ម៉ានីល ៖ ប្រទេស ហ្វីលីពីន បានអំពាវនាវឱ្យបើកច្រកសមុទ្រ ហ័រមូស ឡើងវិញ ជាបន្ទាន់។

រដ្ឋមន្ត្រីការពារជាតិហ្វីលីពីន លោក Gilberto Teodoro Jr កាលពីថ្ងៃពុធ អំពាវនាវឱ្យច្រកសមុទ្រ ហ័រមូស (Hormuz) ត្រូវបើកឡើងវិញ ជាបន្ទាន់ ហើយបញ្ជាក់ថា លោក មានបំណងកំណត់លក្ខខណ្ឌ សម្រាប់ការបើកឡើងវិញ ដោយផ្អែកលើការរំពឹងទុក របស់អ្នកពាក់ព័ន្ធសេដ្ឋកិច្ច ជាពិសេស ក្រុមហ៊ុនធានារ៉ាប់រង។

ការលើកឡើងនេះ ធ្វើឡើង នៅបន្ទាប់ពី
លោក Ferdinand Marcos Jr. ប្រធានាធិបតីហ្វីលពីន បានប្រកាសភាពអាសន្នថាមពលជាតិ តាមរយៈបទបញ្ជាប្រតិបត្តិ ដែលអនុញ្ញាតឱ្យរដ្ឋាភិបាល ឆ្លើយតបបានលឿនជាងមុន ដើម្បីផ្គត់ផ្គង់ ចំពេលប្រឈមនឹងបញ្ហាកង្វះប្រេងផ្គត់ផ្គង់ ព្រោះសង្គ្រាមអាមេរិកនិងអ៊ីស្រាអែល ប្រឆាំងនឹងអ៊ីរ៉ង់។

យ៉ាងណា បើតាមសារព័ត៌មាន MSN , កាលពីថ្ងៃអង្គារ ហ្វីលីពីន ទទួលបានការផ្គត់ផ្គង់ប្រេងរុស្ស៊ី លើកដំបូង មិនធ្លាប់មាន ក្នុងពេល ៥ឆ្នាំ ។ ប្រេងរុស្ស៊ី ដែលអាមេរិកដកទណ្ឌកម្ម ដោយបានបើកដៃ ឲ្យប្រទេសនានាទិញ ក្នុងពេល ៣០ថ្ងៃ ហើយ ត្រូវផុតកំណត់ នៅថ្ងៃទី១១ ខែមេសា៕

ប្រភពពី AFP ប្រែសម្រួល ៖ សារ៉ាត