វ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ អះអាងថា ប្រធានាធិបតីអ៊ីរ៉ង់ ស្នើសុំបទឈប់បាញ់ ប៉ុន្តែ ទីក្រុងតេហេរ៉ង់ និយាយថា មិនមែនជាការពិត។

តាមរយៈបណ្តាញសង្គម Truth Social កាលពីថ្ងៃពុធ លោក ត្រាំ បានរៀបរាប់ថា ប្រធានាធិបតីអ៊ីរ៉ង់ លោក Masoud Pezeshkian បានស្នើសុំបទឈប់បាញ់មួយ ប៉ុន្តែ បានទទូចថា សាធារណៈរដ្ឋអ៊ីស្លាម ត្រូវតែបើកច្រកសមុទ្រ Hormuz ឡើងវិញ ជាមុនសិន។

យ៉ាងណាក៏ដោយ ទីក្រុង តេហេរ៉ង់ បានបដិសេធថា ប្រធានាធិបតី Masoud Pezeshkian មិនបានស្វែងរកបទឈប់បាញ់ ជាមួយទីក្រុងវ៉ាស៊ីនតោន ហើយបានប្រកាស កាលពីល្ងាចថ្ងៃពុធថា អ៊ីរ៉ង់បានបន្តវាយប្រហារដោយមីស៊ីល និងយន្តហោះគ្មានមនុស្សបើក សំដៅទៅលើមូលដ្ឋានអ៊ីស្រាអែល និង សហរដ្ឋអាមេរិក នៅឈូងសមុទ្រ។

នៅក្នុងបទសម្ភាសន៍ ជាមួយទូរទស្សន៍ Al Jazeera ដែលចាក់ផ្សាយ កាលពីថ្ងៃពុធ រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា មិនមាន “ការចរចា” ជាមួយសហរដ្ឋអាមេរិកទេ ហើយថា ទីក្រុង Tehran មិនបានឆ្លើយតបទៅនឹងសំណើ ដែលបានរាយការណ៍ពីទីក្រុងវ៉ាស៊ីនតោន ដើម្បីបញ្ចប់សង្រ្គាមនោះឡើយ ។ លោក Araghchi បន្ថែមថា «មានការដោះដូរសារ តាមរយៈអន្តរការី… នេះមិនមែនជាវិធីបង្កើតការចរចាទេ» ។

យ៉ាងណា បើតាមសារព័ត៌មាន Dailymirror, ប្រធានាធិបតីអ៊ីរ៉ង់ លោក Masoud Pezeshkian បានអះអាង កាលពីថ្ងៃអង្គារ ថា ប្រទេសលោកមានឆន្ទៈចាំបាច់ដើម្បីបិទបញ្ចប់សង្គ្រាម ជាមួយសហរដ្ឋអាមេរិក និងអ៊ីស្រាអែល ប៉ុន្តែ ត្រូវមានលក្ខខណ្ឌចាំបាច់មួយចំនួន រួមទាំង ការធានាសន្តិសុខ ឬ គ្មានការឈ្លានពានឡើងវិញ ជាដើម ៕

ប្រភពពី AFP ប្រែសម្រួល ៖ សារ៉ាត