល្អ ហើយមានទំនាក់ទំនងជិតស្និទ្ធនឹងគ្នាតែមានអត្ថន័យដាច់ពីគ្នា។

ថ្លែងក្នុង​ «សិក្ខាសាលាផ្សព្វផ្សាយស្តីពីគណនេយ្យភាព និងតម្លាភាពនៃប្រព័ន្ធគាំពារសង្គមកម្ពុជា» កាលពីព្រឹក ថ្ងៃទី១៩ ខែមីនា ឆ្នាំ២០២៦ឡើងឯកឧត្តមកិត្តិនីតិកោសលបណ្ឌិត ឱម យិនទៀង ទេសរដ្ឋមន្ត្រីប្រធានអង្គភាពប្រឆាំងអំពើពុករលួយ
បានបញ្ជាក់ថា គណនេយ្យភាពជាកាតព្វកិច្ចរបស់បុគ្គល ស្ថាប័ន ក្នុងការទទួលខុសត្រូវលើការសម្រេចចិត្ត លើលទ្ធផលនៃ​សកម្មភាពរបស់ខ្លួន។ឯតម្លាភាព គឺជាការបើកចំហរព័ត៌មាន និងដំណើរការ ការងារ ដើម្បីឱ្យអ្នកពាក់ព័ន្ធ សាធារណៈជន អាច​មើលឃើញ អាចយល់បានយ៉ាងច្បាស់។ ហេតុនេះតម្លាភាព ទាក់ទងនឹងការទទួលព័ត៌មានឱ្យបានទាន់ពេល ត្រឹមត្រូវ និងងាយ​យល់មានភាពច្បាស់លាស់ មិនលាក់បាំងនូវរបៀវវារៈ ឬលាក់បាំងផលប្រយោជន៍ផ្ទាល់ខ្លួននៅពី ក្រោយការសម្រេចចិត្ត។ តម្លាភាព តម្រូវឱ្យមានការតាមដាន មានយន្តការត្រួតពិនិត្យដើម្បីធានាថាគ្មានអំពើពុករលួយ ឬការធ្វើខុស។

ឯកឧត្តម បន្ថែមថា កាលណាមានភាពមិនប្រក្រតីណាមួយ ឬអំពើពុករលួយកើតមានឡើង វានឹងអាចបំផ្លាញ និង ជះឥទ្ធិពល​អវិជ្ជមានដល់ទំនុកចិត្តរបស់សាធារណៈ និងធ្វើឱ្យអ្នកដែលត្រូវការជំនួយពិតប្រាកដ មិនទទួលបានអត្ថប្រយោជន៍ត្រឹមត្រូវ។ គណនេយ្យភាព និងតម្លាភាព គឺជាកាតព្វកិច្ចរបស់ស្ថាប័ន សាធារណៈ ក្នុងការទទួលខុសត្រូវចំពោះការប្រើប្រាស់ធនធាន និងលទ្ធផលនៃការអនុវត្ត ការងារ ក្នុងប្រព័ន្ធគាំពារសង្គម វាមានន័យថា ថវិកានិងអត្ថប្រយោជន៍ត្រូវទៅដល់ប្រជាពលរដ្ឋ ដែលត្រូវការពិតប្រាកដដោយគ្មានការលេចធ្លាយនៃអំពើទុច្ចរិត។

កិត្តិនីតិកោសលបណ្ឌិត ឱម យិនទៀង បានបន្ថែមថា«ការភ្ជាប់ការគាំពារ សង្គមជាមួយការប្រឆាំងអំពើពុករលួយ មិនមែនជា​ជម្រើសទេប៉ុន្តែនោះគឺជាកាតព្វកិច្ច»។ដូច្នេះ ដើម្បីចូលរួមធានាបន្តការអភិវឌ្ឍនៅរដ្ឋបាលថ្នាក់ជាតិ និងថ្នាក់ក្រោមជាតិ ដែល​ជាទិសដៅ ជោគជ័យនៅទូទាំងប្រទេសកម្ពុជា ក្រសួងស្ថាប័ន រដ្ឋបាលថ្នាក់ជាតិ និងថ្នាក់ក្រោមជាតិដែលត្រូវ លើកកម្ពស់​គណនេយ្យភាព តម្លាភាព ចំពោះប្រព័ន្ធគាំពារសង្គមតាមស្មារតី «យើងទាំងអស់គ្នា ប្តេជ្ញាចិត្តសហការគ្នា ដើម្បីកសាងប្រព័ន្ធ​ដែលបម្រើប្រជាពលរដ្ឋដោយស្មោះត្រង់ និងប្រសិទ្ធភាព»។

ឯកឧត្តម បណ្ឌិត ចន ណារិទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម បានលើកឡើងថា គិតចាប់តាំងពីឆ្នាំ២០១៧, រាជរដ្ឋាភិបាលសម្រេចបាននូវសមិទ្ធផលជាច្រើនគួរជាទីមោទនៈ លើការអនុវត្ត និងអភិវឌ្ឍប្រព័ន្ធគាំពារសង្គម ដើម្បីផ្តល់ការគាំពារដល់ពលរដ្ឋ តាមរយៈការពង្រីកវិសាលភាព នៃការអនុវត្តកម្មវិធីជាតិ​ជំនួយសង្គម និងរបបសន្តិសុខសង្គម ដែលមានស្រាប់ និងការដាក់ចេញនូវកម្មវិធីជាតិជំនួយសង្គម និងរបបសន្តិសុខសង្គមថ្មីៗ ជាបន្តបន្ទាប់បន្ថែមទៀត។

កម្មវិធីជាតិជំនួយសង្គម និងរបបសន្តិសុខសង្គម បានពង្រីកវិសាលភាពលើសមុន ជាង ២ ដង
ខណៈ​ការគ្របដណ្តប់ពលរដ្ឋបានកើនឡើង ពីចំនួនត្រឹមតែ ៣,៣ លាននាក់ កាលពីឆ្នាំ២០១៧ រហូតដល់ជាង ៧,៩ លាននាក់ ក្នុងឆ្នាំ២០២៥ ដោយក្នុងនោះរបបសន្តិសុខសង្គម បាន និងកំពុងគ្របដណ្តប់ពលរដ្ឋ សរុបប្រមាណ ៣,៩ លាននាក់។

គិតត្រឹមដំណាច់ឆ្នាំ២០២៥ កន្លងទៅនេះ, កម្មវិធីជាតិជំនួយសង្គម មានវិសាលភាពគ្របដណ្តប់ពលរដ្ឋគោលដៅសរុបចំនួនប្រមាណ ៤,៨៤ លាននាក់ (ឬស្មើនឹងប្រមាណ ២៨ % នៃពលរដ្ឋសរុប) ដោយក្នុងឆ្នាំ២០២៥ រាជរដ្ឋាភិបាលបានវិភាជថវិការដ្ឋចំនួនប្រមាណ ១ ០២៧,៦ ប៊ីលានរៀល ឬស្មើនឹង ២៥៧ លានដុល្លារអាម៉េរិក ។ សម្រាប់ជ្រុងនៃការអនុវត្តរបបសន្តិសុខសង្គម, គិតត្រឹមឆ្នាំ២០២៥ របបសន្តិសុខសង្គមបានគ្របដណ្តប់ពលរដ្ឋប្រមាណ ៣,៥ លាននាក់ ដោយក្នុងឆ្នាំ២០២៥ រាជរដ្ឋាភិបាល បានវិភាជថវិកាជាតិប្រមាណ ១ ៧០០ ប៊ីលានរៀល ឬស្មើនឹងប្រមាណ ៤២៥ លានដុល្លារអាម៉េរិក បន្ថែមលើថវិកាភាគទានដែលប្រមូលបានពីសមាជិក ប.ស.ស. ដើម្បីអនុវត្តរបបសន្តិសុខសង្គមចំនួន ៣ ធំៗ រួមមាន៖ ១. របបសន្តិសុខសង្គមផ្នែកប្រាក់សោធន, ២. របបសន្តិសុខសង្គមផ្នែកថែទាំសុខភាព, និង ៣. របបសន្តិសុខសង្គមផ្នែកហានិភ័យការងារ៕

អត្ថបទ៖ង៉ាន់ ទិត្យ
រូបភាបព៖រិន រចនា