(កោះកុង)៖ កោះទទឹង រីស្សត (Koh totung Resort) បានបើកដំណើរការសាកល្បងនៅថ្ងៃសុក្រ ២កើត ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២០ ខែមីនា ឆ្នាំ២០២៦។ ដូច្នេះ សូមរីករាយទទួលយកបទពិសោធន៍សម្រាកលំហែកាយលើកោះឯកជនដ៏ស្ងប់ស្ងាត់នៃទឹកដីខេត្តកោះកុង នៃព្រះរាជាណាចក្រកម្ពុជា។

ការបើកដំណើរការនៃរមណីយដ្ឋានដ៏វិសេសវិសាលនៅលើកោះដែលមានលក្ខណៈជាកោះធម្មជាតិ គឺជាការបង្ហាញពីការរីកចម្រើនថ្មីមួយទៀត ក្នុងវិស័យទេសចរណ៍ក្នុងព្រះរាជាណាចក្រកម្ពុជា។

ការធ្វើដំណើរមកកាន់កោះទទឹង រីស្សត មិនមែនគ្រាន់តែជាការស្នាក់នៅប៉ុណ្ណោះទេ ប៉ុន្តែគឺជាការផ្សារភ្ជាប់ខ្លួនទៅក្នុងបទពិសោធន៍ដែលនាំឱ្យលោកអ្នកបានស្គាល់ពីអរិយធម៌ និងជីវភាពរស់នៅរបស់ប្រជាជនខ្មែរក្នុងអតីតកាល។ នៅលើកោះដ៏ស្ងប់ស្ងាត់នេះ មានរុក្ខជាតិច្រើនប្រភេទយ៉ាងត្រឈឹងត្រឈៃ អមដោយឆ្នេរខ្សាច់សក្បុសដ៏ស្រស់ស្អាត លាតសន្ធឹងប្រវែង ២០០០ម៉ែត្រ ប្របនឹងជើងមេឃពណ៌ខៀវស្រងាត់ដ៏ធំល្វឹងល្វើយ។ រាល់គ្រប់ផ្ទះវិឡា ត្រូវបានរៀបចំយ៉ាងសម្អិតសម្អាងហ្មត់ចត់ដែលព័ទ្ធជុំវិញដោយព្រៃព្រឹក្សាស្រស់បំព្រង ដើម្បីផ្តល់នូវលំហដ៏ធំទូលាយ ភាពត្រជាក់ត្រជុំ និងឯកជនភាព។

ភាពប្រណីតនៃរមណីយដ្ឋាន គឺកាន់តែទាក់ទាញឱ្យភ្ញៀវទេសចរជាតិ និងអន្តរជាតិចង់មកស្នាក់នៅ និងលំហែរកាន់តែខ្លាំង ព្រមទាំងទទួលបានបទពិសោធន៍តាមរយៈការទស្សនាឆ្នេរខ្សាច់ ទឹកសមុទ្រដ៏ខៀវស្រងាត់ ព្រៃឈើធម្មជាតិ និងផ្កាថ្មចម្រុះពណ៌នៃសមុទ្រកម្ពុជា។ បរិយាកាសដ៏ស្ងប់ស្ងាត់របស់កោះនេះ គឺជា គោលដៅទេសចរណ៍ដ៏ទាក់ទាញភ្ញៀវទេសចរមកពីបណ្តាប្រទេសជុំវិញពិភពលោក។ កោះទទឹង រីស្សត ផ្តល់ជូននូវភាពសាមញ្ញតាមបែបទំនើបថ្មីមួយទៀត ប៉ុន្តែពោរពេញទៅដោយភាពហ្មត់ចត់ និងប្រណីតភាព។

កោះទទឹង រីស្សត មានវីឡាស្នាក់នៅចំនួន២៤ រួមមាន៖ ម៉ូតផ្ទះឈើបែបខ្មែរបុរាណ និងសហសម័យ។ ទីនេះក៏មានភោជនីយដ្ឋានធំទូលាយដែលផ្តល់ជូននូវជម្រើសអាហារដែលពោរពេញដោយការច្នៃប្រឌិតចេញពីមុខម្ហូបប្រពៃណីខ្មែរ ឱ្យទៅជាម្ហូបបែបសម័យទំនើបដ៏មានឱជារស រួមទាំងអាស៊ី និងអឺរ៉ុប។ ភោជនីយាភិរម្យ (Bhojaniyabhiramya) និងភិរម្យធើរេស (BhiramyaTerrace) ផ្តល់ជូននូវមុខម្ហូបដ៏ឈ្ងុយឆ្ងាញ់ ដែលប្រើប្រាស់បន្លែសរីរាង្គ។ ចំណែកនៅឯ បារឆ្នេរសមុទ្រ (Sun rise pool and bar) ភ្ញៀវទេសចរទាំងអស់អាចរីករាយជាមួយភេសជ្ជៈគ្រប់ប្រភេទ រួចគយគន់ពន្លឺព្រះអាទិត្យរះឡើងពីទិសបូព៌ា ធ្វើឱ្យផ្ទៃ សមុទ្រប្រែពណ៌ គួរឱ្យចង់គយគន់មិនចេះជិនណាយ។

កោះទទឹង រីស្សិត គឺជាកោះឯកជនរបស់កម្ពុជាមួយដែលត្រូវបានកំណត់ជាទីកន្លែងសម្រាកលំហែកាយដ៏ប្រណីត។ រីស្សតនេះនឹងទាក់ទាញភ្ញៀវទេសចរគ្រប់ទិសទី រាប់ចាប់ពីបុគ្គល ក្រុមគ្រួសារ និងអ្នកធ្វើដំណើរទាំងឡាយដែលស្វែងរកភាពឯកជនដ៏ពិសេសនេះ ដើម្បីបានស្គាល់ពីវប្បធម៌ខ្មែរផងដែរ។ លើសពីការ កម្សាន្តទាំងនេះភ្ញៀវទេសចរណ៍ក៏អាចស្វែងយល់ឱ្យកាន់តែស៊ីជម្រៅធនធានធម្មជាតិកម្រផ្សេងៗទាំងនៅលើគោក និងក្នុងសមុទ្រ។

Zen Tower ត្រូវបានរចនាឡើងដើម្បីផ្តល់នូវបរិយាកាសដ៏ប្លែកម៉្យាងជូនភ្ញៀវទេសចរដែលបានមកស្នាក់នៅទីនេះ ហើយនឹងធ្វើឱ្យមានអារម្មណ៍ធូរស្រាលបន្ទាប់ពីធ្វើលំហាត់ប្រាណ និងមានជម្រើសផ្សេងៗជាច្រើនក្នុងការអានសៀវភៅនៅបណ្ណាល័យ។ ទីនេះបំពាក់ដោយគ្រឿងបរិក្ខាហាត់ប្រាណទំនើបៗ បន្ទប់ សម្រាកដ៏មានផាសុកភាព និងទីធ្លាធំទូលាយសម្រាប់ហាត់យូហ្គាផងដែរ។

រីស្សតដ៏ប្រណីតបំផុតមួយនេះមានទីតាំងស្ថិតនៅចម្ងាយ២០នាទីពីព្រលានយន្តហោះអន្តរជាតិតារាសាគរ (Dara Sakor International Airport) ហើយត្រូវបានកំណត់ថានឹងក្លាយជារមណីយដ្ឋានឈានមុខមួយនៅក្នុងតំបន់។

សម្រាប់ព័ត៌មានលម្អិត សូមចូលទៅកាន់គេហទំព័ររបស់ កោះទទឹង រីស្សត៖ www.kohtotungresort.com, សម្រាប់ព័ត៌មានបន្ថែម សូមទំនាក់ទំនងមកកាន់យើងខ្ញុំតាមរយៈអ៉ឺម៉ែល៖ [email protected] ឬទូរស័ព្ទ៖ +855 95 269 999៕